CAA-ৰ বিৰোধিতাত আত্মজাহ দিয়া চি পি আই (এম)ৰ নেতা ৰমেশ প্ৰজাপতক বচাব পৰা নগ’ল আৰু আজি চিকিৎসালয়তে তেওঁ শেষ নিঃশ্বাস ত্যাগ কৰে।
CAA আৰু NRC-ৰ বিৰুদ্ধে নিজা ববীয়াকৈ তীব্ৰ প্ৰতিবাদ সাব্যস্ত কৰি অহা ৭০ৰ ঊৰ্ধ্বৰ প্ৰজাপতে ২৪ জানুৱাৰিত মধ্য প্ৰদেশৰ ইণ্ডোৰত গাত কেৰাচিন ঢালি আত্মজাহৰ চেষ্টা কৰে।
তেওঁক চিকিৎসালয়ত ভৰ্তি কৰোৱা হৈছিল প্ৰায় ১০০ শতাংশ জ্বলি যোৱাত আজি শেষ নিঃশ্বাস ত্যাগ কৰে।
আৰক্ষীয়ে প্ৰজাপতৰ আত্মজাহৰ ঘটনাক NRC-ৰ সৈতে সম্পৰ্কিত কৰিবলৈ অস্বীকাৰ কৰিছে যদিও চি পি আই (এম)ৰ নেতাজনে নিয়মীয়াকৈ CAA আৰু NRC-ৰ প্ৰতিবাদ কৰি আহিছিল। চি পি আই (এম)ৰ মধ্য প্ৰদেশ গোটেও নেতাজনে প্ৰতিবাদৰ অংশ স্বৰূপেই এয়া কৰা বুলি দাবী কৰিছে।
তেওঁ নিজা ববীয়াকৈ পুস্তিকা ছপা কৰি বিলাইছিল আৰু হিন্দীতে লিখা এই পত্ৰবোৰত তেওঁ Attack on secular Constitution of India বুলি শিৰোনাম দিছিল।
চি পি আই (এম)-এ সংবাদ মাধ্যমৰ আগত কয় যে যদিও তেওঁলোকে এনে পদক্ষেপক সমৰ্থন নকৰে, ই বিষয়টোত মানুহৰ দুশ্চিন্তাৰ গভীৰতা প্ৰকট কৰে।
মন কৰিব লগীয়া যে সমগ্ৰ দেশজুৰি CAA-ৰ প্ৰতিবাদত কেইবাজনো লোকে প্ৰাণ হেৰুৱাইছে। অসমত ৫জন প্ৰতিবাদকাৰীৰ মৃত্যু হৈছে আৰক্ষীৰ গুলীত।