তিৰুপতি মন্দিৰৰ প্ৰসাদী লাড্ডুক লৈ ব্যাপক চৰ্চা। লেবৰ ৰিপৰ্ট অনুসৰি লাড়ুত গৰুৰ চৰ্বি আৰু মাছৰ তেল পোৱা গৈছে! সকলো সমস্যাৰ মূলতে আছে মন্দিৰত ঘিউ যোগান ধৰা কোম্পানীটো। কাৰণ লাডুত মিহলি কৰা সকলো বস্তু ঘিউৰ জৰিয়তে প্ৰস্তুত কৰা হয়। অভিযোগৰ আঙুলি ঘিউ যোগানকাৰী কোম্পানীটোৰ ফালে। এই সন্দৰ্ভত ছ’চিয়েল মিডিয়াতো উৰাবাতৰি বিয়পি পৰিছে। শুনা গ’ল যে আমুলৰ তিৰুমালা ট্ৰাষ্টৰ সৈতেও চুক্তি আছে। অৱশ্যে অমুলে এই অভিযোগ অস্বীকাৰ কৰে।
আমুলৰ বক্তব্যত স্পষ্ট কৰি দিয়া হৈছে, “তিৰুমালা তিৰুপতি দেৱস্থানলৈ আমি কেতিয়াও ঘিউ যোগান ধৰা নাই। একে সময়তে আপোনালোকক জনাব বিচাৰিছো যে আমুলৰ ঘিউ কেৱল উচ্চমানৰ গাখীৰৰ চৰ্বিৰ পৰা তৈয়াৰ কৰা হয়। আমাৰ ডেইৰীত উৎপাদিত ঘিউ এফ এছ এছ এ আইৰ দ্বাৰা বহু পদক্ষেপ পৰীক্ষা কৰা হয়।আমুল ঘিউ ৫০ বছৰতকৈও অধিক সময় ধৰি ভাৰতৰ আটাইতকৈ বিশ্বাসযোগ্য ঘিউ। এইদৰেই আমি আমাৰ জনসাধাৰণৰ আস্থা বজাই ৰাখিব বিচাৰো।”
উল্লেখযোগ্য যে কৰ্ণাটকৰ বিখ্যাত গাখীৰ আৰু গাখীৰৰ সামগ্ৰীৰ কোম্পানী নন্দিনীয়ে দীৰ্ঘদিন ধৰি তিৰুপতি মন্দিৰত ঘিউ যোগান ধৰি আহিছে। যোৱা বছৰ বিখ্যাত নন্দিনী ব্ৰেণ্ডৰ ঘিউৰ লাডু বনোৱা বন্ধ কৰি দিয়া হৈছিল। তেতিয়াই এই সিদ্ধান্তক লৈ প্ৰশ্ন উত্থাপন হৈছিল। বিগত বৰ্ষৰ আগষ্ট মাহত তিৰুপতি বালাজী মন্দিৰত আৰু নন্দিনী ব্ৰেণ্ডৰ ঘিউ যোগান ধৰা নহ’ব বুলি খবৰ ওলাইছিল। কৰ্ণাটক মিল্ক ফেডাৰেচনৰ অধ্যক্ষই অৱগত কৰে যে তেওঁলোকৰ বাবে লাডুৰ বাবে ঘিউ যোগান ধৰাটো সম্ভৱ নহ’ব।
তেতিয়াই ঘিউ যোগানৰ বাবে নিবিদা আহ্বান কৰা হৈছিল। প্ৰসংগক্ৰমে প্ৰতি বছৰে ৫ লাখ কেজি ঘিউ ক্ৰয় কৰে মন্দিৰে। প্ৰতিদিনে মন্দিৰত ৩.৫ লাখ লাড়ু তৈয়াৰ কৰা হয়। প্ৰতিটোৰ দাম ৪০ টকালৈ নামি যায়। ইয়াৰ উপৰিও দৈনিক ৪০০-৫০০ কেজি ঘিউ, ৭৫০ কেজি কাজু, ৫০০ কিচমিচ, ২০০ কেজি ইলাচিৰ প্ৰয়োজন হয়। যদিও প্ৰতি ৬ মাহৰ মূৰে মূৰে নিবিদা মাতিছিল, তথাপিও ১৫ বছৰ ধৰি নন্দিনী ঘিউৰে লাড়ু তৈয়াৰ কৰা হৈছিল। কিন্তু দাম বৃদ্ধি হোৱাৰ কাৰণ উল্লেখ কৰি জগনমোহন ৰেড্ডী নেতৃত্বাধীন চৰকাৰে ইয়াৰ ব্যৱহাৰ বন্ধ কৰাৰ সিদ্ধান্ত লয়। তাৰ পিছত ঘিউৰ যোগান আন কেইবাটাও কোম্পানীলৈ হস্তান্তৰ কৰা হয়। অভিযোগসমূহ সেই কোম্পানীসমূহৰ প্ৰতি নিৰ্দেশিত। এই পৰিবেশতেই ছচিয়েল মিডিয়াত আমুলৰ নাম বিয়পি পৰিল। কিন্তু আমুলে জনাইছিল যে তেওঁলোকে কেতিয়াও তিৰুপতি মন্দিৰলৈ লাড়ু যোগান ধৰা নাছিল।
