কৰ্ণাটকত ধাৰাবাহিকভাৱে গৰু চুৰি কাণ্ড সংঘটিত হোৱাৰ পিছত কঠোৰ সতৰ্কবাণী জাৰি কৰিছে মন্ত্ৰী মানকল এছ বিদ্যাই। গৰু চুৰিৰ লগত জড়িত থকা লোকক ৰাজপথত গুলীয়াই হত্যা কৰা হ’ব বুলি তেওঁ সকীয়াই দিয়ে।
তেওঁৰ এই মন্তব্য ৰাজহুৱা হোৱাৰ লগে লগে বিতৰ্ক তীব্ৰতৰ হৈ পৰে।
শেহতীয়াকৈ কৰ্ণাটকৰ হান্নাভাৰ অঞ্চলত গাভিনী গাই হত্যাৰ ঘটনাই ৰাজ্যৰ ৰাজনীতিক উত্তপ্ত কৰি তুলিছে। সেই অশান্ত পৰিস্থিতিৰ মাজতে উত্তৰ কানাড়া জিলাৰ এক অনুষ্ঠানত মন্ত্ৰী বিদ্যাই কয় যে, ”বছৰ বছৰ ধৰি অঞ্চলটোত গৰু চুৰি হৈ আহিছে। এই ঘটনা অনতিপলমে বন্ধ কৰিবলৈ জিলা আৰক্ষী অধীক্ষকক জনাইছো। এইটো ঠিক নহয়। আমি গৰু পূজা কৰো। এই কাণ্ডৰ সৈতে জড়িতসকলক কঠোৰ শাস্তি দিয়া হ’ব।”
লগতে তেওঁ কয় – “নিশ্চিতভাৱে গৰু চুৰিত জড়িত কিছু লোকক গ্ৰেপ্তাৰ কৰা হৈছে। কিন্তু ইয়াক সম্পূৰ্ণৰূপে বন্ধ কৰিব লাগিব। এনেদৰে চলি থাকিলে মইও একেধৰণৰ পদক্ষেপ লম। হয়তো এই নিৰ্দেশনা অমানৱীয় হ’ব পাৰে। কিন্তু গৰু চুৰি ৰোধ কৰিবলৈ মই অপৰাধীক ৰাজহুৱা স্থানত গুলীয়াই হত্যা কৰাৰ নিৰ্দেশ দিম।”
তেওঁ গো পালক সকলক আশ্বাস দি কয় যে আপোনালোকে নিৰ্ভয়ে গৰু পালন কৰক। গৰু আৰু গৰুৰ মালিকৰ সুৰক্ষাৰ দায়িত্ব চৰকাৰে ল’ব।
ইয়াৰ সমান্তৰালকৈ কৰ্ণাটকৰ পূৰ্বৰ বিজেপি চৰকাৰক লক্ষ্য কৰি মন্ত্ৰীগৰাকীয়ে লগতে কয় যে কৰ্ণাটকত এই ঘটনা নতুন নহয়। আনকি বিজেপি চৰকাৰৰ দিনতো ইয়াত গৰু চুৰিৰ ব্যাপক ঘটনা সংঘটিত হৈছিল। চৰকাৰত থকাৰ সময়ত এই ঘটনা ৰোধৰ বাবে বিজেপিয়ে কোনো পদক্ষেপ লোৱা নাছিল বুলিও অভিযোগ কৰে মন্ত্ৰীগৰাকীয়ে।
