বঙাইগাঁও জিলাৰ ৩৪ নং অভয়াপুৰী উত্তৰ বিধান সভা সমষ্টি তথা বিধায়ক আব্দুল হাই নাগৰিৰ সমষ্টিৰ অন্তৰ্গত শৌলমাৰীত বিধায়ক তথা চৰকাৰৰ প্ৰতি ৰাইজৰ আস্থা নাইকীয়া হৈছে।
স্বাধীনতাৰ আজি ৭২ বছৰ পাৰ হৈ যোৱাৰ পাছতো শৌলমাৰীৰ পোকালাগী নদীৰ ওপৰত আজিকোপতি নহ’ল এখন কাঠৰ দলং। বিভিন্ন সময়ত বিভিন্ন ৰাজনৈতিক দলে চৰকাৰ গঠন কৰিছে, বিভিন্ন আঁচনি ৰূপায়ন কৰিছে কিন্তু কোনো আঁচনিৰ অধীনত নপৰিল শৌলমাৰীৰ এই খন দলং।
বিগত সময়ত কংগ্ৰেছৰ দীৰ্ঘদিনীয়া শাসন কালত কংগ্ৰেছ চৰকাৰৰ সু-দৃষ্টি নপৰিল এই গাওঁখনলৈ। এইটো সমষ্টিৰ পৰা একেৰাহে এ জি পি দলৰ চাৰি বাৰকৈ বিধায়ক হিচাপে নিৰ্বাচিত হৈছিল ভূপেন ৰায়।
সুদীৰ্ঘ ২০ টা বছৰ বুকু ভৰা আশা লৈ বিধায়ক হিচাপে নিৰ্বাচিত কৰিছিল ভূপেন ৰায়ক কিন্তু আশানুৰূপ ফল নাপালে শৌলমাৰীবাসী ৰাইজে। বিভিন্ন সময়ত ভূপেন ৰায়ক এই বিষয়ে অৱগত কৰা হৈছিল যদিও ভূপেন ৰায়ে “হব বাৰু চাম বাৰু দিম বাৰু’ কৈ সান্তনা দিছিল গাঁৱৰ ৰাইজক।
একেৰাহে চাৰিবাৰ বিধায়ক হোৱাৰ পাছতো যেতিয়া দলং খন নহ’ল তেতিয়া ৰাইজৰ বিকল্প চিন্তাৰ ফলত সমষ্টিটোত কংগ্ৰেছ দলৰ পৰা বিধায়ক হিচাপে নিৰ্বাচিত হৈ বৰ্তমান বিধায়ক হিচাপে কাৰ্য নিৰ্বাহ কৰি আছে আব্দুল হাই নাগৰি।
জানিব পৰা মতে, নাগৰিকো বাৰম্বাৰ অনুৰোধ জনাই আহিছে এই দলংখনৰ বাবে কিন্তু ৰাইজৰ কথাত কাণসাৰ নিদিয়াৰ অভিযোগ উত্থাপন হৈছে অঞ্চলব্যাপী। উল্লেখ্য যে এই খন সাকোৰ ওপৰেদি প্ৰায় ১০/১২ খন বিদ্যালয়-মহাবিদ্যালয়ৰ ছাত্ৰ ছাত্ৰী অহা যোৱা কৰাৰ লগতে প্ৰায় ২৫-৩০ খন গাঁৱৰ ৰাইজে অনৱৰতে চলাচল কৰিব লগা হয়।
সাঁকোখনৰ সিপাৰত এখন সাপ্তহিক বজাৰো আছে যাৰ বাবে ব্যৱসায়ী সকলে মাল বস্তু পাৰাপাৰ কৰাত এক প্ৰকাৰ যমৰ যাতনাত ভুগিব লগা হৈছে।
বাৰিষা কালত নদীৰ বাঢ়নী পানীয়ে দলং খন যেতিয়া উঠাই নিয়ে তেতিয়া দুয়োপাৰৰ ৰাইজৰ মাজত সম্পূৰ্ণ যাতায়ত বিচ্ছিন্ন হয় আৰু বিদ্যালয়লৈ যাব নোৱাৰে ছাত্ৰ-ছাত্ৰীসকল। প্ৰতি বছৰে সাঁকোখন ৰাইজৰ গাঁঠিৰ ধন ব্যয় কৰি নিৰ্মাণ কৰা হয়।
দলং খন প্ৰতি বছৰ নিৰ্মাণ কৰোতে ১-১৫০ লাখ টকা খৰছ হয় যি টকা সমূহ শৌলমাৰীবাসী ৰাইজে ভৰিব লগা হয়। এই বছৰ দলং খন নতুনকৈ নিৰ্মাণ কৰোতে আনুমানিক ১ লাখ ২০ হাজাৰৰ ওপৰত খৰচ হোৱা বুলি জানিব দিয়ে স্থানীয় ৰাইজে।
দলংখনেৰে জীৱনটো হাতৰ মুঠিত লৈ বিপদ সংকুল ভাবে যাতায়ত কৰিব লগা হয় কণ কণ শিশু তথা ছাত্ৰ-ছাত্ৰী সকলে যাৰ বাবে বৰকৈ চিন্তিত হৈ পৰিছে অঞ্চলবাসী ৰাইজ।
শৌলমাৰী গাৱঁৰ পোকালাগী নদীৰ ওপৰত এখন কাঠৰ দলং হ’লেও নিৰ্মাণ কৰি দি এই যমৰ যাতনাৰ পৰা ৰক্ষা কৰাৰ বাবে ৰাজ্য চৰকাৰ তথা গড়কাপ্তানি মন্ত্ৰী ড০ হিমন্ত বিশ্ব শৰ্মাক ৰাইজে আহ্বান জনাইছে।
