চলিত মাহৰ আৰম্ভণিতে বাবা ৰামদেৱৰ এক মন্তব্যক লৈ বিতৰ্কৰ সৃষ্টি হৈছিল। পতঞ্জলিয়ে গ্ৰীষ্মৰ আৰম্ভণিতে বজাৰত মুকলি কৰিছিল এবিধ গোলাপৰ চিৰাপ। এই অনুষ্ঠানত ৰামদেৱে কয় যে দেশত এটা কোম্পানী আছে যিয়ে শৰবাট বনায়। আপুনিও সেই চৰবত ব্যৱহাৰ কৰে। কিন্তু, এই চৰবত বিক্ৰীৰ পৰা পোৱা ধন মাদ্ৰাছা আৰু মছজিদ নিৰ্মাণৰ বাবে যায়। যদিও এই প্ৰসংগত ৰামদেৱে হামদৰ্দ কোম্পানীৰ ৰুহ আফজাৰ নাম উল্লেখ কৰা নাছিল। কিন্তু, তেওঁৰ মন্তব্যৰ লক্ষ্য যে সেইটোৱেই আছিল সেই কথা বুজিবলৈ কাৰো কোনো অসুবিধা হোৱা নাছিল।
ৰামদেৱে কয় যে, “যদি আপুনি সেই চৰবত পান কৰে, তেন্তে দেশত মাদ্ৰাছা আৰু মছজিদ নিৰ্মাণ হ’ব। কিন্তু, যদি আপুনি পতঞ্জলিৰ চৰবত পান কৰে, তেতিয়া গুৰুকুল নিৰ্মাণ হ’ব। আচাৰ্য কুলামৰ বিকাশ হ’ব, পতঞ্জলি বিশ্ববিদ্যালয় ডাঙৰ হ’ব আৰু ভাৰতীয় শিক্ষা ব’ৰ্ড বৃদ্ধি পাব।
ইফালে ৰামদেৱৰ মন্তব্যক প্ৰত্যাহ্বান জনাই আদালতত গোচৰ তৰে হামদৰ্দ কোম্পানীয়ে। আজি আদালতে কয় যে এনেধৰণৰ বক্তব্যই কোনোপধ্যে গ্ৰহণযোগ্য নহয়। আদালতে লক্ষ্য কৰিলে যে এনে বক্তব্যক কোনো কাৰণতে যুক্তিসংগত বুলি গণ্য কৰিব নোৱাৰি। হামদর্দ কোম্পানীৰ অধিবক্তা মুকুল ৰোহতাগিৰীয়ে কয় যে ৰামদেৱৰ কথাবোৰ ঘৃণামূলক ভাষণৰ সমান।
ৰোহতাগিৰীয়ে যুক্তি দিছিল যে ৰামদেৱৰ কথাই সমাজত সাম্প্ৰদায়িক সম্প্ৰীতি বিনষ্ট কৰি ধৰ্মৰ ভিত্তিত সমাজত বিভাজনৰ সৃষ্টি কৰিব পাৰে। তেওঁ লগতে কয় যে এই মন্তব্য কেৱল প্ৰতিযোগিতামূলক শত্ৰুতাৰ ফল নহয়। এনে নহয় যে এইটো ৰুহ আফজাৰ সুনাম কলংকিত কৰাৰ প্ৰয়াস। তাতোকৈ ডাঙৰ বিপদটো হ’ল এই মন্তব্যই সাম্প্ৰদায়িক বিভাজনৰ সৃষ্টি কৰিব পাৰে।
দিল্লী উচ্চ ন্যায়ালয়ে ইয়াৰ বাবে বাবা ৰামদেৱক তীব্ৰ ধমক দিয়ে। আদালতে এনে মন্তব্য অনুচিত আৰু গ্ৰহণযোগ্য নহয় বুলি কয়। ৰামদেৱৰ অধিবক্তাই তেওঁৰ মন্তব্য থকা সকলো বিজ্ঞাপন আৰু ভিডিঅ’ পাঁচ দিনৰ ভিতৰত আঁতৰোৱা হ’ব বুলি আশ্বাস দিছে। অৱশ্যে সেই কথাত সন্তুষ্ট নহৈ দিল্লী উচ্চ ন্যায়ালয়ে কয় যে সমগ্ৰ বিষয়টোৰ ওপৰত শপতনামা দাখিল কৰিব লাগিব। এই গোচৰৰ পৰৱৰ্তী শুনানি মে’ মাহত হ’ব।
