২০০৩ চনত কুখ্যাত শিশু যৌন অপৰাধী জেফ্ৰি এপষ্টেইনৰ জন্মদিনত বিভিন্নজনৰ শুভেচ্ছা থকা এখন কিতাপ প্ৰকাশ কৰিছে আমেৰিকাৰ ডেম’ক্ৰেটিক দলৰ সাংসদসকলে। তেওঁলোকে দাবী কৰিছে যে ইয়াত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ স্বাক্ষৰিত এখন পত্ৰও আছে।
প্ৰয়াত এপষ্টেইনৰ উইল আৰু তেওঁৰ ব্যক্তিগত ঠিকনা বহীকে ধৰি আন বহু নথিৰ লগতে এই কিতাপখন মুকলি কৰা হৈছে। ঠিকনা পুথিখনত বিভিন্ন ৰাজপৰিয়ালৰ সদস্য, বিভিন্ন দেশৰ ৰাজনীতিবিদ, তাৰকা আৰু মডেলৰ নাম আৰু ঠিকনা সন্নিবিষ্ট কৰা হৈছে।
যোৱা মাহত আদালতে এপষ্টেইনৰ সম্পত্তি চোৱাচিতা কৰা অধিবক্তাসকলক চমন জাৰি কৰিছিল। এপষ্টেইনৰ জন্মদিনৰ শুভেচ্ছা থকা কিতাপখনকে ধৰি কিছু নথি-পত্ৰ জমা দিবলৈ কোৱা হৈছিল। ইয়াৰ পিছতে নথি-পত্ৰ সদনৰ তদাৰকী সমিতিলৈ প্ৰেৰণ কৰে।
ইপিনে, ট্ৰাম্পৰ শুভেচ্ছা বাৰ্তা বুলি দাবী কৰা কথাখিনি হোৱাইট হাউছে অস্বীকাৰ কৰিছে। চিঠিখনত এগৰাকী মহিলাৰ শৰীৰ অংকন কৰা আছিল। হোৱাইট হাউছে কয় যে ৰাষ্ট্ৰপতিয়ে ছবিখন অংকন কৰা নাছিল, আৰু তেওঁ স্বাক্ষৰ কৰা নাছিল।
এপষ্টেইন বিষয়ত স্বচ্ছতা নিশ্চিত কৰাৰ বাবে সমৰ্থক আৰু তেওঁৰ নিজৰ ৰিপাব্লিকান পাৰ্টিৰ হেঁচা বৃদ্ধি পোৱাৰ সময়তে এই কিতাপখন মুকলি কৰা হৈছে।
২৩৮ পৃষ্ঠাৰ এই কিতাপখন এপষ্টেইনৰ ৫০ বছৰীয়া জন্মদিনৰ বাবে তেওঁৰ ব্ৰিটিছ সহযোগী তথা প্ৰাক্তন প্ৰেমিক গিছলেন মেক্সৱেলে প্ৰস্তুত কৰা বুলি জানিব পৰা গৈছে। ২০২১ চনত এপষ্টেইনৰ সৈতে যৌনতাৰ বাবে মহিলাক সৰবৰাহৰ ষড়যন্ত্ৰ কৰাৰ অভিযোগত তেওঁ (গিছলেন) দোষী সাব্যস্ত হৈছিল।
‘দ্য ফাৰ্ষ্ট ফিফটি ইয়েৰছ’ শীৰ্ষক গ্ৰন্থখনত উচ্চ পদস্থ ৰাজনীতিবিদ আৰু ব্যৱসায়িক নেতাকে ধৰি এপষ্টেইনৰ সৈতে জড়িত বিভিন্ন ব্যক্তিৰ শুভেচ্ছা সন্নিবিষ্ট কৰা হৈছে। দাবী কৰা হৈছে যে ট্ৰাম্পৰ স্বাক্ষৰিত এটি টোকাও আছে। সেই সময়ত এপষ্টেইনৰ বন্ধু আছিল ট্ৰাম্প। প্ৰাক্তন ৰাষ্ট্ৰপতি বিল ক্লিণ্টনেও লিখা এটি টোকা আছে।
ট্ৰাম্পে কয় যে তেওঁ জন্মদিনৰ শুভেচ্ছা লিখা নাছিল। ইফালে ক্লিণ্টনৰ এগৰাকী মুখপাত্ৰই কয় যে ক্লিণ্টনে সেই সময়ত এপষ্টেইনক চিনি পাইছিল যদিও তেওঁৰ অপৰাধৰ বিষয়ে একো নাজানে।
বিবিচিয়ে ক্লিণ্টন ফাউণ্ডেশ্যন আৰু প্ৰাক্তন ৰাষ্ট্ৰপতিগৰাকীৰ এজন অধিবক্তাৰ সৈতেও যোগাযোগ কৰিছে।
গ্ৰন্থখনত এপষ্টেইনৰ জীৱনৰ বিভিন্ন সময়ৰ ফটো সন্নিবিষ্ট কৰা হৈছে। তদুপৰি গ্ৰন্থখনত তেওঁৰ স্কুলীয়া দিনৰ পৰা প্ৰাপ্তবয়স্ক হোৱালৈকে বিভিন্ন ঘটনা, গীতৰ কথা, ভেনিটি ফেয়াৰ আলোচনীৰ এটা কভাৰ, কিছুমান অশ্লীল স্কেচ, কাহিনী আৰু ব্যক্তিগত কৌতুক আদিৰ বৰ্ণনা কৰা হৈছে।
ট্ৰাম্পে এপষ্টেইনক অভিনন্দন বাৰ্তা প্ৰেৰণ কৰাৰ খবৰটো প্ৰথম জুলাই মাহত ৱাল ষ্ট্ৰীট জাৰ্নেলে প্ৰকাশ কৰিছিল। সেই সময়ত আমেৰিকাৰ ৰাষ্ট্ৰপতিয়ে কৈছিল যে সেয়া ‘ভুৱা’ আৰু তেওঁ লিখা নাই। ইয়াৰ পিছত তেওঁ নিউজ কৰ্পৰেশ্যনৰ মালিক ৰূপাৰ্ট মাৰ্ডক, ৱাল ষ্ট্ৰীট জাৰ্নেলৰ সাংবাদিক, প্ৰকাশক আৰু ইয়াৰ শীৰ্ষ কাৰ্যবাহীসকলৰ বিৰুদ্ধে ১০ বিলিয়ন ডলাৰৰ গোচৰ তৰে।
হাউছ অভাৰচাইট কমিটীয়ে এপষ্টেইনৰ ঘৰৰ পৰাই কিতাপখন লাভ কৰে। সোমবাৰে হাউছ অভাৰচাইট কমিটীৰ ডেম’ক্ৰেট সদস্যসকলে ইয়াৰ ফটো প্ৰকাশ কৰি ৰাষ্ট্ৰপতিয়ে মিছা কথা কোৱা বুলি দাবী কৰে।
ডেম’ক্ৰেটসকলে ছ’চিয়েল মিডিয়া এক্সত এটা পোষ্টত লিখিছে, “এইয়া এপষ্টেইনৰ জন্মদিনত ট্ৰাম্পৰ বাৰ্তা;ৰাষ্ট্ৰপতিগৰাকীয়ে দাবী কৰিছে যে ইয়াৰ অস্তিত্ব নাই।”
সোমবাৰে ৰিপাব্লিকান নেতৃত্বাধীন হাউছ অভাৰচাইট কমিটীৰ শীৰ্ষ ডেম’ক্ৰেট ৰবাৰ্ট গাৰ্চিয়াই কয় যে, “এতিয়া আমি জানিব পাৰিছো যে ড’নাল্ড ট্ৰাম্পে মিছা কথা কৈছিল আৰু সত্য লুকুৱাবলৈ তেওঁ যিমান পাৰে সকলো কৰিছিল।”
ট্ৰাম্পৰ স্বাক্ষৰিত এই টোকাটোত কেইবাটাও বাক্য সন্নিবিষ্ট কৰা হৈছে। শেষৰ বাক্যটোত লিখা আছে: “জন্মদিনৰ শুভেচ্ছা—আৰু প্ৰতিদিনেই হওক আন এক আচৰিত গোপনীয়তা।”
এক্সত নোটখনৰ ফটো মুকলি কৰি কমিটীৰ ডেম’ক্ৰেটসকলে এপষ্টেইনৰ নথি-পত্ৰ মুকলি কৰাৰ দাবী জনায়। কিতাপখনৰ লগতে সাংসদসকলে ২০০৭ চনত এপষ্টেইন আৰু ফ্ল’ৰিডাৰ দক্ষিণ জিলাৰ এটৰ্নীৰ কাৰ্যালয়ৰ ফেডাৰেল প্ৰচিকিউটৰৰ মাজত হোৱা চুক্তিও প্ৰকাশ কৰে। ইয়াৰ উপৰিও প্ৰায় ৩০ বছৰীয়া তেওঁৰ ব্যক্তিগত ঠিকনা বহীও মুকলি কৰা হৈছে।
ট্ৰাম্প আৰু এপষ্টেইন বহু বছৰ ধৰি বন্ধুত্বপূৰ্ণ আছিল। কিন্তু ৰাষ্ট্ৰপতিগৰাকীয়ে কয় যে ২০০০ চনৰ আৰম্ভণিতে হোৱা বিৰোধৰ পিছত তেওঁলোক পৃথক হৈছিল। ২০০৬ চনত ফ্ল’ৰিডাত প্ৰথমবাৰৰ বাবে যৌন সম্পৰ্কত প্ৰলোভিত কৰাৰ অভিযোগ উত্থাপন হৈছিল এপষ্টেইনৰ বিৰুদ্ধে। ২০১৯ চনত বিচাৰৰ বাবে অপেক্ষা কৰি থকাৰ সময়তে তেওঁৰ মৃত্যু হয়।
