অতি চমু নোটিছত কটন বিশ্ববিদ্যালয়ৰ ছাত্ৰাবাস আৰু ছাত্ৰী নিবাস সমূহ কোৱাৰেণ্টাইন কক্ষলৈ ৰূপান্তৰিত কৰাৰ বাবে কামৰূপ জিলা প্ৰশাসনে গ্ৰহণ কৰা সিদ্ধান্তৰ বিৰোধিতা কৰিছে কটনিয়ানে।
কটন বিশ্ববিদ্যালয়ৰ ছাত্ৰাবাস আৰু ছাত্ৰী নিবাসসমূহ কোৱাৰেন্টাইন চেণ্টাৰলৈ সদ্যহতে ৰূপান্তৰিত নকৰিবলৈ জিলা প্ৰশাসনক আহ্বান জনাইছে কটনিয়ানে।
ছাত্ৰাবাস আৰু ছাত্ৰী নিবাসৰ পৰিৱৰ্তে সদ্যহতে আভ্যন্তৰীণ ক্ৰীড়া ষ্টেডিয়াম আৰু ক্লাছৰুমসমূহ কোৱাৰেন্টাইন চেণ্টাৰ কৰিবলৈ অতিৰিক্ত জিলা উপায়ুক্তক আহ্বান জনাইছে বিশ্ববিদ্যালয়খনৰ ছাত্ৰ-ছাত্ৰী সকলে।
হোষ্টেল সমূহত বহু ছাত্ৰ-ছাত্ৰীৰ দৰকাৰী নথি পত্ৰ আছে যি সমূহ ল’কডাউন আৰম্ভ হোৱাৰ পূৰ্বে শিক্ষাৰ্থী সকলে এৰি থৈ ঘৰলৈ গৈছিল।
ইপিনে, কালিলৈ বহু ছাত্ৰ-ছাত্ৰীৰ অনলাইন পৰীক্ষা আছে যাৰ ফলত ততাতৈয়াকৈ কোনো আহি তেওঁলোকৰ নথি-পত্ৰ নিব নোৱাৰে।
সেয়েহে ছাত্ৰ ছাত্ৰী সকলক ঘৰৰ পৰা আহি নথি পত্ৰসমূহ নিবলৈ অতি কমেও ৪ দিন সময় দিবৰ বাবে আহ্বান জনায় কটনিয়ানে।
কটনিয়াৰ হৈ এন এছ এছৰ গ্ৰুপ লিডাৰ হিৰক জ্যোতি বৰাই কামৰূপ মহানগৰ জিলা উপায়ুক্তলৈ এই আহ্বান জনায় স্মাৰক পত্ৰ প্ৰেৰণ কৰে।
