GMCH ৰ কৰ’না কক্ষত মৰ্মান্তিক বেদনাৰ মাজৰে দিন কটাইছে জাগীৰোডৰ দুৰ্ভগীয়া কোভিড-১৯ আক্ৰান্ত ৰোগী অমৰ ডেকাই।
স্নায়বিক আৰু পক্ষাঘাত ৰোগত আক্ৰান্ত হৈ থকা অমৰ এতিয়া এগৰাকী কোভিড-১৯ আক্ৰান্ত ৰোগী। এতিয়া তেওঁৰ কাষত পৰিচৰ্য্যাকাৰী হিচাপে নাই মাতৃ আৰু পত্নী।
অমৰৰ মাতৃ আৰু পত্নী বৰ্তমান মহেন্দ্ৰ মোহন চৌধুৰী হস্পিতালত কোৱাৰেন্টাইন হৈ আছে।
মাতৃ আৰু পত্নীৰ সৈতে হোৱা টেলিফোনিক বাৰ্তালাপত ন্যুনতম সুবিধাৰ পৰা বঞ্চিত হোৱা বুলি গুৰুতৰ অভিযোগ তুলিলে দুৰ্ভগীয়া অমৰে।
‘তহঁত ক’ত গ’লি? মোক কোনেও একো সহায় নকৰে। তহঁত আঁতৰি গ’লি।মই ইয়াত বহুত কষ্ট কৰি সহ্য-মহ্য কৰি আছো। মোক কোনেও একো খুৱাই নিদিয়ে। মই কেনেকৈ খাওঁ মইহে জানো। মই নিজে ভাতো খাব নোৱাৰো। বাওঁহাতৰে দুচামুচ বা এচামুচ যেনে-তেনে যায় তাৰ পাছত চামুচখনেই পৰি থাকে।‘ পত্নী আৰু মাতৃৰ সৈতে হোৱা টেলিফোনিক বাৰ্তালাপত উচুপি উচুপি এইদৰে কয় অমৰে।
তাৎপৰ্য্যপূৰ্ণভাৱে, দেহৰ সোঁফালটো সম্পূৰ্ণ অকামিলা অমৰক এতিয়া আহাৰ খোৱাৰ ক্ষেত্ৰতো সহায় কৰিবলৈ কাষত কোনো নাই।
অমৰে আৰু কয়, ‘এটা পেন্ট আৰু এটা স্পৰ্টিং চাৰিদিন পিন্ধি আছো। কান্দিছো চকুপানী ওলাইছে আৰু মুখতে শুকাইছে। মুখখন মচিবলৈয়ো কাপোৰ এখন নাই।যিদিনাখন ৰাতি শৌচ হৈ আছিল পেন্টৰে সৈতে হৈছিল। তেনেকৈয়ে শুই থাকিলো। বাথৰুম বিচাৰি বিচাৰি হাহাকাৰ।‘
ইয়াৰোপৰি, শৌচ-প্ৰসাৱ কৰিবলৈয়ো ওচৰত কোনোধৰণৰ টয়লেটৰ ব্যৱস্থা নাই বুলি অমৰে মাতৃৰ আগত অভিযোগ কৰে।
‘মোক যিটো ৰুমত ৰাখিছে সেইটো ৰুমত শুদা বিচনা তিনিখন, আই চি য়ু আছে। লেট্ৰিন বিচাৰি বিচাৰি বহুদূৰ যাব লাগে।অকলে অকলে লেট্ৰিন বিচাৰি ফুৰিছো মই।‘
ইপিনে, মাতৃয়ে অমৰৰ দেহাৰ অৱস্থা কেনেকুৱা বুলি সোধাত তেওঁ কয়, ‘মোৰ আগৰ নিচিনাই। নতুনকৈ একো হোৱা নাই।কিন্তু বহুত অশান্তিত দিন কটাইছো। ভোক লাগিলেও ভাতকেইটা ভালদৰে খাব নোৱাৰো।চাহ দিলেও চাহৰ গিলাচটো লুটি খাই পৰি থাকে মুখৰ ওচৰ নাপায়হি।‘
‘আপুনি কান্দি হতাশ নহ’ব।‘অসহায় পত্নীয়ে উৎসাহ দি অমৰক এইদৰে কয়।
তাৎপৰ্য্যপূৰ্ণভাৱে মাতৃ-পত্নীক অমৰৰ লগত চিকিৎসা আৰু সহায়ক হিচাপে চাৰি-পাঁচগৰাকীকৈ চিকিৎসক নাৰ্চ নিয়োগ কৰা হৈছে বুলি মাতৃক চিকিৎসালয় কৰ্তৃপক্ষৰ পৰা কোৱা হৈছিল যদিও অমৰে সেয়া নস্যাৎ কৰি কয় ‘এয়া সম্পূৰ্ণ মিছা কথা। এজনো নাই মোক সহায় কৰা।‘
ইপিনে, এই সন্দৰ্ভত নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত কোৱাৰেন্টাইনত থকা অমৰৰ মাতৃয়ে GMCH কৰ্তৃপক্ষলৈ আহ্বান জনাই কয়, ‘তাক যেনেকৈ নিয়া হৈছে তেনেকৈ শুশ্ৰুষা কৰিলে ভাল পাওঁ। উন্নত চিকিৎসা কৰে যেন সেইটো কৰিলে ভাল পাওঁ। সি লেট্ৰিন বা বাথৰুমলৈ যোৱাৰ সময়ত যেন চকু দিয়ে।‘
অমৰে অনা এনেবোৰ অভিযোগৰ পাছতে এতিয়া জিএমচিএইচৰ কোভিড কক্ষ পোতাশাল নেকি? বুলিও বহুতে প্ৰশ্ন কৰিছে।
অমৰে সন্মুখীন হোৱা এনেবোৰ সমস্যা তথা যি অভিযোগ মাতৃৰ আগত কৰিলে তাৰ এক উচিত তন্ত হ’ব নে? নে এনেদৰেই এৰি দিয়া হ’ব কোভিড আক্ৰান্ত ৰোগীসকলক?
স্বাস্থ্য মন্ত্ৰী ড০ হিমন্ত বিশ্ব শৰ্মাই যিসময়ত কোভিড-১৯ আক্ৰান্ত ৰোগীসকলক অতি উন্নত ব্যৱস্থাৰে চিকিৎসা সেৱা প্ৰদান কৰি অহাৰ কথা কৈ আহিছিল সেই সময়ত চিকিৎসাখণ্ডৰ হৃদপিণ্ডস্বৰূপ জিএমছিএইচৰ এনেবোৰ ছবিহে এতিয়া পোহৰলৈ আহিছে।
