ধুবুৰী লোকসভা সমষ্টিৰ সাংসদ তথা এ আই য়ু ডি এফ দলৰ মুৰব্বী বদৰুদ্দিন আজমলে সোমবাৰে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰক তীব্ৰ ভাষাৰে সমালোচনা কৰে। আগৰ দৰে এইবাৰো মোদী চৰকাৰে অসমৰ বান সাহায্য প্ৰদানক লৈ পক্ষপাতিত্ব কৰিছে বুলিও সাংসদগৰাকীয়ে মন্তব্য কৰে।
আজমলে মোদী চৰকাৰৰ অসম প্ৰীতিৰ স্বৰূপ উদঙাই কয় যে এই পৰ্যন্ত গুজৰাটৰ মাত্ৰ দুখন জিলা বানৰ কৱলত পৰিছে আৰু লগে লগে কেন্দ্ৰীয় চৰকাৰে ৫০০ কোটি টকা মুকলি কৰি দিছে। কিন্তু অসমৰ ৩২খন জিলাৰ লাখ লাখ মানুহ ভয়াবহ বানৰ কৱলত পৰিছে আৰু কেন্দ্ৰীয় চৰকাৰে অসমক গুজৰাটৰ তুলনাত দিছে সামান্য পৰিমানৰ আৰ্থিক সাহায্য।
‘অসমৰ মানুহেও নৰেন্দ্ৰ মোদী নেতৃত্বাধীন চৰকাৰ গঠনৰ বাবে ভোটদান কৰিছিল। কিন্তু যোৱা ১৫-২০ দিন ধৰি অসমৰ মানুহে কেনেদৰে আছে তাৰ বিষয়ে প্ৰধান মন্ত্ৰীয়ে হওঁক বা গৃহ মন্ত্ৰীয়ে হওঁক কোনো এজনেই ইয়ালৈ আহি খবৰ লোৱাটো প্ৰয়োজনীয় বুলি নাভাবিলে’। এই মন্তব্য আজমলৰ।
আনহাতে নিৰ্বাচনৰ সময়ত নৰেন্দ্ৰ মোদীৰ লগতে অমিত শ্বাহে ঘনে ঘনে অসমলৈ আহিছিল কিন্তু আজি অসমৰ লাখ লাখ লোকে নিজৰ ঘৰ-বাৰি এৰি আশ্ৰয় শিবিৰত আছে কিন্তু ইয়ালৈ অহাৰ বিপৰীতে ফোনেৰেই নিজৰ দায়িত্ব সামৰা কাৰ্যকো সাংসদ আজমলে কঠোৰ ভাষাৰে নিন্দা কৰে।
ইফালে আগন্তুক দিনত সদনৰ মজিয়াত অসমৰ বানপানী সমস্যাক ৰাষ্ট্ৰীয় সমস্যা ৰূপে ঘোষণা কৰাৰ বাবেও দাবী উত্থাপন কৰিব বুলি সাংসদ গৰাকীয়ে সংবাদ মাধ্যমৰ জৰিয়তে ৰাজ্যবাসীক জানিবলৈ দিয়ে।
উল্লেখ্য যে সোমবাৰে বদৰুদ্দিন আজমলে দক্ষিণ শালমাৰা জিলাৰ বানাক্ৰান্ত অঞ্চল সমূহ পৰিদৰ্শন কৰে। এই পৰিদৰ্শনৰ সময়তে আজমল ফাউণ্ডেশ্যনৰ হৈ ৩০০টা পৰিয়ালৰ মাজত সাহায্য সামগ্ৰী বিতৰণ কৰে।
