লোকসভাৰ বিৰোধী দলপতি তথা কংগ্ৰেছ সাংসদ ৰাহুল গান্ধীয়ে তেওঁৰ বিৰুদ্ধে তৰা এটা মানহানিৰ গোচৰৰ পৰা সকাহ বিচাৰি মধ্যপ্ৰদেশ উচ্চ ন্যায়ালয়ৰ দ্বাৰস্থ হৈছে। কেন্দ্ৰীয় মন্ত্ৰী শিৱৰাজ সিং চৌহানৰ পুত্ৰ কাৰ্তিকেয় সিঙে তৰা এই গোচৰটোৰ সন্দৰ্ভত ৰাহুল গান্ধীয়ে এখন আবেদন দাখিল কৰি নিজৰ পুৰণি মন্তব্যক লৈ অনুশোচনা প্ৰকাশ কৰিছে। আচলতে এই সমগ্ৰ ঘটনাটো ২০১৮ চনৰ বিধানসভা নিৰ্বাচনৰ সময়ৰ আছিল। জাবুৱাত অনুষ্ঠিত এখন নির্বাচনী সভাত ৰাহুল গান্ধীয়ে পানামা পেপাৰ্চ লিক কাণ্ডৰ প্ৰসংগ উত্থাপন কৰোঁতে কাৰ্তিকেয় সিঙৰ নাম সাঙুৰি লৈছিল, যাৰ বাবে তেওঁৰ সন্মানহানি হোৱা বুলি কাৰ্তিকেয়ই অভিযোগ কৰিছিল।
এই সন্দৰ্ভত কাৰ্তিকেয় সিঙে ভূপালৰ এখন বিশেষ আদালতত গোচৰ তৰিছিল আৰু আদালতে ৰাহুল গান্ধীক ব্যক্তিগতভাৱে হাজিৰ হ’বলৈ চমন জাৰি কৰিছিল। নামনি আদালতৰ এই নিৰ্দেশ আৰু মানহানিৰ সমগ্ৰ প্ৰক্ৰিয়াটো খাৰিজ কৰাৰ দাবী লৈ কংগ্ৰেছ নেতাগৰাকীয়ে উচ্চ ন্যায়ালয়ৰ কাষ চাপে। ৰাহুল গান্ধীৰ অধিবক্তাই আদালতত দাখিল কৰা আবেদনখনত উল্লেখ কৰিছে যে তেওঁ দিয়া মন্তব্যটো কাৰ্তিকেয় সিঙক উদ্দেশ্য কৰি কোৱা হোৱা নাছিল। ইয়াৰ লগতে তেওঁ এই বক্তব্যৰ বাবে দুখ আৰু অনুশোচনাও প্ৰকাশ কৰে। উচ্চ ন্যায়ালয়ৰ ন্যায়াধীশ প্ৰমোদ কুমাৰ অগ্ৰৱালৰ আদালতে এই আবেদনৰ শুনানি গ্ৰহণ কৰাৰ কথা।
ইফালে ৰাহুল গান্ধীৰ এই পদক্ষেপক লৈ বিজেপিৰ তথ্য প্ৰযুক্তি কোষৰ মুৰব্বী অমিত মালব্যই তীব্ৰ সমালোচনা কৰিছে। তেওঁ সামাজিক মাধ্যমত লিখিছে যে ৰাহুল গান্ধীয়ে নিজৰ নামৰ মাজত ক্ষমা শব্দটো লিখি লোৱা উচিত, কাৰণ তেওঁ বিভিন্ন সময়ত ৰাজহুৱাভাৱে এনেধৰণৰ দায়িত্বহীন মন্তব্য কৰে আৰু পিছত আদালতত ফেৰ মাৰিব নোৱাৰি ক্ষমা খোজে। মালব্যই প্ৰশ্ন কৰে যে যদিহে সেই মন্তব্য কাৰ্তিকেয়ৰ বিৰুদ্ধে নাছিলেই, তেন্তে তেওঁৰ নাম কিয় লোৱা হৈছিল। দেশৰ এজন বিৰোধী দলপতিৰ পৰা এনেধৰণৰ ভিত্তিহীন অভিযোগ আশা কৰা নাযায় বুলিও তেওঁ মন্তব্য কৰে।
