মছলাৰ ৰজা আৰু এমডিএইচ মছলাৰ স্বত্বাধিকাৰী মহাশয় ধৰ্মপাল গুলাটিৰ মৃত্যু হৈছে। মৃত্যুৰ সময়ত তেওঁৰ বয়স হৈছিল ৯৮ বছৰ।
হৃদযন্ত্ৰ বিফল হোৱাৰ বাবেই আজি ৰাতিপুৱা ৫.৩৮ বজাত তেওঁৰ মৃত্যু ঘটা বুলি জানিব পৰা গৈছে।
কিছু দিন পূৰ্বে ধৰ্মপাল গুলাটী ক’ভিডত আক্ৰান্ত হৈছিল। কিন্তু তেওঁ ক’ৰ’নাক পৰাস্ত কৰি সুস্থ হৈ ঘৰলৈ উভতিছিল।
কিন্তু এতিয়া হৃদৰোগত আক্ৰান্ত হৈ তেওঁৰ মৃত্যু হয়।
ব্যৱসায় আৰু উদ্যোগ ক্ষেত্ৰত আগবঢ়োৱা বিশেষ অৱদানৰ বাবে যোৱা বছৰ তেওঁক ৰাষ্ট্ৰপতি ৰামনাথ কোবিন্দে পদ্মভূষণ বঁটাৰে সন্মানিত কৰিছিল।
উল্লেখ্য যে মহাশয় ধৰ্মপাল গুলাটীৰ জন্ম হৈছিল ১৯২৩ চনত পাকিস্তানত। তেওঁৰ পৰিয়ালৰ অৰ্থনৈতিক অৱস্থা খুব ভাল নাছিল।
পঢ়াৰ ক্ষেত্ৰতো ধৰ্মপাল দুৰ্বল আছিল আৰু পঞ্চম শ্ৰেণীত অনুত্তীৰ্ণ হৈছিল। ইয়াৰ পিছৰে পৰা তেওঁ স্কুল যাবলৈ এৰি দিয়ে।
স্কুল এৰাৰ পিছৰ পৰা ধৰ্মপালক পিতৃয়ে কাম শিকিবলৈ দোকানলৈ পঠোৱা আৰম্ভ কৰিছিল।
কিন্তু তেওঁৰ কোনো কামতে মন বহা নাছিল আৰু ১৫ বছৰ বয়সলৈকে কেইবাটাও কাম সলনি কৰিছিল।
ছিয়ালকোট ৰঙা চিলিৰ বাবে বিখ্যাত আছিল, সেয়ে তেওঁক দেউতাকে সৰু দোকান এখন খুলি দিছিল। ক্ৰমান্বয়ে দোকানখন ভালদৰে চলিবলৈ আৰম্ভ কৰিলে।
কিন্তু ১৯৪৭ চনত স্বাধীনতা লাভ কৰাৰ পিছত ছিয়ালকোট পাকিস্তানৰ অংশ হৈ পৰে। ইয়াৰ পিছত ধৰ্মপাল আৰু তেওঁৰ পৰিয়ালে পাকিস্তান এৰি দিল্লীলৈ আহে।
উল্লেখ্য যে পাকিস্তান এৰি দিল্লীলৈ অহাৰ সময়ত ধৰ্মপালৰ হাতত আছিল মাত্ৰ ১৫০০টকা। ইয়াৰে ৬৫০ টকাত এখন ঘোঁৰাৰ গাড়ী কিনি ষ্টেশ্যনত চলোৱা আৰম্ভ কৰে।
কিছুদিন পিছত ঘোঁৰা গাড়ীখন নিজৰ ভায়েকক দি ধৰ্মপালে কৰোলবাগৰ আজমল খান ৰোডত মছলা বিক্ৰী আৰম্ভ কৰে।
এই দোকানখনৰ জনপ্ৰিয়তা বৃদ্ধি পোৱাত গুলাটী পৰিয়ালে মছলাৰ প্ৰথমটো ফেক্টৰি ১৯৫৯ চনত ৰাজধানী দিল্লীৰ কীৰ্তি নগৰত স্থাপন কৰিছিল।
মাত্ৰ ১৫০০ টকা পকেটত লৈ পাকিস্তানৰ পৰা ভাৰতলৈ অহা এইগৰাকী ব্যক্তিয়ে নিজৰ কৰ্মৰে পিছলৈ ৫৪০০ কোটি টকাৰ সম্পত্তিৰ অধিকাৰী হৈছিল।
আৰু ইয়াৰ পিছৰে পৰা ভাৰতৰ লগতে বিদেশতো এম ডি এইচ মছলাৰ সাফল্য তথা জনপ্ৰিয়তা বৃদ্ধি পায়।
