ছুইডেনত মাত্ৰ ছমাহৰ ভিতৰতে এটা সফল ষ্টাৰ্টআপ গঢ়ি তুলি ভাৰতীয় উদ্যোগী অভিজিৎ নাগ বালাসুব্ৰমণ্যমে সকলোৰে দৃষ্টি আকৰ্ষণ কৰিছিল। খাদ্য সুৰক্ষাৰ দিশত কাম কৰা তেওঁৰ এই প্ৰতিষ্ঠানে স্থানীয় লোকৰ বাবে সংস্থাপনৰ সুযোগো সৃষ্টি কৰিছিল। কিন্তু অতি দুখৰ বিষয় যে মাত্ৰ এঘাৰ মাহৰ ভিতৰতে তেওঁ নিজৰ ব্যৱসায় বিক্ৰী কৰি ভাৰতলৈ উভতি আহিবলৈ বাধ্য হৈছে। ইয়াৰ আঁৰত ছুইডেনৰ প্ৰব্ৰজন বিভাগৰ কঠোৰ নীতি আৰু বিদেশীসকলৰ প্ৰতি থকা বৈষম্যমূলক মনোভাৱক জগৰীয়া কৰা হৈছে। ছুইডেন চৰকাৰে শেহতীয়াকৈ নাগৰিকত্ব আৰু ভিছাৰ নিয়মসমূহ অধিক কঠোৰ কৰি তোলাৰ ফলতে এনে পৰিস্থিতিৰ সৃষ্টি হোৱা বুলি জানিব পৰা গৈছে।
অভিজিতে ছ’চিয়েল মিডিয়া লিংকডইনৰ এটা পোষ্টৰ জৰিয়তে নিজৰ দুখ আৰু ক্ষোভ প্ৰকাশ কৰিছে। তেওঁ স্পষ্টকৈ কয় যে তেওঁ নিজৰ ইচ্ছাত দেশখন এৰি অহা নাই, বৰঞ্চ ছুইডেনৰ প্ৰব্ৰজন সংস্থা মাইগ্ৰেচনছভাৰকেটৰ অযোগ্যতা আৰু শত্ৰুতামূলক আচৰণৰ বাবেহে তেওঁ এই সিদ্ধান্ত ল’বলৈ বাধ্য হৈছে। তেওঁৰ মতে এই প্ৰতিষ্ঠানটোৱে আৱাস আৰু কৰ্ম অনুমতিৰ ক্ষেত্ৰত যিবোৰ বাধাৰ সৃষ্টি কৰিছিল, সেয়া এজন বিদেশী উদ্যোগীৰ বাবে অতি অপমানজনক আছিল। হাইড্ৰ’ স্পেচ ছুইডেন এ বি নামৰ তেওঁৰ কোম্পানীটোৱে স্থানীয় গ্ৰাহকৰ পৰা যথেষ্ট সঁহাৰি লাভ কৰিছিল যদিও চৰকাৰী মেৰপেঁচত তেওঁৰ সপোনবোৰ থানবান হৈ পৰিল।
প্ৰব্ৰজন বিভাগৰ বিষয়াসকলৰ বিৰুদ্ধে গুৰুতৰ অভিযোগ উত্থাপন কৰি অভিজিতে কয় যে তেওঁলোকৰ কোনো ব্যৱসায়িক জ্ঞান নাই। নথিপত্ৰ পৰীক্ষাৰ নামত তেওঁক হাৰাশাস্তি কৰা হৈছিল আৰু কোনো ধৰণৰ স্পষ্ট নিৰ্দেশনা দিয়া হোৱ নাছিল। তেওঁৰ আবেদন প্ৰত্যাখ্যান কৰাৰ কাৰণসমূহো বাৰে বাৰে সলনি কৰা হৈছিল। ছুইডেনে নিজকে বিশ্বৰ প্ৰতিভাৰ বাবে এখন মৰমিয়াল দেশ বুলি প্ৰচাৰ কৰিলেও বাস্তৱত ইয়াৰ সম্পূৰ্ণ ওলোটা ছবিহে তেওঁ প্ৰত্যক্ষ কৰিলে। এই সমগ্ৰ প্ৰক্ৰিয়াটোৱে তেওঁক মানসিকভাৱে ইমানেই ভাগৰুৱা কৰি তুলিছিল যে তেওঁৰ স্বাস্থ্যৰো অৱনতি ঘটিছিল।
বৰ্তমান ছুইডেনত নিৰ্বাচনৰ প্ৰাকক্ষণত অনুপ্ৰৱেশকাৰী বিৰোধী আৱেগ বৃদ্ধি পাইছে। চৰকাৰে নাগৰিকত্বৰ বাবে থকা সময়সীমা পাঁচ বছৰৰ পৰা আঠ বছৰলৈ বৃদ্ধি কৰিছে আৰু ভাষাৰ পৰীক্ষা বাধ্যতামূলক কৰিছে। এনে এক বিৰূপ পৰিৱেশত এজন বিদেশী উদ্যোগী হিচাপে আইনী যুঁজ চলাই যোৱাৰ শক্তি বা ইচ্ছা অভিজিতৰ বাকী থকা নাই। সেইবাবেই তেওঁ মানসিক শান্তিৰ বাবে নিজৰ ব্যৱসায় বিক্ৰী কৰি ভাৰতলৈ উভতি অহাৰ সিদ্ধান্ত ল’লে। এই ঘটনাই এতিয়া আন্তঃৰাষ্ট্ৰীয় পৰ্যায়ত ছুইডেনৰ ব্যৱসায়িক পৰিৱেশৰ ওপৰত এক ডাঙৰ প্ৰশ্নচিহ্ন থিয় কৰাইছে।
