দিল্লী উচ্চ ন্যায়ালয়ে শুক্ৰবাৰে চৰকাৰৰ গ্ৰিভেন্স এপিলেট কমিটীক এটা গুৰুত্বপূৰ্ণ নিৰ্দেশ দিছে। জনপ্ৰিয় ইউটিউবাৰ ধ্ৰুৱ ৰাঠীয়ে আপলোড কৰা এটা ভিডিঅ‘ আঁতৰোৱাৰ আবেদনৰ ওপৰত ১৫ দিনৰ ভিতৰত সিদ্ধান্ত ল‘বলৈ ন্যায়ালয়ে নিৰ্দেশ দিছে। এই ভিডিঅ‘টোত ধ্ৰুৱ ৰাঠীয়ে দাবী কৰিছিল যে হিন্দু দেৱতা ভগৱান ৰাম, মা সীতা আৰু ভগৱান কৃষ্ণই মাংস খাইছিল আৰু সুৰা পান কৰিছিল।
গ্ৰিভেন্স এপিলেট কমিটী হৈছে ইলেক্ট্ৰনিক্স আৰু তথ্য প্ৰযুক্তি মন্ত্ৰালয়ৰ অধীনৰ এটা সংস্থা। এই সংস্থাই ডিজিটেল প্লেটফৰ্মত থকা যিকোনো বিষয়বস্তু বা একাউণ্টৰ অভিযোগৰ ওপৰত লোৱা সিদ্ধান্তৰ আৱেদনসমূহৰ বিচাৰ কৰে। উচ্চ ন্যায়ালয়ে এই নিৰ্দেশ দিয়াৰ লগতে সকীয়াই দিছে যে এই নিৰ্দেশনা সঠিকভাৱে পালন নকৰিলে ইয়াক আদালতৰ তৰফৰ পৰা অতি গুৰুত্বসহকাৰে লোৱা হ‘ব।
শুনানিৰ সময়ত কেন্দ্ৰীয় চৰকাৰৰ হৈ হাজিৰ হোৱা অতিৰিক্ত চলিচিটৰ জেনেৰেল চেতন শৰ্মাই যুক্তি দৰ্শায় যে ইউটিউবে নিজে দায়িত্ব লৈ এনে আপত্তিজনক আৰু ঘৃণা বিয়পাব পৰা বিষয়বস্তু লগে লগে আঁতৰাব লাগিছিল। তেওঁ কয় যে ৰাঠীৰ এই ভিডিঅ‘টোৱে সমাজত বিভাজন আনিব পাৰে আৰু গুগলে এনে ধৰণৰ ভিডিঅ‘ ৰাখিব নালাগে যিয়ে সংখ্যাগৰিষ্ঠ সমাজৰ আৱেগত আঘাত হানে। উল্লেখযোগ্য যে ৩.২৪ কোটি চাবস্ক্ৰাইবাৰ থকা ধ্ৰুৱ ৰাঠীয়ে কেন হিন্দুজ ইট বিফ শীৰ্ষক তেওঁৰ এটা ভিডিঅ‘ত এনেদৰে দাবী কৰিছিল।
আনহাতে, গুগলৰ অধিবক্তাই ন্যায়ালয়ক জনায় যে কোম্পানীটোৱে ইতিমধ্যে আৱেদনকাৰী অধিবক্তা অমিতা সচদেৱাক তেওঁলোকৰ উত্তৰ দিছে আৰু কমিটীৰ ওচৰত এক আৱেদন দাখিল কৰা হৈছে। এই সকলোবোৰ শুনাৰ পিছত ন্যায়াধীশ স্বৰ্ণ কান্তা শৰ্মাই ১৫ দিনৰ ভিতৰত সিদ্ধান্ত ল‘বলৈ চৰকাৰী সংস্থাটোক নিৰ্দেশ দিয়ে। যোৱা ২১ মাৰ্চত ইউটিউবত আপলোড কৰা এই ভিডিঅ‘টোৰ বিৰুদ্ধে আপত্তি দৰ্শাই অধিবক্তা অমিতা সচদেৱাই আদালতত আৱেদন দাখিল কৰিছিল।
