মেঘালয়ৰ পূব জয়ন্তীয়া পাহাৰত সংঘটিত কয়লা খনিৰ বিস্ফোৰণত মৃত্যু হোৱা লোকৰ সংখ্যা ২৫ জনলৈ বৃদ্ধি পাইছে। বৃহস্পতিবাৰে পুৱা প্ৰায় ৭ বজাত পূব জয়ন্তীয়া পাহাৰৰ তাছখাই অঞ্চলৰ কয়লা খনিত সংঘটিত হৈছিল এক বিস্ফোৰণ। সেই বিস্ফোৰণৰ পৰা বৃহস্পতিবাৰে ১৮টা মৃতদেহ উদ্ধাৰ কৰাৰ বিপৰীতে শুকুৰবাৰে আৰক্ষীয়ে আৰু ৭টা মৃতদেহ উদ্ধাৰ কৰে। আৰক্ষী সঞ্চালক প্ৰধান আই ননৰাঙে জনোৱা মতে, ১২টা মৃতদেহ চিনাক্ত কৰা হৈছে।
ডিজিপিগৰাকীয়ে লগতে কয় যে দুৰ্যোগ সঁহাৰি বাহিনী, বিশেষ উদ্ধাৰকাৰী দল আৰু আৰক্ষীয়ে যৌথভাৱে অঞ্চলটোত উদ্ধাৰ অভিযান চলাই আছে। ঘটনাস্থলীত চিকিৎসক আৰু এম্বুলেন্সৰ বিশেষ দল মোতায়েন কৰা হৈছে। সমগ্ৰ ঘটনাটো জিলা প্ৰশাসন আৰু ৰাজ্যিক দুৰ্যোগ সঁহাৰি বাহিনীয়ে নিৰীক্ষণ কৰি আছে। সেনাবাহিনীকো মোতায়েন কৰা হৈছে।
পূৱ জয়ন্তীয়াৰ আৰক্ষী অধীক্ষক বিকাশ কুমাৰে জনোৱা মতে, শুকুৰবাৰে কয়লা খনিটোত উদ্ধাৰ অভিযানত চাৰিটা মৃতদেহ উদ্ধাৰ কৰা হয়। গুৰুতৰভাৱে আঘাতপ্ৰাপ্ত বাকী তিনিজনক চিকিৎসালয়ত ভৰ্তি কৰোৱা হয় যদিও চিকিৎসাৰ সময়ত তেওঁলোকৰ মৃত্যু হয়।
তেওঁ তদন্ত চলি থকা বুলিও জানিবলৈ দিয়ে। যিমানদূৰ সম্ভৱ সোনকালেই আহত আৰু মৃতসকলক চিনাক্ত কৰা হৈছে। তদুপৰি কয়লা খনিটোত আৰু কোনো লোক চেপা খাই আছে নে নাই সেয়াও পৰীক্ষা কৰা হৈছে। ১২টা মৃতদেহ চিনাক্ত কৰাৰ পিছত পৰিয়ালকেইটাক গতাই দিয়া হৈছে।
পৰিবেশৰ ক্ষতি আৰু জীৱনৰ বিপদৰ বাবে ২০১৪ চনত মেঘালয়ত ৰেট-হোল কয়লা খনন নিষিদ্ধ কৰিছিল ৰাষ্ট্ৰীয় সেউজ ন্যায়াধিকৰণে। একে সময়তে কয়লা পৰিবহণতো বাধা আৰোপ কৰা হৈছিল। ৰেট-হোল খননত সাধাৰণতে ৩-৪ ফুট উচ্চতাৰ সংকীৰ্ণ অনুভূমিক সুৰংগ খন্দা হয়, যাৰ বাবে শ্ৰমিকসকলে কয়লা উলিয়াবলৈ ভিতৰলৈ হাউলি সোমাই যাবলগীয়া হয়।
মেঘালয়ৰ কয়লা খনিত বৈধ নথি-পত্ৰ আৰু সুৰক্ষাৰ নিয়ম অবিহনে কাম চলি আছিল বুলি আৰক্ষীয়ে দাবী কৰিছে। এই অভিযোগত শুকুৰবাৰে আৰক্ষীয়ে চিৰমাং (৩৬) আৰু ছামেমী ৱাৰ (৪২) নামৰ দুজন লোকক গ্ৰেপ্তাৰ কৰা হয়। গ্ৰেপ্তাৰ হোৱা দুজনক আদালতত হাজিৰ কৰোৱাৰ সময়ত ন্যায়াধীশে তেওঁলোকক তিনিদিনৰ আৰক্ষীৰ জিম্মাত ৰখাৰ নিৰ্দেশ দিয়ে।
ইয়াৰ পূৰ্বেও মেঘালয়ত এনে ভয়াবহ ঘটনা সংঘটিত হৈছিল। ২০১৩ চনত কয়লা খনিৰ বিস্ফোৰণত ১৫ জন লোকৰ মৃত্যু হৈছিল। ২০১৮ চনতো একেধৰণৰ বিস্ফোৰণত ১৩ জন লোকৰ মৃত্যু হৈছিল। ২০১৪ চনত ৰাষ্ট্ৰীয় সেউজ ন্যায়াধিকৰণে জাৰি কৰা নিষেধাজ্ঞা সত্ত্বেও যোৱা বছৰ মেঘালয় চৰকাৰে বিজ্ঞানসন্মত কয়লা খননৰ অনুমতি দিছিল। তাৰপিছতে এই দুৰ্ঘটনাত চৰকাৰৰ ভূমিকাক লৈ প্ৰশ্ন উত্থাপন হৈছে।
