পুনৰ ফেনে-ফোটোকাৰে বাঢ়িছে দৰিকা নৈ; সন্ত্ৰস্ত কোঁৱৰপুৰৰ সহস্ৰাধিক পৰিয়াল
ফেনে-ফোটোকাৰে পুনৰ ওফন্দি উঠিছে দৰিকা নৈ। যোৱা কিছুদিন ধৰি নাগা পাহাৰত হৈ থকা নেৰা-নেপেৰা বৰষুণৰ বাবে দৰিকাৰ জলস্তৰ বৃদ্ধি পাইছে।
ফলত আতংকিত হৈ পৰিছে শিৱসাগৰ জিলাৰ কোঁৱৰপুৰ মৌজাৰ ১৫-২০খন ৰাজহ গাঁৱৰ সহস্ৰাধিক কৃষক পৰিয়াল।
উল্লেখযোগ্য যে বিগত বছৰসমূহত দৰিকা নৈৰ বাঢ়নী পানীয়ে উক্ত গাঁওসমূহত বিস্তৰ ক্ষতিসাধন কৰি আহিছে, যাৰ বাবে ৰাইজে এবাৰৰ পৰা তিনিবাৰ পৰ্যন্ত কঠীয়া ৰুব লগীয়া হয়।
ইয়াৰ আগতেও শাওনীয়া বানৰ পিছত বহুবাৰ দৰিকাৰ ভদীয়া বানে সেউজীয়া পথাৰ বুৰাই পেলোৱাৰো নজিৰ আছে। সম্প্ৰতি বাঢ়নী পানীয়ে ডিমৌমুখ, দীঘল দৰিয়লী, কপৌটিঙৰ বিস্তীৰ্ণ কৃষিভূমি বুৰাই পেলাইছে।
এই সমস্যাৰ স্থায়ী সমাধানৰ বাবে অঞ্চলটোৰ ৰাইজে চৰকাৰক দাবী জনাই আহিছে যদিও চৰকাৰে বিষয়টোক গুৰুত্ব সহকাৰে লোৱা নাই।
প্ৰফুল্ল মহন্তৰ দ্বিতীয়টো কাৰ্যকালত তদানীন্তন বান মন্ত্ৰী প্ৰমোদ গগৈয়ে শিৱসাগৰৰ নগৰৰ পৰা দিখৌমুখলৈকে দৰিকা নৈৰ পাৰত মথাউৰি বনাই বান নিয়ন্ত্ৰণৰ এক প্ৰস্তাৱ আগবঢ়াইছিল যদিও পৰৱৰ্তী সময়ত কংগ্ৰেছ চৰকাৰে সেই প্ৰস্তাৱ নস্যাৎ কৰাৰ বাবে আজি পৰ্যন্ত মথাউৰিটো হৈ নুঠিল।
সেয়ে বৰ্তমানৰ সৰ্বানন্দ সোনোৱাল চৰকাৰক মথাউৰিটো নিৰ্মাণ কৰিবলৈ দাবী জনাইছে স্থানীয় ৰাইজে।
দৰিকা নৈৰ উপৰিও থাওৰা সমষ্টিৰ দিৰৈ নদীয়েও জাপিসজিয়া, বৰদিৰৈ, সৰল পখাৰৰ কৃষিভূমি বুৰাই পেলাইছে বুলিও কৃষি বিষয়া অৰূপ কুমাৰ বৰুৱাই জানিবলৈ দিয়ে।