পিতৃৰ মৃত্যুৰ সময়ত কন্যা বিবাহিত হৈ থাকিলেও, পৰৱৰ্তী সময়ত তেওঁৰ বিবাহবিচ্ছেদ ঘটিলে পৰিয়াল পেঞ্চনৰ অধিকাৰৰ পৰা বঞ্চিত কৰিব নোৱাৰিব। এক তাৎপৰ্যপূৰ্ণ ৰায়দানত ত্ৰিপুৰা উচ্চ ন্যায়ালয়ৰ খণ্ড বিচাৰপীঠে এই গুৰুত্বপূৰ্ণ মত প্ৰকাশ কৰিছে। আদালতে স্পষ্ট কৰি দিয়ে যে পেঞ্চন সম্পৰ্কীয় নিয়মসমূহত এনে কোনো অৱ্যক্ত চৰ্ত থাকিব নোৱাৰিব যাৰ বাবে পিতৃ জীৱিত থকা অৱস্থাতে জীয়ৰীৰ বিবাহবিচ্ছেদ হ’ব লাগিব। মহিলাৰ অধিকাৰ সুৰক্ষিত কৰাৰ ক্ষেত্ৰত উচ্চ ন্যায়ালয়ৰ এই সিদ্ধান্তই এক নতুন আইনী নিদৰ্শন গঢ়ি তুলিলে।
আগৰতলা পৌৰ নিগমৰ এজন অৱসৰপ্ৰাপ্ত কৰ্মচাৰীৰ কন্যা উজ্জ্বল ৰানী পালৰ দীৰ্ঘ আইনী যুঁজৰ পিছতে এই গুৰুত্বপূৰ্ণ ৰায় পোহৰলৈ আহে। অৱসৰপ্ৰাপ্ত কৰ্মচাৰীগৰাকীয়ে ২০০৪ চনত অৱসৰ গ্ৰহণ কৰাৰ পিছত ২০১৮ চনৰ ডিচেম্বৰ মাহত মৃত্যুবৰণ কৰিছিল। তেওঁৰ পত্নীৰ পূৰ্বেই মৃত্যু হৈছিল। পিতৃৰ মৃত্যুৰ সময়ত উজ্জ্বল দেৱী বিবাহিত আছিল যদিও ২০২১ চনৰ অক্টোবৰ মাহত পাৰস্পৰিক সন্মতিৰে তেওঁৰ বিবাহবিচ্ছেদ সম্পন্ন হয়। ইয়াৰ পিছত ২০২২ চনত তেওঁ পিতৃৰ পৰিয়াল পেঞ্চনৰ বাবে আবেদন কৰাত আগৰতলা পৌৰ নিগমে সেই আবেদন খাৰিজ কৰে। পৌৰ নিগমৰ যুক্তি আছিল যে পিতৃ জীৱিত থকা সময়ত বিবাহবিচ্ছেদ নোহোৱাৰ বাবে তেওঁ এই সুবিধা লাভ নকৰিব।
পৌৰ নিগমৰ এই সিদ্ধান্তৰ বিৰুদ্ধে উজ্জ্বল দেৱীয়ে আইনী যুঁজ আৰম্ভ কৰে যদিও প্ৰথমতে এজনীয়া বিচাৰপীঠে পৌৰ নিগমৰ পক্ষতেই ৰায় দিয়ে। কিন্তু হতাশ নহৈ সেই সিদ্ধান্তক প্ৰত্যাহ্বান জনাই তেওঁ ডিভিজন বেঞ্চৰ দ্বাৰস্থ হয়। প্ৰধান বিচাৰপতি এম এছ ৰামচন্দ্ৰ ৰাও আৰু বিচাৰপতি বিশ্বজিৎ পালিতৰ ডিভিজন বেঞ্চত এই আবেদনৰ শুনানি অনুষ্ঠিত হয়। আদালতে গোচৰটো পৰ্যবেক্ষণ কৰি জনায় যে ২০১৭ চনৰ ত্ৰিপুৰা ৰাজ্যিক অসামৰিক সেৱা সংশোধিত পেঞ্চন নিয়মৰ কোনো স্থানতে পিতৃ জীৱিত থাকোঁতেই জীয়ৰীৰ বিবাহবিচ্ছেদ হ’ব লাগিব বুলি উল্লেখ নাই। একলপীয়া বিচাৰপীঠে আইনৰ পৰিসৰৰ বাহিৰলৈ গৈ এখন অতিৰিক্ত চৰ্ত জাপি দিছিল, যিটো সম্পূৰ্ণৰূপে অনুচিত।
পেঞ্চন পোৱাৰ বাবেই কোনো মহিলাই ভুৱা বিবাহবিচ্ছেদ ল’ব বুলি পৌৰ নিগমে যি যুক্তি দাঙি ধৰিছিল, তাক ন্যায়ালয়ে সম্পূৰ্ণ অযুক্তিকৰ বুলি নাকচ কৰে। বিচাৰপতিদ্বয়ে কয় যে সামান্য কিছু টকাৰ পেঞ্চনৰ লোভত কোনো মহিলাই নিজৰ সংসাৰ ভাঙি আইনী জটিলতাত সোমাই পৰিব বুলি বিশ্বাস কৰাটো কঠিন। কেন্দ্ৰীয় চৰকাৰৰ নীতি-নিৰ্দেশনাক উল্লেখেৰে উচ্চ ন্যায়ালয়ে নিশ্চিত কৰে যে আইনগতভাৱে বিবাহবিচ্ছেদ হোৱা জীয়ৰী পৰিয়াল পেঞ্চনৰ প্ৰাপ্য দাবিদাৰ।
অৱশেষত এজনীয়া বিচাৰপীঠৰ ৰায় বাতিল কৰি উজ্জ্বল ৰানী পালৰ আবেদন মঞ্জুৰ কৰে ডিভিজন বেঞ্চে। ২০২১ চনৰ ৪ অক্টোবৰ অৰ্থাৎ যিদিনা বিবাহবিচ্ছেদ সম্পন্ন হৈছিল, সেই দিনটোৰ পৰাই সমগ্ৰ বকেয়া পৰিয়াল পেঞ্চন বছৰি ৬ শতাংশ সুদেৰে পৰিশোধ কৰিবলৈ আগৰতলা পৌৰ নিগমক নিৰ্দেশ দিছে আদালতে। এই সিদ্ধান্তই ভৱিষ্যতে এনে একে ধৰণৰ সমস্যাত পৰা বহু মহিলাক নিজৰ ন্যায়সংগত অধিকাৰ লাভত বিশেষভাৱে সহায় কৰিব।
