বন্ধ ফ্লেটৰ কোঠাৰ পৰা উদ্ধাৰ হৈছে দিল্লী বিশ্ববিদ্যালয়ৰ এগৰাকী অধ্যাপিকাৰ মৃতদেহ। তেওঁৰ মূৰত গধুৰ বস্তুৰে আঘাত কৰাৰ চিন পোৱা গৈছে। প্ৰাৰম্ভিক তদন্তত আৰক্ষীয়ে অধ্যাপিকাগৰাকীক হত্যা কৰা বুলি সন্দেহ প্ৰকাশ কৰিছে।
আৰক্ষীৰ সূত্ৰ অনুসৰি মৃত অধ্যাপিকাগৰাকীৰ নাম দেৱস্মিতা পাল (৪৯)। তেওঁ দিল্লী বিশ্ববিদ্যালয়ৰ শিৱাজী মহাবিদ্যালয়ৰ ইংৰাজী বিভাগত সহকাৰী অধ্যাপিকা আছিল। বৃহস্পতিবাৰে পূব দিল্লীৰ বসুন্ধৰা এনক্লেভৰ সত্যম এপাৰ্টমেণ্টৰ পৰা উদ্ধাৰ হয় তেওঁৰ মৃতদেহ। সেই ফ্লেটটোত তেওঁ অকলে থাকিছিল।
জানিব পৰা মতে, দেবস্মিতা পালৰ স্বামী বেংগালুৰুত থাকে। তেওঁ স্বামীৰ পৰা পৃথক হৈ দিল্লীত থাকিছিল। অধ্যাপিকাগৰাকী ছাত্ৰ-ছাত্ৰীৰ মাজত অতি জনপ্ৰিয় আছিল
আৰক্ষীয়ে জনোৱা মতে, বৃহস্পতিবাৰে বিয়লি মৃতকৰ ভগ্নী দেবাৰতী পালে নিউ অশোক নগৰ আৰক্ষী থানাত ফোন কৰি হত্যাকাণ্ডৰ বিষয়ে অৱগত কৰে। বৃহস্পতিবাৰে পুৱাৰে পৰা দেবস্মিতা পালৰ ফ্লেটত বাহিৰৰ পৰা তলা লগোৱা আছিল।
দেৱাৰতিয়ে পুলিচক জনোৱা মতে, তেওঁ পুৱাৰে পৰা কেইবাবাৰো দেৱস্মিতাক ফোন কৰিছিল। কিন্তু কোনো সঁহাৰি নাপালে। তেওঁ কিবা বেয়া ঘটনা হৈছে বুলি সন্দেহ কৰে। ইয়াৰ পিছত দেৱাৰতিয়ে তালৈ গৈ তলা ভাঙি ফ্লেটটোত সোমায়। প্ৰৱেশ কৰাৰ লগে লগে তেওঁ দেখিলে যে দেৱস্মিতা মৃত অৱস্থাত পৰি আছে। তথ্য লাভ কৰাৰ লগে লগে আৰক্ষীয়ে তালৈ গৈ তেওঁৰ মৃতদেহ উদ্ধাৰ কৰে।
দিল্লী আৰক্ষীৰ বিষয়াই জনোৱা মতে, সহকাৰী অধ্যাপিকাগৰাকীৰ মূৰত গধুৰ বস্তুৰে আঘাত কৰা হৈছে। তেওঁৰ মূৰত গভীৰ আঘাত আছিল। ইয়াৰ উপৰিও তেওঁৰ হাতৰ কব্জিৰ শিৰাবোৰো ফাটি যোৱা দেখা গৈছে। প্ৰথম অৱস্থাত আৰক্ষীয়ে তেওঁক হত্যা কৰা বুলি সন্দেহ কৰিছে। অৱশ্যে ডকাইতিৰ কোনো চিন পোৱা নগ’ল। বিষয়াসকলে লগতে জনায় যে ঘৰৰ সকলো গহনা আৰু ধন নিৰ্দিষ্ট স্থানত আছিল।
আৰক্ষীয়ে জনোৱা মতে, এই ঘটনাত হত্যাৰ গোচৰ ৰুজু কৰি তদন্ত আৰম্ভ কৰা হৈছে। এই হত্যাকাণ্ডৰ কাৰণো জানিবলৈ চেষ্টা চলাইছে বিষয়াসকলে।
