দিল্লীৰ মুখ্যমন্ত্ৰী অৰবিন্দ কেজৰিৱালে শনিবাৰে প্ৰধানমন্ত্ৰী নৰেন্দ্ৰ মোডীক ক’ভিদ ভাইৰাছৰ নতুন প্ৰজাতি ‘অ’মিক্ৰণ’ সংক্ৰমিত দেশসমূহৰ পৰা বিমান উৰণ বন্ধ কৰিবলৈ আহ্বান জনাইছে।
শনিবাৰে বিশ্ব স্বাস্থ্য সংস্থাৰ দ্বাৰা কৰ’ণা ভাইৰাছৰ বি.১.১.৫২৯ প্ৰকাৰটোক উদ্বেগৰ প্ৰকাৰ হিচাপে অভিহিত কৰা হৈছিল।
“মই মাননীয় প্ৰধানমন্ত্ৰীক নতুন প্ৰকাৰৰ দ্বাৰা প্ৰভাৱিত হোৱা দেশসমূহৰ পৰা উৰণ বন্ধ কৰিবলৈ অনুৰোধ জনাইছো। অতি কষ্টেৰে আমাৰ দেশ কৰ’ণাৰ পৰা পুনৰুদ্ধাৰ হৈছে। এই নতুন প্ৰকাৰটো ভাৰতত প্ৰৱেশ কৰাটো প্ৰতিহত কৰিবলৈ আমি সকলো সম্ভৱ প্ৰচেষ্টা কৰা উচিত।” কেজৰিৱালে টুইট কৰে।
I urge Hon’ble PM to stop flights from those countries which are affected by new variant. With great difficulty, our country has recovered from Corona. We shud do everything possible to prevent this new variant from entering India https://t.co/5LpFULIHKb
— Arvind Kejriwal (@ArvindKejriwal) November 27, 2021
বৃহস্পতিবাৰে দক্ষিণ আফ্ৰিকাৰ বিজ্ঞানীসকলে এই নতুন প্ৰজাতিটো চিনাক্ত কৰিছিল। ইজৰাইল আৰু বেলজিয়ামতো এই নতুন প্ৰজাতিৰ সংক্ৰমণ বিয়পি পৰিছে । তদুপৰি বটচৱানা আৰু হংকঙতো অ’মিক্ৰণৰ অৱস্থিতি ধৰা পৰিছে।
Institute of Liver and Biliary Science (ILBS) ৰ চেয়াৰমেন তথা দিল্লী চৰকাৰৰ ক’ভিদ পেনেলিষ্ট ড৹ এচকে সেৰিনে এই সন্দৰ্ভত কয়, “আমি এই প্ৰকাৰটোৰ বিষয়ে খুব কম জানো কিন্তু মই ক’ব পাৰোঁ যে ইয়াক VOC হিচাপে ঘোষণা কৰা হৈছে। আমি সতৰ্ক হ’ব লাগিব। বিশেষকৈ নতুন প্ৰজাতিৰ সংক্ৰমণ হোৱা দেশবোৰৰ যাত্ৰীসকলৰ ক্ষেত্ৰত সতৰ্কতামূলক ব্যৱস্থা গ্ৰহণ কৰিব। পৰিকল্পিতভাৱে আগমনৰ পিছত তেওঁলোকৰ বাবে কোৱাৰাণ্টাইন আৰু আইচ’লেশ্যনৰ ব্যৱস্থা থাকিব লাগে।”
উল্লেখ্য যে শুকুৰবাৰে ভাৰতে ১৫ ডিচেম্বৰৰ পৰা নিয়মীয়া আন্তঃৰাষ্ট্ৰীয় বিমান সেৱা পুনৰ আৰম্ভ কৰাৰ ঘোষণা কৰিছিল।
