ৰাষ্ট্ৰীয় ৰাজধানী দিল্লীত ক্ৰমবৰ্দ্ধমান প্ৰদূষণ নিয়ন্ত্ৰণৰ বাবে অপ্ৰয়োজনীয় নিৰ্মাণ কাৰ্য, বিদ্যুৎ প্ৰকল্প বন্ধ কৰা আৰু ঘৰৰ পৰা কাম ৰূপায়ণ কৰাৰ দৰে ব্যৱস্থা গ্ৰহণৰ বাবে মঙলবাৰে এখন জৰুৰী বৈঠক আহ্বান কৰিবলৈ কেন্দ্ৰীয় চৰকাৰক নিৰ্দেশ দিছে উচ্চতম ন্যায়ালয়ে।
মুখ্য ন্যায়াধীশ এন ভি ৰমনাৰ নেতৃত্বত এখন বিচাৰপীঠে উত্তৰ প্ৰদেশ, হাৰিয়ানা, পঞ্জাৱ আৰু দিল্লীৰ সংশ্লিষ্ট সচিবসকলক বৈঠকত উপস্থিত থাকিবলৈ নিৰ্দেশ দিয়ে।
শুনানিৰ সময়ত উচ্চতম ন্যায়ালয়ে কয়, “কৰ্তৃপক্ষই দাখিল কৰা শপতনামা বিবেচনা কৰি আমি এই সিদ্ধান্তত উপনীত হওঁ যে প্ৰদূষণৰ মুখ্য কাৰণসমূহ হৈছে নিৰ্মাণ কাৰ্যকলাপ, উদ্যোগ, পৰিবহন ব্যৱস্থা, শক্তি আৰু যানবাহনৰ যাতায়ত। তদুপৰি কিছুমান অংশত খেতিয়কে শস্যৰ অৱশিষ্ট নৰা জ্বলোৱাৰ ফলতো প্ৰদূষণৰ মাত্ৰা বৃদ্ধি পাইছে।”
যদিও ৰাষ্ট্ৰীয় ৰাজধানী অঞ্চল আৰু সংলগ্ন অঞ্চল আইনত বায়ু গুণমান ব্যৱস্থাপনা আয়োগে কিছুমান সিদ্ধান্ত লৈছিল তথাপিও বায়ু প্ৰদূষণ সৃষ্টি কৰা কাৰকবোৰ নিয়ন্ত্ৰণ কৰিবলৈ তেওঁলোকে কি পদক্ষেপ ল’ব সেয়া সঠিকভাৱে সূচিত কৰা নাই বুলি উল্লেখ কৰে বিচাৰপীঠে।
“ইয়াৰ পৰিপ্ৰেক্ষিতত আমি ভাৰত চৰকাৰক কাইলৈ এক জৰুৰী বৈঠকৰ আহ্বান জনোৱাৰ বাবে নিৰ্দেশ দিছো আৰু আমি উল্লেখ কৰা ক্ষেত্ৰসমূহ আৰু বায়ু প্ৰদূষণ কাৰ্যকৰীভাৱে নিয়ন্ত্ৰণ কৰিবলৈ তেওঁলোকে কি আদেশ দিব পাৰে সেই বিষয়ে আলোচনা কৰিম।” — ন্যায়ালয়ে লগতে কয়।
যদিও যোৱা দুই মাহত কৃষকসকলে নৰা জ্বলোৱাৰ পৰিমাণ কম, তথাপি হাৰিয়ানা আৰু পঞ্জাৱত যথেষ্ট পৰিমাণৰ নাড়ী জ্বলোৱা হৈছে বুলি ন্যায়াধীশ ডি ৱাই চন্দ্ৰচূড় আৰু সূৰ্য কান্তক লৈ গঠিত বিচাৰপীঠে কয়।
শীৰ্ষ ন্যায়ালয়ে পঞ্জাৱ আৰু হাৰিয়ানাৰ ৰাজ্য চৰকাৰসমূহক খেতিয়কসকলক দুসপ্তাহৰ বাবে খেতিয়কসকলক নৰা জ্বলোৱাৰ ক্ষেত্ৰত পৃথক ব্যৱস্থা হাতত ল’বলৈ নিৰ্দেশ দিয়ে।
লগতে বিচাৰপীঠে ভাৰত চৰকাৰ আৰু ৰাষ্ট্ৰীয় ৰাজধানী অঞ্চলৰ ৰাজ্যসমূহক কৰ্মচাৰীসকলৰ বাবে ঘৰৰ পৰা কাম আৰম্ভ কৰা ব্যৱস্থা গ্ৰহণ কৰিবলৈ নিৰ্দেশ দিছ।
