ৰাজ্য চৰকাৰৰ বিত্ত, স্বাস্থ্য আৰু গড়কপ্তানি বিভাগৰ মন্ত্ৰী হিমন্ত বিশ্ব শৰ্মাৰ বিৰুদ্ধে উত্থাপিত হৈছে প্ৰতিবন্ধী আইন ২০১৬ ভংগ কৰাৰ গুৰুতৰ অভিযোগ। শণিবাৰে গুৱাহাটী প্ৰেছ ক্লাবত এক সংবাদমেল সম্বোধন কৰি এই অভিযোগ আনে প্ৰতিবন্ধী সুৰক্ষা সংস্থা অসমে।
সংস্থাৰ সাধাৰণ সম্পাদক নৃপেন মালাকাৰে কয় যে মন্ত্ৰী হিমন্ত বিশ্ব শৰ্মাই নিজৰ স্বাস্থ্য বিভাগত নিযুক্তি দিয়াৰ ক্ষেত্ৰত প্ৰতিবন্ধী আইন ২০১৬ ভংগ কৰাৰ লগতে ৰাজ্যৰ অন্যান্য বিয়াগোম বিভাগসমূহেও এই আইন ভংগ কৰিছে।
তেওঁ সংবাদমেলত জনোৱা অনুসৰি প্ৰতিবন্ধী আইন মতে ৰাজ্যৰ সকলো বিভাগৰ নিযুক্তিতে ৪% প্ৰতিবন্ধীসকলৰ বাবে সংৰক্ষণ কৰিব লাগে। কিন্তু ৰাজ্য চৰকাৰৰ বিয়াগোম বিভাগসমূহে সেই নীতি উলংঘা কৰা বুলি সংবাদমেলত গুৰুতৰ অভিযোগ তোলে মালাকাৰে।
তেওঁ কয় ‘শেহতীয়াভাৱে যোৱা ২৩ জানুৱাৰীৰ দিনা মন্ত্ৰী হিমন্ত বিশ্ব শৰ্মাৰ স্বাস্থ্য বিভাগে কেইবাটাও বিজ্ঞাপনৰ দ্বাৰা ৰাজ্যৰ চিকিৎসা মহাবিদ্যালয়সমূহৰ ৪০৩ টা পদ পূৰণৰ বাবে বিজ্ঞাপন প্ৰকাশ কৰিলে। কিন্তু আশ্চৰ্য্যজনকভাৱে প্ৰতিবন্ধীসকলৰ বাবে কোনোধৰণৰ সংৰক্ষণৰ ব্যৱস্থা নকৰিলে।‘
তেওঁ কয় ‘প্ৰতাপী মন্ত্ৰী হিমন্ত বিশ্ব শৰ্মাই আইনৰ সকলো কথা জানো বুলি দম্ভালি মাৰি ফুৰে। কিন্তু প্ৰতিবন্ধী আইনৰ ক্ষেত্ৰত তেওঁৰ জ্ঞান সীমিত সেই কথা বিজ্ঞাপনৰ দ্বাৰা আওপকীয়াকৈ প্ৰকাশ পাইছে। ৪০৩ টা পদত ৪ শতাংশ হিচাপত মুঠ ১৬ টা পদ প্ৰতিবন্ধীসকলৰ বাবে সংৰক্ষিত হ’ব লাগিছিল যদিও স্বাস্থ্য বিভাগে বিষয়টো এৰাই চলিলে।‘
আনহাতে, কিছুদিন পূৰ্বে প্ৰতিবন্ধীৰ সংৰক্ষণৰ বিষয় লৈ সংস্থাৰ সাধাৰণ সম্পাদকগৰাকী উচ্চ ন্যায়ালয়ৰ দ্বাৰস্থ হোৱা বুলি জানিবলৈ দি তেওঁ লগতে কয় ‘আমাৰ ৫৫৩/২০২০ লেখ আবেদনৰ ভিত্তিত কালি উচ্চ ন্যায়ালয়ে এক ৰায় প্ৰদান কৰে। য’ত স্পষ্টকৈ উল্লেখ আছে প্ৰতিবন্ধীসকলৰ বৰ্তমানো সকলো বিভাগৰ পদতে সংৰক্ষণ কৰাৰ ব্যৱস্থা আছে আৰু তেওঁলোকৰ এই পদসমূহত অধিকাৰ আছে। সেই অনুসৰি জলসিঞ্চন বিভাগৰ ৬৪৩ টা পদত প্ৰতিবন্ধীসকলে ২৬ টা পদ পাবলৈ সক্ষম হয়।‘
‘আদালতৰ ৰায়ে স্বাস্থ্য, শিক্ষাকে ধৰি ৰাজ্যৰ বিয়াগোম বিয়াগোম বিভাগসমূহে প্ৰতিবন্ধীসকলক বঞ্চনা আৰু প্ৰতাৰণা কৰি আহিছে, তাকেই প্ৰমাণ কৰিলে।‘ মালাকাৰে লগতে কয়।