এফবিআইৰ সঞ্চালক কাচ পেটেল বৰ্তমান এক ডাঙৰ বিতৰ্কৰ মাজত সোমাই পৰিছে। তেওঁ চৰকাৰী কামৰ দোহাই দি নিজৰ প্ৰেমিকাৰ সৈতে এক বিলাসী ভ্ৰমণ কৰাৰ গুৰুতৰ অভিযোগ উত্থাপন হৈছে, যাৰ বাবে এফবিআইৰ চৰকাৰী সম্পদৰ অপব্যৱহাৰক লৈ নতুনকৈ প্ৰশ্ন উঠিছে। নিউয়ৰ্ক টাইমছৰ এক প্ৰতিবেদন অনুসৰি, ৪৬ বছৰীয়া এফবিআই সঞ্চালক পেটেলে তেওঁৰ ২৭ বছৰীয়া প্ৰেমিকা এলেক্সিছ উইলকিন্সৰ সৈতে এফবিআইৰ চৰকাৰী বিমানেৰে ৱাশ্বিংটনৰ পৰা ফিলাডেলফিয়ালৈ এক সংগীতানুষ্ঠান চাবলৈ গৈছিল। তেওঁলোকে সেই একে নিশাই আকৌ উভতিও আহিছিল।
প্ৰতিবেদনত দাবী কৰা হৈছে তেওঁলোকে এটা অতি বিলাসী ব্যক্তিগত চুইটত বহি জৰ্জ ষ্ট্ৰেইট আৰু ক্ৰীছ ষ্টেপেলটনৰ সংগীতানুষ্ঠান উপভোগ কৰিছিল, যাৰ মূল্য আছিল প্ৰায় ৩৫,০০০ ৰ পৰা ৫০,০০০ ডলাৰ। তেওঁলোকৰ বাবে এফবিআইৰ বিমান কৰ্মচাৰী আৰু সুৰক্ষা কৰ্মীসকলে নিশা ১১ বজালৈকে অপেক্ষা কৰিবলগীয়া হৈছিল, যাৰ বাবে চৰকাৰী ধনৰ পৰা তেওঁলোকক অতিৰিক্ত সময়ৰ বাবে দৰমহাও দিবলগীয়া হৈছিল। এই সন্দৰ্ভত পেটেলে নিজে কোনো মন্তব্য কৰা নাই যদিও এফবিআইৰ মুখপাত্ৰই জনাইছে যে পেটেলৰ প্ৰেমিকা এলেক্সিছ তাত থকা শিল্পীসকলৰ আমন্ত্ৰিত অতিথিহে আছিল।
কাচ পেটেলৰ বিৰুদ্ধে চৰকাৰী সম্পদ ব্যৱহাৰ কৰি এনে ধৰণৰ ভ্ৰমণ কৰাৰ অভিযোগ এয়াই প্ৰথম নহয়। ইয়াৰ পূৰ্বে হাৱাইৰ পাৰ্ল হাৰ্বাৰত থকা ইউএছএছ এৰিজোনা স্মাৰকৰ ওচৰত এক বিশেষ স্নৰ্কেল ভ্ৰমণক লৈও তেওঁ তীব্ৰ সমালোচনাৰ সন্মুখীন হৈছিল। অৱশ্যে এফবিআইৰ মুখপাত্ৰ বেন উইলিয়ামছনে এই অভিযোগ নাকচ কৰি ছচিয়েল মিডিয়াত কয় যে একাংশ সংবাদ মাধ্যমে চৰকাৰী ভ্ৰমণক ভুলকৈ উপস্থাপন কৰিছে। তেওঁ স্পষ্ট কৰে যে ইণ্ডো-পেচিফিক কমাণ্ডৰ সেনা প্ৰধানৰ আমন্ত্ৰণ ৰক্ষা কৰিহে তেওঁ সামৰিক ঘাটিলৈ গৈছিল আৰু এয়া সম্পূৰ্ণ চৰকাৰী কাৰ্যসূচী আছিল।
ইয়াৰ উপৰিও পেটেলৰ ২০২৫ চনৰ জুলাই মাহৰ হাৱাই ভ্ৰমণক লৈও প্ৰশ্ন উঠিছে। এফবিআইৰ তৰফৰ পৰা কোৱা হৈছিল যে দেশৰ সুৰক্ষা আৰু অপৰাধ নিয়ন্ত্ৰণৰ সম্পৰ্কীয় বৈঠকৰ বাবেহে তেওঁ চৰকাৰীভাৱে তালৈ গৈছিল। কিন্তু সমালোচকসকলৰ মতে, দেশৰ সুৰক্ষাত গুৰুত্ব দিয়াৰ সলনি পেটেলে এনে ধৰণৰ বিতৰ্কিত কাম-কাজতহে ব্যস্ত থকা দেখা গৈছে। ইয়াৰ পূৰ্বে ইটালীৰ মিলন চহৰত অনুষ্ঠিত হোৱা শীতকালীন অলিম্পিকৰ সময়তো তেওঁক আমেৰিকাৰ হকী দলৰ সৈতে আনন্দ কৰা আৰু বিয়েৰ খোৱা দেখা গৈছিল, যদিও তেওঁ ইয়াক এক চাইবাৰ অপৰাধৰ তদন্তৰ অংশ বুলিহে অভিহিত কৰিছিল।
অৱশ্যে কাচ পেটেলে তেওঁৰ বিৰুদ্ধে উঠা সকলো অভিযোগ মিছা আৰু ৰাজনৈতিক উদ্দেশ্যপ্ৰণোদিত বুলি কৈ নিজৰ প্ৰতিৰক্ষা কৰিছে। তেওঁ স্পষ্ট কৰি দিছে যে তেওঁ নিজৰ ব্যক্তিগত ভ্ৰমণৰ খৰচ নিজৰ জেপৰ পৰা ভৰে আৰু প্ৰতিটো ভ্ৰমণৰ এক চৰকাৰী উদ্দেশ্য থাকে। তেওঁ চৰকাৰী সংবাদ মেলত কয় যে তেওঁ পূৰ্বৰ বিষয়াসকলতকৈ বহুত কম ছুটি লৈছে আৰু দেশৰ সুৰক্ষাৰ বাবে আটাইতকৈ প্ৰথম কাৰ্যালয়লৈ আহে আৰু আটাইতকৈ শেষতহে ওলাই যায়।
