নেশ্যনেল হেৰাল্ডৰ গোচৰত ছোনিয়া গান্ধী, ৰাহুল গান্ধী আৰু আন পাঁচজন লোকৰ বিৰুদ্ধে বলবৎকাৰী সঞ্চালকালয়ে (ইডি) দাখিল কৰা ধন সৰবৰাহৰ গোচৰটোৰ যুক্তিয়েই নুশুনিলে দিল্লীৰ এখন আদালতে। অৱশ্যে এই বিষয়ত কেন্দ্ৰীয় তদন্তকাৰী সংস্থাই তদন্ত অব্যাহত ৰাখিব পাৰে বুলি আদালতে জানিবলৈ দিয়ে।
নেশ্যনেল হেৰাল্ড গোচৰত ৰাহুল-ছোনিয়াৰ বিৰুদ্ধে দাখিল কৰা ধন সৰবৰাহৰ গোচৰটো ৰাজধানীৰ ৰাউছ এভিনিউ আদালতত দাখিল কৰা হৈছিল। ন্যায়াধীশ বিশাল গোগনীয়ে ইডিৰ যুক্তি নাকচ কৰি কয় যে অভিযুক্তৰ বিৰুদ্ধে ব্যক্তিগত পৰ্যায়ত ধন সৰবৰাহৰ অভিযোগ উত্থাপন কৰা হৈছে। আনকি কোনো এফ আই আৰও নাই। ফলত এই গোচৰটো গ্ৰহণযোগ্য নহয়।
ৰাহুল-ছোনিয়াৰ উপৰিও ইডিয়ে ধন সৰবৰাহৰ গোচৰত সুমন ডুবে, ছেম পিত্রোডা, সুনীল ভাণ্ডাৰী আৰু ইয়ং ইণ্ডিয়ান এণ্ড ডটেক্স মাৰ্চেণ্ডাইজৰ বিৰুদ্ধে অভিযোগ উত্থাপন কৰিছিল। স্বাভাৱিকতে আদালতৰ এই মন্তব্য ৰাহুল-ছোনিয়াৰ বাবে এক সাময়িক সকাহ।
২০২১ চনৰ পৰাই ইডিয়ে নেশ্যনেল হেৰাল্ড গোচৰৰ তদন্ত আৰম্ভ কৰিছিল। বিজেপি নেতা সুব্ৰমণিয়ান স্বামীয়ে দাখিল কৰা গোচৰত আদালতৰ নিৰ্দেশৰ ভিত্তিত তদন্ত আৰম্ভ কৰিছিল।
স্বামীয়ে অভিযোগ কৰিছিল যে ইয়ং ইণ্ডিয়াই এছ’চিয়েটেড জাৰ্নেল লিমিটেডৰ ২০০০ কোটি টকাৰ সম্পত্তি অবৈধভাৱে দখল কৰিছে, যাৰ শ্বেয়াৰহোল্ডাৰ আছিল ছোনিয়া আৰু ৰাহুলৰ লগতে আন বহুকেইজন।
নেশ্যনেল হেৰাল্ড কাকতখন প্ৰকাশ কৰিছিল এছ’চিয়েটেড জাৰ্নেল লিমিটেডে। সেয়ে এই গোচৰত আৰম্ভণিৰে পৰা কংগ্ৰেছ নেতৃত্ব জড়িত হৈ আছে।
উল্লেখ্য যে ইয়াৰ পূৰ্বেও নেশ্যনেল হেৰাল্ডৰ গোচৰত ইডিয়ে কেইবাবাৰো ছোনিয়া গান্ধী আৰু ৰাহুল গান্ধীক সোধা-পোছা কৰিছিল। নেশ্যনেল হেৰাল্ডৰ কাৰ্যালয়তো তালাচী চলাইছে। অৱশ্যে এই গোচৰত এতিয়ালৈকে কোনো শীৰ্ষ কংগ্ৰেছ নেতাক গ্ৰেপ্তাৰ হোৱা নাই। কিন্তু নেশ্যনেল হেৰাল্ডৰ সকলো তদন্ত ৰাজনৈতিক প্ৰতিশোধ বুলি কংগ্ৰেছে সদায় দাবী কৰি আহিছে।
