ক’ৰ’না ভাইৰাছৰ আতংকত ভুগি থকা ভাৰতৰ একাংশ বিমানযাত্ৰীয়ে বিমানত অৰুণাচলী মানুহৰ কাষত বহিবলৈ অস্বীকাৰ কৰা এটা ঘটনা পোহৰলৈ আহিছে।
টাইমছ অব ইণ্ডিয়াত প্ৰকাশ পোৱা এটা বাতৰিমতে, বৃহস্পতিবাৰে নিশা দিল্লী-কলকাতা এখন বিমানত এজন বিমানযাত্ৰীয়ে তেওঁৰ বাবে নিৰ্দিষ্ট আসনখনৰ কাষত এজন অৰুণাচলী মানুহ থকা বাবে তাত বহিবলৈ অস্বীকাৰ কৰে।
বাতৰিটোত কোৱা হৈছে যে বিমানযাত্ৰীজনে এই আপত্তি কৰে অৰুণাচলী মানুহজনে হাঁচি মৰাৰ পিছতে।
অৱশ্যে ভাগ্যক্ৰমে আগৰ এটা শাৰীত এখন খালী আসন আছিল আৰু কেবিন ক্ৰিউজনে তেওঁক তাতে বহুৱায়।
বিমানসেৱাৰ কৰ্মচাৰী একাংশৰ মন্তব্য বুলি দাবী কৰি বাতৰিটোত কোৱা হৈছে, যোৱা ৭ ফেব্ৰুৱাৰিৰ পিছত এনেকুৱা দাবীবোৰ (আসন সলাই দিয়াৰ) বেছিকৈ উঠিছে।
৭ ফেব্ৰুৱাৰিত দিল্লী-পুনেৰ এয়াৰ ইণ্ডিয়াৰ বিমানত যোৱা এজন চীনা নাগৰিকক চিকিৎসালয়ত ভৰ্তি কৰা হৈছিল। তেওঁক ক’ৰ’না ভাইৰাছত আক্ৰান্ত বুলি সন্দেহ কৰা হৈছিল যদিও পিছত সেয়া নহয় বুলি প্ৰমাণিত হয়।
“এনেকুৱা বদ্ধমূল ধাৰণা কিছুমান অব্যাহত আছে। এইটো দুৰ্ভাগ্যজনক আৰু আমি বিমানযাত্ৰীসকলক বিজ্ঞানমনস্ক হ’বলৈ কৈছো”, এজন বিমান কৰ্মচাৰীৰ উদ্ধৃতি টাইমছ অব ইণ্ডিয়াত।
“তেতিয়া সমস্যা হয়, যেতিয়া বিমানত আসন ভৰ্তি থাকে। এনেকুৱা পৰিস্থিতিয়ে কেতিয়াবা আনকি বিমানৰ উৰণো বিলম্ব কৰে”, কৰ্মচাৰীজনে কয়।
বৃহস্পতিবাৰৰ ঘটনাটো সন্দৰ্ভত এজন এয়াৰ কমাণ্ডাৰে কয় যে তেওঁ কেবিন ক্ৰিউৰ অনুৰোধৰ পিছত কেইবাবাৰো হস্তক্ষেপ কৰিব লগীয়া হৈছিল।
“মই এইটো বুজাব লগীয়া হৈছিল যে কাষৰ আসনত থকা বিমানযাত্ৰীজন এজন ভাৰতীয় আৰু চীনৰ লগত কোনো সম্পৰ্ক নাই”, তেওঁ কয়।
বিমান পৰিচাৰকসকলে জানিবলৈ দিয়ামতে, কাহ-চৰ্দি হৈ থকা বতৰত এনেকুৱা সন্দেহৰ ঘটনা বেছি হৈছে।
আনহাতে, জানিব পৰামতে কিছুমান এয়াৰলাইনছে বিমানযাত্ৰীসকলৰ প্ৰতি স্পষ্ট কৰি দিছে যে “অযুক্তিকৰ অনুৰোধ”-এ তেওঁলোকক নমাই দিবলৈ বাধ্য কৰিব।
“কোনো পৰিস্থিতিতে আমি যাত্ৰীসকলক আন কোনোবাই সন্দেহ কৰিলে বুলিয়েই আঁতৰি যাবলৈ ক’ব নোৱাৰো”, এজনে কয়।