ওড়িছা চৰকাৰে কৰ’নাভাইৰাছৰ বিৰুদ্ধে পদক্ষেপৰ মাজতে ৰাজ্যখনৰ চিকিৎসক আৰু স্বাস্থ্য কৰ্মীসকলক আগতীয়াকৈ চাৰিমাহৰ দৰমহা দিয়াৰ সিদ্ধান্ত গ্ৰহণ কৰিছে।
মুখ্য মন্ত্ৰী নৱীন পাটনায়কে বুধবাৰে এক ভিডিঅ’ মেছেজযোগে কয় যে এপ্ৰিল মাহত এই কৰ্মচাৰীসকলক একেলগে চাৰিমাহৰ দৰমহা আদায় দিয়া হ’ব।
“এই কঠিন সময়ত অবিৰত সেৱা আগবঢ়াই অহা আমাৰ চিকিৎসক, পেৰামেডিকছ আৰু স্বাস্থ্যকৰ্মীসকল ফাৰ্ষ্ট লাইন অৱ ডিফেন্সত আছে,” তেওঁ কয়।
ওড়িছা চৰকাৰে কৰ’নাভাইৰাছৰ বিৰুদ্ধে পদক্ষেপ গ্ৰহণৰ বাবে মুখ্য মন্ত্ৰীৰ সাহায্য পুঁজিৰ পৰা ৪৪.৫ কোটি টকা ইতিমধ্যে মোকলাই দিছে।
চৰকাৰৰ তথ্য মতে ৰাজ্যখনলৈ আন ৰাজ্যৰ পৰা শেহতীয়াকৈ ৭৮,২৩৩ গৰাকী লোক আহিছে।
ওড়িছাত দুগৰাকী কৰ’নাভাইৰাছ আক্ৰান্ত এতিয়ালৈকে চিনাক্ত হৈছে।
চৰকাৰী তথ্য মতে তেওঁলোকৰ চিকিৎসা চলি আছে আৰু দুয়োগৰাকীৰে অৱস্থা বৰ্তমান সুস্থিৰ আৰু দুয়ো আহাৰ গ্ৰহণ কৰিছে।
ৰাজ্যখনত কৰ’নাভাইৰাছৰ সন্দেহত ১৩৩ গৰাকী লোকৰ নমুনা সংগ্ৰহ কৰা হৈছিল। তাৰে ১২৯টা নমুনাৰ ফলাফল পোৱা গৈছে আৰু চাৰিটাৰ পাবলৈ আছে।
ৰাজ্যখনত নতুনকৈ কোনো লোক কৰ’নাভাইৰাছত আক্ৰান্ত চিনাক্ত হোৱা নাই। ৩৬ গৰাকী লোকক আছুতীয়াকৈ চিকিৎসালয়ত ৰখা হৈছে।
অসমত এতিয়ালৈকে কোনো কৰ’নাভাইৰাছ আক্ৰান্ত চিনাক্ত হোৱা নাই যদিও দেশত এই সংখ্যাই ৬০০ৰ সীমা অতিক্ৰম কৰিছে।
প্ৰধান মন্ত্ৰী নৰেন্দ্ৰ মোদীয়ে ইতিমধ্যে কৰ’নাভাইৰাছ প্ৰতিহত কৰাৰ বাবে সমগ্ৰ দেশত ২১ দিনৰ লকডাউন ঘোষণা কৰিছে।
প্ৰধান মন্ত্ৰীয়ে দেশৰ প্ৰত্যেকজন লোককে মহামাৰীবিধক গুৰুত্বসহকাৰে লৈ ঘৰতে থাকিবলৈ আহ্বান জনাইছে।
