যোৱা ৪ মে তাৰিখে মণিপুৰত সংঘটিত হৈছিল এক বীভৎস ঘটনা। তিনিগৰাকী কুকি মহিলাক উন্মত্ত মেইতেই গঞাই আৰক্ষীৰ সমুখতে বিবস্ত্ৰা কৰি ৰাজপথেদি লৈ গৈছিল আৰু তাৰে এগৰাকীক দলবদ্ধভাবে ধৰ্ষণ কৰা হৈছিল। ধৰ্ষণৰ বলি হোৱা ২১ বছৰীয়া যুৱতীগৰাকীৰ ভাতৃ আৰু পিতৃকো সেই স্থানতে হত্যা কৰিছিল উন্মাদ গঞাই। যোৱা ১৯ জুলাই তাৰিখে সামাজিক মাধ্যমত ভাইৰেল হৈ পৰিছিল সেই দৃশ্য।
আটাইতকৈ গুৰুত্বপূৰ্ণ কথাটো হ’ল যে যি ঠাইত এই নাৰকীয় ঘটনা সংঘটিত হৈছিল সেই ঠাইৰেই থানা – নংপক ছেকমাই থানাক ২০২০ চনত দেশৰ ভিতৰত সৰ্বশ্ৰেষ্ঠ থানা হিচাপে পুৰস্কৃত কৰিছিল কেন্দ্ৰীয় চৰকাৰে।
জানিব পৰা মতে, ঘটনা সংঘটিত হোৱা বি ফৈনাম গাঁৱৰ সেই স্থানৰ পৰা নংপক ছেকমাই থানালৈ দূৰত্ব মাথোঁ ৮৫০ মিটাৰ। এই খবৰ প্ৰকাশ কৰিছে ইণ্ডিয়া টুডে কাকতে।
২০২০ চনত নংপক ছেকমাই থানাক কেন্দ্ৰই ‘দেশৰ শ্ৰেষ্ঠ থানা’ হিচাপে বাছি লৈছিল। প্ৰতি বছৰে কেন্দ্ৰীয় চৰকাৰে দেশৰ শ্ৰেষ্ঠ থানা বাছনি কৰে। সেই নিৰ্বাচন বিভিন্ন সূচকৰ ওপৰত ভিত্তি কৰি কৰা হয়। গৃহ পৰিক্ৰমা মন্ত্ৰালয়ে প্ৰকাশ কৰা এক বিবৃতি অনুসৰি, নাৰীৰ বিৰুদ্ধে হোৱা অপৰাধ আৰু সমাজৰ দুৰ্বল শ্ৰেণীৰ ওপৰত হোৱা অত্যাচাৰ ৰোধ কৰাত তেওঁলোকৰ ভূমিকাৰ ভিত্তিত আটাইতকৈ ‘সক্ষম’ আৰক্ষী থানাসমূহক শীৰ্ষ সন্মান প্ৰদান কৰা হয়। সেই অনুসৰি ২০২০ চনত নংপক ছেকমাই থানাক কেন্দ্ৰৰ দ্বাৰা ‘দেশৰ শ্ৰেষ্ঠ আৰক্ষী থানা’ হিচাপে বাছনি কৰা হয়।
উল্লেখ্য যে ৪ মে’ত হোৱা ভয়ংকৰ ঘটনাৰ গোচৰ ১৮ মে তাৰিখে ৰুজু হৈছিল যদিও ১৯ জুলাইত ঘটনাৰ ভিডিঅ’ ভাইৰেল নোহোৱালৈকে এজনো অপৰাধীক কৰায়ত্ত নকৰিলে দেশৰ আটাইতকৈ শ্ৰেষ্ঠ থানাখনে।
এই ঘটনাই এতিয়া যেন উদঙাই দিছে আৰক্ষী ব্যৱস্থাৰ স্বৰূপ। দেশৰ আটাইতকৈ শ্ৰেষ্ঠ থানাৰ বঁটা পোৱা থানাৰ সমীপতে যদি এনেকুৱা ঘটনা সংঘটিত হ’ব পাৰে তেন্তে আন ঠাইত কেনেকৈ মানুহে সুৰক্ষিত অনুভৱ কৰিব? এই প্ৰশ্নই এতিয়া সৰ্বত্ৰে জোকাৰণিৰ সৃষ্টি কৰিছে।
