বাক্সা জিলাৰ তামুলপুৰ আৰক্ষী থানাৰ অন্তৰ্গত বৰখোপাত আজি পুৱা প্ৰায় ১০-৩০ বজাত এজন অচিনাক্ত ব্যক্তিৰ মৃতদেহ উদ্ধাৰ হয়। মৃত ব্যক্তি গৰাকীৰ বয়স প্ৰায় ৬০ বছৰ।
জানিব পৰা মতে কালি অৰ্থাৎ শনিবাৰৰ পৰা তামুলপুৰ বৰখাটা অঞ্চলৰ ৰাজপথত ব্যক্তিজনক স্থানীয় লোকে অনাই বনাই ঘুৰি ফুৰা দেখিছিল। আজি বৰখাটা গাঁৱত পুৱাৰ ভাগত ব্যক্তিজনক পথৰ কাষত পৰি থকা দেখা পায় স্থানীয় লোকে এই সম্পৰ্কে স্থানীয় গাঁওবুঢ়াক অবগত কৰে।
লগে লগে গাঁওবুঢ়া বৰখোপা গাঁৱত উপস্থিত হৈ তামুলপুৰ আৰক্ষী থানাত খবৰ দিয়াত তামুলপুৰ আৰক্ষী থানাৰ দ্বিতীয় ভাৰপ্ৰাপ্ত আৰক্ষী বিষয়া বৈকুণ্ঠ বৈশ্য আৰু উপ-পৰিদৰ্শক নিপন গগৈৰ নেতৃত্বত এটি আৰক্ষীৰ দলে ঘটনাস্থলীত উপস্থিত হয়।
পিছত তামুলপুৰ আৰক্ষীয়ে স্থানীয় কেইজনমান যুৱকৰ সহযোগত ব্যক্তি গৰাকীক উদ্ধাৰ কৰি প্ৰথমে তামুলপুৰ প্ৰাথমিক স্বাস্থ্য কেন্দ্ৰলৈ নিয়ে যদিও চিকিৎসকে তেওঁৰ মৃত্যু হোৱা বুলি ঘোষণা কৰাত আৰক্ষীয়ে মৃতদেহটো তামুলপুৰ থানালৈ লৈ আনে আৰু এটা গোচৰ ৰুজু কৰি মৰণোত্তৰ পৰীক্ষাৰ বাবে প্ৰেৰণ কৰে।
বাতৰি লিখা পৰলৈকে মৃত ব্যক্তি গৰাকীৰ পৰিচয় জানিব পৰা হোৱা নাই। পিন্ধনত লুঙি আৰু চাৰ্ট পৰিহিত ব্যক্তি গৰাকীক কোনোবাই চিনি পালে তামুলপুৰ আৰক্ষী থানাত যোগাযোগ কৰিবলৈ তামুলপুৰ আৰক্ষীয়ে আহ্বান জনাইছে।
