দিল্লীত এটা ভয়ংকৰ হত্যাকাণ্ডৰ ঘটনা সংঘটিত হৈছে। মাতৃ, ভগ্নী আৰু নাবালক ভাতৃক হত্যা কৰি থানালৈ গৈ আত্মসমৰ্পণ কৰে এজন যুৱকে। আৰক্ষীয়ে জনোৱা মতে, সোমবাৰে বিয়লি অভিযুক্ত যুৱকজন পূব দিল্লীৰ লক্ষ্মী নগৰ থানালৈ যায়। তাতে অভিযুক্তই হত্যাকাণ্ড সংঘটিত কৰাৰ কথা স্বীকাৰ কৰে।
সংবাদ মাধ্যমৰ বাতৰি অনুসৰি অভিযুক্ত যুৱকজনৰ নাম যশবীৰ সিং। সোমবাৰে সন্ধিয়া ৫ বজাত লক্ষ্মী নগৰ থানালৈ আহিছিল। তেওঁৰ দাবী শুনি আৰক্ষীয়ে মংগলবজাৰ অঞ্চল পালেগৈ। তাৰ পৰাই উদ্ধাৰ হৈছে তিনিজন লোকৰ মৃতদেহ। আৰক্ষীয়ে জনোৱা মতে, নিহত কেইজনৰ নাম হ’ল কবিতা (৪৬), মেঘনা (২৪), মুকুল (১৪)। কবিতা অভিযুক্তৰ মাতৃ, মেঘনা আৰু মুকুল যশবীৰৰ ভাই-ভনী।
সংবাদ বাতৰি মতে অভিযুক্তই আৰক্ষীক জনোৱা মতে, পৰিয়ালটো তীব্ৰ আৰ্থিক সংকটত পৰিছিল। সেইবাবেই এই হত্যাকাণ্ড। কিন্তু সংকটটো ঠিক কি আছিল? ইয়াৰ আঁৰত আন কোনো কাৰণ আছিল নে নাই সেয়া স্পষ্ট হোৱা নাই। আৰক্ষীয়ে তদন্ত আৰম্ভ কৰিছে।
সংবাদ মাধ্যমৰ সূত্ৰ অনুসৰি অভিযুক্তই গাড়ী চলাই উপাৰ্জন কৰিছিল। আগতে তেওঁ ব্যক্তিগত চালক হিচাপে কাম কৰিছিল। যোৱা ৬ মাহ ধৰি তেওঁ কাম কৰা নাই। ট্ৰাক চালক যশবীৰৰ পিতৃও যোৱা ৬ মাহ ধৰি পৰিয়ালটোৰ লগত নাছিল বুলি জানিব পৰা গৈছে। এই পৰিয়ালটো মূলতঃ হাৰিয়ানাৰ আৰু কৰ্মসূত্ৰে দিল্লীত থাকে।
সৰ্বভাৰতীয় সংবাদ মাধ্যমৰ এক সূত্ৰ অনুসৰি যশবীৰে ডেৰ কোটি টকাৰ জীৱন বীমা পলিচি ক্ৰয় কৰিছিল। যোৱা ২ মাহত যশবীৰে কেইবাবাৰো আত্মহত্যাৰ চেষ্টা কৰিছিল। কিন্তু তেওঁ কেতিয়াও সফল নহ’ল। আৰক্ষীয়ে জনোৱা মতে, ঘটনাৰ পূৰ্বে যশবীৰে মাতৃৰ সৈতে কাজিয়া হোৱা বুলি জেৰাৰ সময়ত জনাইছিল।
সংবাদ মাধ্যমৰ বাতৰি অনুসৰি, জেৰাৰ সময়ত যশবীৰে কয় যে সোমবাৰে পুৱা তেওঁ ওচৰৰ এলেকাৰ পৰা ধতুৰা ফুলৰ গুটি সংগ্ৰহ কৰিছিল। তেওঁ লাড়ু বনাই মাক, ভনীয়েক আৰু ভায়েকক খুৱাইছিল। সেইবোৰ খোৱাৰ পিছত তেওঁলোক অচেতন হৈ পৰে। তাৰ পিছত যশবীৰে তেওঁলোকক ডিঙি চেপি হত্যা কৰে। দুপৰীয়া ১:৩০ৰ পৰা ২ বজাৰ ভিতৰত হত্যাকাণ্ড সংঘটিত হোৱা বুলি আৰক্ষীয়ে সন্দেহ প্ৰকাশ কৰিছে। তাৰ পিছত যশবীৰে থানাত আত্মসমৰ্পণ কৰে।
