মাজুলী-নিমাতীঘাট ফেৰীসেৱাৰ সুৰক্ষাৰ দিশত পৰ্যালোচনা উপায়ুক্তৰ; নিয়ম নমনা ব্যক্তিগত নাও বন্ধ কৰিব প্ৰশাসনে
মাজুলী-যোৰহাট সংযোগী ফেৰীসেৱাত নিয়োজিত ব্যক্তিগত ফেৰীৰ স্বত্তাধিকাৰীসকল, আভ্যন্তৰীণ জলপৰিবহণ বিভাগৰ কাৰ্যবাহী অভিযন্তাসহ বিষয়া-কৰ্মচাৰীসকলক লৈ উপায়ুক্তৰ সভাকক্ষত ১৭ মে’ত এক বৈঠক অনুষ্ঠিত হয়। এই বৈঠকত জিলা প্ৰশাসনৰ হৈ উপায়ুক্ত গৰাকীৰ সৈতে মাজুলীৰ ৰাজহ চক্ৰ বিষয়া অজিত কুমাৰ শৰ্মায়ো ভাগ লয়।
কমলাবাৰী-নিমাতীঘাট আৰু অফলামুখ-নিমাতীঘাট জলপথৰ ফেৰীসেৱাৰ অধীনত চলাচল কৰা বিভাগীয় আৰু ব্যক্তিগত স্বত্তাধিকাৰীৰ জাহাজ তথা নাওসমূহত যাত্ৰীৰ সুৰক্ষাৰ লগতে আন সা-সুবিধাসমূহ চৰকাৰৰ দ্বাৰা নিৰ্দিষ্ট কৰা নীতি-নিয়ম কিমানদূৰ কাৰ্যকৰী কৰা হৈছে, সেইবিষয়ে বৈঠকত উপায়ুক্ত মিশ্ৰই পুংখানুপুংখভাৱে পৰ্যালোচনা কৰে।
বৈঠকত উপায়ুক্ত মিশ্ৰই বিভাগৰ কাৰ্যবাহী অভিযন্তাক ততালিকে মাজুলী-যোৰহাট সংযোগী ব্ৰহ্মপুত্ৰৰ কেওটা জলপথৰে ফেৰীসেৱাত বিভাগৰ অধীনত চলাচল কৰা ব্যক্তিগত নাওসমূহৰ প্ৰতিখনকে কনিষ্ঠ অভিযন্তাৰ হতোৱাই পৰিদৰ্শন কৰাই এই নাওসমূহত থকা যাত্ৰী সুৰক্ষাৰ বন্দোৱস্ত আৰু নাৱৰ ‘টেকনিকেল ফিটনেছ’ সন্দৰ্ভত প্ৰতিবেদন দুদিনৰ ভিতৰতে উপায়ুক্তৰ হাতত দাখিল কৰিবলৈ নিৰ্দেশ দিয়ে।
আভ্যন্তৰীণ জলপৰিবহণ বিভাগে ৰাজ্যৰ ফেৰীসেৱাৰ ক্ষেত্ৰত বান্ধি দিয়া যাত্ৰী সুৰক্ষা বিষয়ক নীতি-নিয়ম ভংগ কৰা ব্যক্তিগত নাওসমূহ মাজুলী-নিমাতীঘাট ফেৰীসেৱাত চলাচল কৰাটো তাৎক্ষণিক ভাৱে সম্পূৰ্ণ বন্ধ কৰি দিয়া হ’ব বুলি বৈঠকত উপায়ুক্ত মিশ্ৰই বিভাগীয় বিসয়া-অভিযন্তাৰ লগতে ব্যক্তিগত স্বত্তাধিকাৰীসকলক স্পষ্ট কৰি দিয়ে।
ফেৰীসেৱাত চলাচল কৰা নাওসমূহত কোনো কাৰণতে অত্যধিক যাত্ৰী আৰু যান-বাহন তথা সামগ্ৰী নুঠাবলৈ উপায়ুক্ত গৰাকীয়ে নিমাতী, অফলামুখ আৰু কমলাবাৰীঘাটৰ দায়িত্বত থকা আভ্যন্তৰীণ জলপৰিবহন বিভাগৰ কনিষ্ঠ অভিযন্তাকেইজনৰ লগতে ব্যক্তিগত নাৱৰ স্বত্তাধিকাৰীসকলক সতৰ্ক কৰি দিয়ে।
তদুপৰি নাৱৰ ‘বডী’ৰ ওপৰত যাত্ৰী উঠি অহাটো প্ৰশাসনৰ দৃষ্টিগোচৰ হ’লে সংশ্লিষ্ট নাও-ফেৰীৰ কৰ্মচাৰীৰ উপৰি স্বত্বাধিকাৰী তথা ঘাটৰ বিভাগীয় তত্বাৱধায়ককো জগৰীয়া কৰা হ’ব বুলি বৈঠকত উপায়ুক্ত মিশ্ৰই শেষবাৰলৈ সকলোকে সকীয়াই দিয়ে।
তাৰোপৰি কমলাবাৰী-নিমাতীঘাট আৰু অফলামুখ-নিমাতীঘাট জলপথত প্ৰতিদিনে পুৱাৰে পৰা বিয়লিলৈকে দুয়োফালৰ পৰা চলাচল কৰিব লগা প্ৰতিখন ফেৰীৰে নাম, নিৰ্দিষ্ট সময়, নাৱৰ স্বত্বাধিকাৰী আৰু গুৰিয়ালৰ নাম-নম্বৰ আগদিনাই উপায়ুক্তৰ ওচৰত দাখিল কৰিবলৈ বিভাগীয় কাৰ্যবাহী অভিযন্তাক উপায়ুক্ত মিশ্ৰই বৈঠকত নিৰ্দেশ দিয়ে। প্ৰতিখন জাহাজ তথা নাৱতে গুৰিয়ালসহ প্ৰতিগৰাকী কৰ্মচাৰীয়েই এতিয়াৰে পৰা ইউনিফৰ্ম আৰু পৰিচয় পত্ৰ পৰিধান কৰাটোও জিলা প্ৰশাসনে বাধ্যতামূলক কৰি দিছে।