প্ৰৱঞ্চক বিশাল ফুকনৰ পিছত এইবাৰ আন এজন অনলাইন প্ৰৱঞ্চক ৰঞ্জিত কাকতিক ট্ৰেডিং এফএক্সৰ নামত শ শ লোকক প্ৰৱঞ্চনা কৰাৰ অভিযোগত ডিব্ৰুগড় আৰক্ষীয়ে গ্ৰেপ্তাৰ কৰিছে। ৰঞ্জিত কাকতি বৰ্তমান আৰক্ষীৰ জিম্মাত আছে আৰু বুধবাৰেই তেওঁক ডিব্ৰুগড় আদালতত হাজিৰ কৰোৱা হ’ব পাৰে।
আৰক্ষীৰ এগৰাকী জ্যেষ্ঠ বিষয়াই কয়, “আমি এজন ৰঞ্জিত কাকতিক তেওঁৰ বিৰুদ্ধে অভিযোগ পোৱাৰ পিছত উঠাই আনিছো। তেওঁক গ্ৰেপ্তাৰ কৰা হৈছে আৰু আমি তেওঁক ট্ৰেডিং এফ এক্স অনলাইন জালিয়াতিৰ সৈতে জড়িত থকাৰ সন্দৰ্ভত জেৰা আৰম্ভ কৰিছো।”
গায়ক বিতুৰাজ চেতিয়াৰ এটা ফেচবুক পোষ্ট অনুসৰি, ‘’ডিব্ৰুগড়ৰ জিবন ফুকন নগৰ নিবাসী ৰঞ্জিত কাকতি, সম্পূৰ্ণ এক প্ৰৱঞ্চনামূলক ব্যক্তিত্ব যিয়ে সমগ্ৰ অসমতে Trading FX প্ৰৱৰ্তন কৰিছে। এই কোম্পানীত বিনিয়োগ কৰা সমগ্ৰ লোকৰ পৰা ভুল আৰু মাৰাত্মক আশা দি কোটি কোটি টকা সংগ্ৰহ কৰি তেওঁ সকলো সম্প্ৰদায়ৰ বহু লোকক লুটপাত কৰিছে। তেওঁ এক প্ৰকাৰৰ দানৱ যিয়ে দৰিদ্ৰতাৰ তলৰ মানুহকো এৰি দিয়া নাই, তেওঁলোকক ভুল আশা আৰু সপোন দেখুৱাই প্ৰায়েই বিলাসী জীৱন যাপন কৰিছে। নিৰীহ লোকৰ ধন ধ্বংস তথা লুণ্ঠন কৰি তেওঁ নিজৰ কোটি টকীয়া দুটা ঘৰ সাজিছে। তেওঁক কঠোৰ শাস্তি দিব লাগে আৰু সকলো ধন ৰাইজক ঘূৰাই দিব লাগে। তেওঁ সমাজৰ বাবে এজন দানৱ যি শান্তিপূৰ্ণভাৱে বসবাস কৰাৰ যোগ্য নহয়। তেওঁ সমাজৰ বাবে অভিশাপ।
এইটো ###অসম আৰক্ষী##লৈ অনুৰোধ যে অতি সোনকালে এই দোষীৰ বিৰুদ্ধে তাৎক্ষণিক ব্যৱস্থা গ্ৰহণ কৰক আৰু নিৰীহ ৰাইজে ন্যায় লাভ কৰক। প্ৰতিজন ব্যক্তিয়ে নিজৰ ধন ঘূৰাই পাব লাগে। আমি আমাৰ আইন-শৃংখলাক বিশ্বাস কৰোঁ।‘’
লগতে পঢ়কঃ চিনেমাৰ নায়িকা কৰাৰ নামত হোটেলত মহিলাক ধৰ্ষণ? দক্ষিণৰ জনপ্ৰিয় তাৰকাৰ বিৰুদ্ধে অভিযোগ!
সূত্ৰ অনুসৰি, ট্ৰেডিং এফএক্সে ডিব্ৰুগড়ৰ বহু লোকক লক্ষ্য কৰি লৈছিল আৰু ৰাইজে ৬ মাহৰ ভিতৰত বিনিয়োগ তিনিগুণ কৰাৰ নামত লাখ লাখ টকা বিনিয়োগ কৰিছিল।
আনহাতে, ইতিমধ্যে গ্ৰেপ্তাৰ হোৱা প্ৰৱঞ্চক বিশাল ফুকন ডিব্ৰুগড় আৰক্ষীৰ জিম্মাত আছে আৰু বিগত কেইবা ঘণ্টা ধৰি আৰক্ষীয়ে জেৰা অব্যাহত ৰাখিছে।
ইপিনে, বিশাল ফুকনৰ অনলাইন বিনিয়োগ কেলেংকাৰিৰ সৈতে জড়িত বুলি অভিযোগ উত্থাপন হোৱা অসমীয়া চিনেমাৰ অভিনেত্ৰী চুমি বৰা বিশাল ফুকনক গ্ৰেপ্তাৰ কৰাৰ পিছতে পলাতক হৈ আছে। তেওঁৰ ফোনো চুইচ অফ হৈ আছে।
ডিব্ৰুগড় আৰক্ষী থানাত চুমি বৰাৰ জ্যেষ্ঠ ভাতৃক সোধা-পোছাৰ বাবে মাতি আনিছে আৰক্ষীয়ে।
ডিব্ৰুগড়ৰ প্ৰভাঞ্জলি এপাৰ্টমেণ্টত থকা ফুকনক আটক কৰাৰ পিছতে আৰক্ষীৰ অভিযান চলে। এই অভিযানৰ সময়ত আৰক্ষীয়ে বিদেশী মুদ্ৰা (ডিৰহাম), আইফোন, আৰু অন্যান্য নথি-পত্ৰ জব্দ কৰে।
লগতে পঢ়কঃ প্ৰয়োজন নহ’ব চশমাৰ! ভাৰতত অনুমোদন লাভ কৰিলে অভিনৱ আই ড্ৰপ PresVuয়ে
বিশাল ফুকনক হাজৰিকা উপাধিৰ আন এজন ব্যক্তিৰ সৈতে পুৱাৰ ভাগত উঠাই অনা হৈছিল। আৰক্ষীয়ে এপাৰ্টমেণ্টটোৰ নিৰাপত্তাৰক্ষী আৰু ফুকনৰ চালককো জেৰাৰ বাবে মাতিছে।
আৰক্ষীৰ সূত্ৰ অনুসৰি এই গোচৰৰ সন্দৰ্ভত অসমৰ বিভিন্ন ঠাইত অভিযান আৰম্ভ কৰা হৈছে কিয়নো আৰক্ষীয়ে আন লোকো জড়িত হোৱাৰ সন্দেহ কৰিছে।
ডিব্ৰুগড় আৰক্ষীয়ে অনিয়ন্ত্ৰিত জমা আঁচনি নিষিদ্ধকৰণ আইন, ২০১৯কে ধৰি বিভিন্ন ধাৰাৰ অধীনত ৩৫২/২৪ নম্বৰত এটা গোচৰ ৰুজু কৰিছে।
সূত্ৰসমূহে জনোৱা মতে, চুমি বৰাৰ স্বামীয়ে উজনি অসমৰ চাহ খণ্ডতো বিনিয়োগ কৰিছে।
লগতে পঢ়কঃ বিজেপিৰ সৈতে ‘মতানৈক্য’ স্বীকাৰ আৰএছএছৰ; সংঘৰ দাবী এয়া ‘পৰিয়ালৰ সমস্যা’
ইপিনে, ডিব্ৰুগড় আৰক্ষীয়ে অনলাইন প্ৰৱঞ্চকৰ বিৰুদ্ধে ব্যাপক অভিযান আৰম্ভ কৰিছে আৰু এতিয়ালৈকে ইয়াৰে বহুকেইটাক আৰক্ষীয়ে আটক কৰিছে।
