ৰাজ্যত চলি থকা এন আৰ চি উন্নীতকৰণ প্ৰক্ৰিয়াত বৃহৎ ভূমিকা লৈ থকা ডাটা এণ্ট্ৰি অপাৰেটৰ সকলৰ দৰমহা বন্ধ হৈ থকাত সমস্যাত পৰিছে অপাৰেটৰসকল। নিচেই কম দৰমহা পোৱা ডাটা এণ্ট্ৰি অপাৰেটৰসকলে প্ৰাপ্য দৰমহা মুকলি কৰি দিয়াৰ দাবীত মাজে মাজে আন্দোলনৰ পথ ল’ব লগীয়া হোৱাটো অত্যন্ত দুৰ্ভাগ্যজনক।
যোৱা দুদিন মান পূৰ্বে ৰাজ্যখনৰ বিভিন্ন ঠাইত ডাটা এণ্ট্ৰি অপাৰেটৰসকলে প্ৰাপ্য দৰমহা মুকলি কৰি দিয়াৰ দাবীত কৰ্ম বিৰতিৰে প্ৰতিবাদ সাব্যস্ত কৰাৰ পিছতো দৰমহা পাবলৈ সক্ষম হোৱা নাই।
আজিও প্ৰাপ্য দৰমহা মুকলি কৰি দিয়াৰ দাবীত নগাওঁ জিলাৰ চামগুৰি ৰাজহ চক্ৰ বিষয়াৰ কাৰ্যালয়ত কৰ্মৰত ডাটা এণ্ট্ৰি অপাৰেটৰসকলে প্ৰতিবাদ সাব্যস্ত কৰে। তেওঁলোকে দৰমহা নিয়মীয়াকৰণৰ দাবীৰে শ্ল’গান দিয়ে। দৰমহা আদায় নিদিয়া পৰ্যন্ত এন আৰ চিৰ কাম বন্ধ ৰখাৰো হুংকাৰ দিয়ে প্ৰতিবাদকাৰীসকলে।
জানিব পৰামতে, প্ৰতিবাদটোত ৰাজহ চক্ৰটোৰৰ অন্তৰ্গত ৩৪টা এন আৰ চি সেৱা কেন্দ্ৰৰ কৰ্মচাৰীয়ে অংশগ্ৰহণ কৰে।
“আমি দৰমহা নিচেই কমকৈ পাওঁ। তাকো সময়ত নাপাওঁ। আমাৰ বহুতে ভালেমান দূৰলৈ গৈ কাম কৰিবগৈ লাগে। মটৰ চাইকেলৰ তেল ভৰাবলৈও পকেটত পইচা নাথাকে।” এইদৰে কয় প্ৰতিবাদকাৰীসকলৰ এজনে।
প্ৰতিবাদৰ অন্তত প্ৰতিবাদকাৰীসকলে এন আৰ চিৰ ৰাজ্যিক মুখ্য সমন্বয়ক প্ৰতীক হাজেলালৈ চামগুৰি ৰাজহ চক্ৰ বিষয়াৰ জৰিয়তে ছয় দফীয়া দাবী সম্বলিত এখন স্মাৰকপত্ৰ প্ৰেৰণ কৰা বুলি জানিবলৈ দিয়ে। তেওঁলোকে দৰমহাটো যাতে মাহৰ ১ তাৰিখেই হয়, সেইটো নিশ্চিত কৰাৰ দাবী জনাইছে।
উল্লেখযোগ্য যে এন আৰ চিৰ কামত নিযুক্ত ডাটা এণ্ট্ৰি অপাৰেটৰসকলক তেনেই কম দৰমহাত খটাই অহাৰ অভিযোগ উত্থাপন হৈ আহিছে। এই ডাটা এণ্ট্ৰি অপাৰেটৰসকলৰ বাবে চৰকাৰৰ ফালৰ পৰা নিৰ্ধাৰিত দৰমহা একেবাৰে কম নহয় যদিও মাজত থকা দুটাকৈ ঠিকাদাৰী প্ৰতিষ্ঠানে এওঁলোকৰ দৰমহাৰ সমানে এফাল নিজৰ বাবে ৰাখি ডাটা এণ্ট্ৰি অপাৰেটৰসকলক কম টকাত খটুৱাই আহিছে।