‘মিঞা মুছলমান’ক লৈ কৰা এক বিতৰ্কিত মন্তব্যৰ বাবে অসমৰ মুখ্যমন্ত্ৰী হিমন্ত বিশ্ব শৰ্মালৈ দিল্লী আদালতে জাননী প্ৰেৰণ কৰিছে। সমাজকৰ্মী হৰ্ষ মন্দাৰে মুখ্যমন্ত্ৰীগৰাকীৰ বিৰুদ্ধে এক গোচৰ ৰুজু কৰাৰ দাবীৰে দাখিল কৰা আৱেদনৰ ভিত্তিত এই জাননী জাৰি কৰা হৈছে।
অতিৰিক্ত সত্ৰ ন্যায়াধীশ চনু অগ্নিহোত্ৰীয়ে মন্দাৰৰ এক পুনৰীক্ষণ আৱেদনৰ শুনানি গ্ৰহণ কৰি এই পদক্ষেপ গ্ৰহণ কৰে।
ইয়াৰ পূৰ্বে যোৱা ২০ এপ্ৰিলত এখন দণ্ডাধীশ আদালতে আৰক্ষীক এই বিষয়ত এজাহাৰ পঞ্জীয়ন কৰিবলৈ নিৰ্দেশ দিয়াৰ পৰা বিৰত আছিল।
আৱেদনখনত উল্লেখ কৰা অনুসৰি, যোৱা ২৭ জানুৱাৰীত তিনিচুকীয়া জিলাৰ ডিগবৈত অনুষ্ঠিত এখন ৰাজহুৱা সভাত মুখ্যমন্ত্ৰী শৰ্মাই এই মন্তব্য কৰিছিল। অসমত ভোটাৰ তালিকাৰ বিশেষ সংক্ষিপ্ত সংশোধনীৰ সময়ত প্ৰায় চাৰিৰ পৰা পাঁচ লাখ ‘মিঞা ভোটাৰ’ৰ নাম কৰ্তন কৰা সন্দৰ্ভত তেওঁ ভাষণ দিছিল।
অভিযোগ অনুসৰি, মুখ্যমন্ত্ৰীগৰাকীয়ে এনেদৰে কৈছিল যে তেওঁলোকে অসুবিধাৰ সন্মুখীন হ’লেহে অসম এৰি যাব আৰু তেওঁলোকে যাতে অসমত ভোট দিব নোৱাৰে তাৰ ব্যৱস্থা কৰা হৈছে।
সত্ৰ আদালতত মন্দাৰৰ অধিবক্তাই যুক্তি দৰ্শাইছিল যে নিম্ন আদালতে কাৰ্যক্ষেত্ৰৰ অভাৱৰ দোহাই দি আৱেদনখন নাকচ কৰিছিল। অধিবক্তাগৰাকীয়ে ‘জিৰ’ এফ আই আৰ’ৰ ধাৰণাটোৰ কথা উল্লেখ কৰি কয় যে যিকোনো ধৰ্তব্য অপৰাধৰ তথ্য যিকোনো আৰক্ষী থানাতেই দাখিল কৰিব পাৰি, লাগিলে অপৰাধটো য’তেই সংঘটিত নহওক কিয়। এই সকলোবোৰ যুক্তিৰ প্ৰতি লক্ষ্য ৰাখি আদালতে জাননী জাৰি কৰিছে আৰু পৰৱৰ্তী শুনানিৰ দিন ২০২৬ চনৰ ১৫ জুলাই নিৰ্ধাৰণ কৰিছে।
