শেহতীয়াকৈ অসমত কংগ্ৰেছ দলটো দিনক দিনে নিশকটীয়া হৈ পৰা দেখা গৈছে। দলটোক এতিয়া সন্মুখৰ পৰা নেতৃত্ব দিয়াৰ বাবে এগৰাকী বলিষ্ঠ নেতাৰ অভাৱ যেন স্পষ্ট হৈ পৰিছে।
ইপিনে, বিধানসভাত বিৰোধী দলপতিৰ মর্যাদা হেৰুৱালে বিধায়ক দেৱব্রত শইকীয়াই। নির্দিষ্ট হাৰতকৈ বিধানসভাত কংগ্রেছ দলৰ সদস্য হ্রাস পোৱাৰ বাবেই দেৱব্রত শইকীয়াই বিৰোধী দলপতিৰ মর্যাদা হেৰুৱাব লগা হয়।
সোমবাৰে অসম বিধানসভাই আনুষ্ঠানিকভাৱে এই কথা জানিবলৈ দিয়ে।
শেহতীয়াকৈ বিধায়ক অজন্তা নেওগ আৰু ৰাজদীপ গোৱালাই কংগ্রেছ দল ত্যাগ কৰাত বিধানসভাত বিৰোধী দলৰ থাকিব লগা সদস্যৰ সংখ্যা হ্রাস পাইছে।
এনে পৰিপ্ৰেক্ষিততে অসম বিধানসভা কর্তৃপক্ষই এক আনুষ্ঠানিক জাননীযোগে দেৱব্রত শইকীয়াৰ বিৰোধী দলপতিৰ মর্যাদা কর্তন কৰিছে।
১জানুৱাৰীৰ পৰাই কার্যকৰী হোৱাকৈ বিধানসভা কর্তৃপক্ষই এই সিদ্ধান্ত গ্ৰহণ কৰিছে। ইয়াৰ ফলত শইকীয়াই বিৰোধী দলপতিৰ মর্যাদা হেৰুওৱাৰ লগতে কেবিনেট মর্যাদাও হেৰুৱালে।
বিধানসভাৰ নিৰ্বাচনৰ পূৰ্বে কংগ্ৰেছৰ বাবে বেয়া খৱৰ হিচাপে পৰিগণিত হোৱা এই ঘটনাই দলটোক অহা দিনবোৰতে প্ৰত্যাহ্বানৰ মুখামুখি কৰি তুলিব।
কেবল বিধানসভাতে নহয়, ৰাজ্যখনত দলটোৰ সাংগঠনিক ভেটিও শেহতীয়াভাৱে দুৰ্বল হৈ পৰাটো ক্ৰমে স্পষ্ট ৰূপত ধৰা দিছে।
