ষ্টেইট বেংক অব ইণ্ডিয়াই ইয়াৰ কিছুমান গ্ৰাহকলৈ দিয়া জাননীৰ প্ৰতি সঁহাৰি দিবলৈ মাজত মাথোঁ এক সপ্তাহ সময় আছে। ২৮ ফেব্ৰুৱাৰিৰ ভিতৰত সঁহাৰি নিদিলে এইবোৰ একাউণ্ট বেংকটোৱে অচল (non-operational) কৰি তুলিব পাৰে।
বেংকটোৱে ৰিজাৰ্ভ বেংক অব ইণ্ডিয়াৰ নীতিৰ দোহাই দি ইয়াৰ গ্ৰাহকসকলক ২৮ ফেব্ৰুৱাৰিৰ ভিতৰত তেওঁলোকৰ কে ৱাই চি সম্পূৰ্ণ কৰিবলৈ কৈছে।
২৮ ফেব্ৰুৱাৰি, ২০২০ তাৰিখৰ পূৰ্বে কে ৱাই চি আপডেইট নকৰা গ্ৰাহকসকলৰ বাবে বেংকৰ সেৱাৰ অব্যাহত নাথিকব বুলি জাননীত সকীয়াই দিয়া হৈছিল।
ৰিজাৰ্ভ বেংক অব ইণ্ডিয়াৰ নীতি মতে, Prevention of Money-Laundering Act-ৰ ব্যৱস্থাৱলী মতে, যেতিয়া এটা লেনদেন সম্পন্ন কৰা হয় বেংকবোৰে গ্ৰাহক চিনাক্তকৰণৰ নিৰ্ধাৰিত নিয়ম অনুসৰণ কৰিব লাগে।
ৰিজাৰ্ভ বেংকৰ ৱেবছাইটত উল্লেখ আছে যে ভাৰতৰ সকলো বেংকেই তেওঁলোকৰ গ্ৰাহকৰ কে ৱাই চি ২০২০ চনৰ ২৮ ফেব্ৰুৱাৰিৰ ভিতৰত আপডেইট কৰিব লাগিব আৰু এইটো কথা গ্ৰাহকসকলক জাননী যোগে বেংকে জনাব লাগিব।
গ্ৰাহকৰ কে ৱাই চি উন্নীত কৰাত বিফল হোৱা বেংকবোৰে জৰিমনাৰ সন্মুখীন হ’ব বুলিও এটা সূত্ৰত প্ৰকাশ।
এছ বি আইৰ সূত্ৰই জনোৱা মতে, বেংকটোৱে ইতিপূৰ্বে তেওঁলোকৰ গ্ৰাহকসকললৈ কে ৱাই চি আপডেইট কৰিবলৈ বাৰ্তা (মেছেজ) প্ৰেৰণ কৰিছে।
আনহাতে ২১ ফেব্ৰুৱাৰিত গুৱাহাটীত এখন সংবাদমেলত এছ বি আইৰ উত্তৰ-পূব চক্ৰৰ মুখ্য মহা প্ৰবন্ধক সুনীল কুমাৰ টেণ্ডনেও এই কথা সকীয়াই দি কয় যে যিসকলে জাননী পোৱাৰ পিছতো কে ৱাই চি আপডেইট নকৰে, তেওঁলোকৰ একাউণ্টৰ পৰা ধন উলিওৱা সাময়িকভাৱে বন্ধ কৰি দিয়া হ’ব। অৱশ্যে জমা অব্যাহত ৰাখিব পাৰিব।
কে ৱাই চি আপডেইট কৰাৰ বাবে গ্ৰাহকসকলে তেওঁলোকৰ পৰিচয় আৰু ঠিকনা প্ৰমাণ কৰিব পৰা নথিৰ প্ৰতিলিপি (যিবোৰ বেংকৰ দ্বাৰা গ্ৰহণযোগ্য) দিব লাগিব।