শিৱসাগৰত চিপিআইৰ জিলা পৰিষদৰ এখন সভা অনুষ্ঠিত হৈ যায়।
শিৱসাগৰ সমষ্টিৰ উপ নিৰ্বাচনৰ বাবে কা বিৰোধী আৰু বাওঁপন্থী দলসমুহ একত্ৰিত হৈ ঐক্যবদ্ধ প্ৰাৰ্থী প্ৰদান কৰিবলৈ আহ্বান।
দেওৰজা উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ কমিউনিষ্ট নেতা অতুল গগৈৰ সভাপতিত্বত ২১ ফেব্ৰুৱাৰীত চিপিআইৰ জিলা পৰিষদৰ এখনি বিশেষ সভা অনুষ্ঠিত হৈ যায় ।
উক্ত সভাত চলিত মাহৰ আৰম্ভণিতে কলকতাত অনুষ্ঠিত হোৱা চিপিআইৰ ৰাষ্ট্ৰীয় পৰিষদৰ বিশেষ অধিবেশনত গৃহীত হোৱা দেশৰ আৰ্থ ৰাজনৈতিক ৰিপ’ৰ্ট সম্পৰ্কে ৰাষ্ট্ৰীয় পৰিষদৰ সদস্য তথা জিলা সম্পাদক কনক গগৈয়ে বিতংকৈ বাখ্যা কৰে।
চিপিআইৰ ৰাজ্যিক নেতা তথা সমাজকৰ্মী ধৰ্ম বৰুৱাই ৰাষ্ট্ৰীয় পৰিষদৰ সাংগঠনিক ৰিপ’ৰ্টৰ ওপৰত বাখ্যা আগবঢ়াই।সভাত বয়োজ্যেষ্ঠ কমৰেড ফণী চেতিয়াইও ভাষণ প্ৰদান কৰে।
বাওঁ দলটোৰ জিলা পৰিষদৰ সভাই শিৱসাগৰ বিধান সভা সমষ্টিত হ’বলগীয়া আগন্তুক উপ নিৰ্বাচনৰ সম্পৰ্কে বিতং আলোচনা কৰি বাওঁ গণতান্ত্ৰিক প্ৰগতিশীল শক্তি তথা কা বিৰোধী শক্তিসমূহক ঐক্যবদ্ধ কৰি চিপিআইৰ তৰফৰ পৰা এগৰাকী প্ৰাৰ্থী থিয় কৰোৱাবৰ বাবে সৰ্বসন্মতি ক্ৰমে প্ৰস্তাৱ গ্ৰহণ কৰে।
সভাই ইতিমধ্যে সৰ্বসন্মতিক্ৰমে আগন্তুক শিৱসাগৰ বিধান সভাৰ উপ নিৰ্বাচনত প্ৰাৰ্থিত্বৰ বাবে চিপিআইৰ তৰফৰ পৰা এজনীয়া পেনেলৰ নাম গ্ৰহণ কৰে যদিও এতিয়াই নাম প্ৰকাশৰ পৰা বিৰত থাকে বাওঁপন্থী দলটো।
সভাই লোৱা প্ৰস্তাৱবোৰ ৰাজ্যিক আৰু ৰাষ্ট্ৰীয় পৰিষদৰ অনুমোদনৰ বাবে প্ৰেৰণ কৰাৰ সিদ্ধান্ত গ্ৰহণ কৰে।
আনহাতে সভাত বাওঁ দলটোৱে আছু ,কৃষক মুক্তিকে ধৰি সকলো কা বিৰোধী দল-সংগঠনক ঐক্যবদ্ধ হৈ সংগ্ৰাম কৰিবলৈ আহ্বান জনায়।
