অসমৰ বানপানী আৰু গৰাখহনীয়াক লৈ সোমবাৰে গুৱাহাটী প্ৰেছ ক্লাৱত এখন সংবাদমেল আয়োজন কৰে চি পি আই (এম-এল)য়ে।
সংগঠনটোৰ অভিযোগ অনুসৰি কেন্দ্ৰ চৰকাৰৰ বৈষম্য আৰু ৰাজ্য চৰকাৰৰ গাফিলতিৰ বাবেই বান সমস্যা গভীৰ হৈছে ।
চি পি আই (এম-এল)ৰ ৰাজ্যিক সম্পাদক ৰুবুল শৰ্মাই জনোৱা মতে, ‘অসমৰ বানপানী সমস্যাতকৈ নমামী উৎসৱক চৰকাৰে বেছি গুৰুত্ব দিছে। বানপানীৰ লগতে গৰাখনীয়া ৰাজ্যৰ বাবে এক গভীৰ সমস্যা হৈ পৰিছে যদিও চৰকাৰে ইয়াৰ সমাধানৰ বাবে কোনো আঁচনি গ্ৰহণ কৰা নাই’।
আনহাতে, দুৰ্যোগ ব্যৱস্থাপনা বিভাগৰ তথ্য অনুসৰি বিগত ৫ বছৰত খহনীয়াৰ গ্ৰাসত ১১ লাখ বিঘাতকৈ বেছি উৰ্বৰ ভূমি নদীত জাহ গৈছে।
অসমৰ মুঠ ২৩ খন জিলাত ৫ বছৰত খহনীয়াৰ বাবে ৮৬, ৫৬১ গৰাকী লোক ভূমিহীন হৈছে।
চৰকাৰে ২০১৫ চনৰ পৰা ২০১৮ চন পৰ্যন্ত ছিঙা মথাউৰিৰ ৬০ শতাংশই মেৰামতি কৰা নাই। অসমৰ ৪৩২ টা মথাউৰিৰ ৩০০ টা মথাউৰিহে সুকলমে আছে কিন্তু চৰকাৰে এই বিষয়টো গুৰুত্বসহকাৰে লোৱা নাই আৰু পুঁজিও মোকোলাই দিয়া নাই বুলি শৰ্মাই কয় ।
তদুপৰি, ২৭ খন জিলাৰ ৩৭০৫ খন গাঁৱৰ প্ৰায় ৪৯ লাখ লোক এতিয়াও বানত আক্ৰান্ত হৈ আছে। চৰকাৰৰ মতে ৭৫৫ টা আশ্ৰয় শিবিৰ আৰু বান সাহায্য শিৱিৰত ডেৰ লাখতকৈ অধিক বানাক্ৰান্তই আশ্ৰয় গ্ৰহণ কৰি আছে।
বান সাহায্যৰ পৰ্যাপ্ত পুঁজি আছে বুলি চৰকাৰে দাবী কৰিছে কিন্তু বানপীড়িতই সাহায্য লাভ কৰা নাই এই অভিযোগ শৰ্মাৰ।
চৰকাৰলৈ সংগঠনটোৱে সংবাদমেলৰ পৰা দাবী জনাই যে বানপানীৰ স্থায়ী সমস্যা সমাধানৰ বাবে দুৰ্যোগ ব্যৱস্থাপনা সংস্থাৰ অসমে পাবলগীয়া পুঁজি মোকোলাই দিলেই নহব বান পৰিস্থিতিৰ সৈতে মোকাবিলা কৰিব পৰাকৈ বিশেষ পেকেজ ঘোষণা কৰিব লাগিব ।
অসমৰ সম্পদ যদি ৰাষ্ট্ৰীয় সম্পদ হয় তেনেহলে বানপানীকো অসমৰ ৰাষ্ট্ৰীয় সমস্যা হিচাপে ঘোষণা কৰিব লাগে বুলি সংবাদমেলত দাবী উত্থাপন কৰি দুৰ্যোগ ব্যৱস্থাপনাৰ ৰিলিফ মেনুৱল অনুসৰি সকলো বানাক্ৰান্তকে যথাযথভাৱে ক্ষতিপূৰণ আদায় দিব লাগে বুলি চি পি আই (এম-এল)য়ে দাবী জনায়। এই ক্ষেত্ৰত এন জি অ বিলাকে ভাল পদক্ষেপ লৈছে বুলি সংগঠনটোৱে কয়।
ম্যাদ উকলা মথাউৰি আৰু অকাৰ্য্যকৰী মথাউৰি পুনৰ নিৰ্মাণ কৰিব লাগে লগতে বানত বিধস্ত হোৱা শস্য ভূমিকে ধৰি বানপীড়িত অঞ্চলৰ ভূমিৰ খাজনা পাঁচ বছৰলৈ ৰেহাই দিব লাগে আৰু বানপীড়িত অঞ্চলৰ চৰকাৰী -ব্যক্তিগত সকলো ধৰণৰ কৃষি ঋণ ৰেহাই দিব লাগে আৰু পুনৰ খেতিৰ বাবে উপযুক্ত কঠিয়া তথা বীজ বিনামূলীয়াকৈ যোগান ধৰিব লাগে।
বান সমস্যাক লৈ হোৱা অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ পদক্ষেপ গ্ৰহণ কৰিব লাগে আৰু সকলো বৃহৎ নদীবান্ধ প্ৰকল্প বন্ধ কৰি ক্ষুদ্ধ বান্ধ তথা জলসিঞ্চনৰ আঁচনি গ্ৰহণ কৰিব লাগে বুলিও সংবাদমেলত সম্পাদকগৰাকীয়ে মন্তব্য কৰে।
সংবাদমেলত চি পি আই (এম এল)ৰ অসম ৰাজ্যিক সম্পাদক ৰুবুল শৰ্মা, কেন্দ্ৰীয় নিয়ন্ত্ৰণ আয়োগৰ সদস্য ধীৰাজ দাস, অসম ৰাজ্যিকৰ সদস্য পংকজ কুমাৰ দাস উপস্থিত থাকে।
