তামিলনাডুৰ কৃষি মন্ত্ৰী এম আৰ কে পানীৰচেলভামৰ শেহতীয়া মন্তব্যক লৈ পুনৰ তীব্রতৰ হৈছে দুই ভাষা বনাম তিনি ভাষাৰ বিতর্ক৷ উত্তৰ ভাৰতৰ প্ৰব্ৰজিত শ্ৰমিকৰ ওপৰত তেওঁৰ মন্তব্যই বিশেষকৈ ৰাজ্যখনৰ আগন্তুক বিধানসভা নিৰ্বাচনৰ পূৰ্বে ৰাজনৈতিকভাৱে স্পৰ্শকাতৰ পৰিস্থিতিৰ সৃষ্টি কৰিছে।
তামিলনাডুৰ কৃষি মন্ত্ৰীগৰাকীয়ে কয় যে যিসকলে কেৱল ‘হিন্দী শিকিছে’ তেওঁলোকৰ কৰ্মসংস্থাপনৰ সুযোগ সীমিত, যাৰ বাবে তেওঁলোকে তামিলনাডুলৈ আহি সৰুসুৰা বা শ্ৰমভিত্তিক কাম কৰিবলৈ বাধ্য হৈছে। আনহাতে, তেওঁ দাবী কৰে যে তামিলনাডুৰ দ্বৈত ভাষা নীতি – তামিল আৰু ইংৰাজী – ৰাজ্যৰ ছাত্ৰ-ছাত্ৰীয়ে বিদেশত ভাল চাকৰি পোৱাৰ সুযোগ সৃষ্টি কৰিছে।
মন্ত্ৰীগৰাকীয়ে লগতে কয় যে বহু উত্তৰ ভাৰতীয় শ্ৰমিকে তামিলনাডুলৈ টেবুল চাফাই কৰ্মী, নিৰ্মাণ শ্ৰমিক বা ফুচকা বিক্ৰেতা হিচাপে কাম কৰিবলৈ আহে, কাৰণ তেওঁলোকৰ ভাষা দক্ষতা সীমিত।
তেওঁৰ মতে, ‘… উত্তৰ ভাৰতৰ বহু শ্ৰমিকে তামিলনাডুলৈ টেবুল চাফা কৰা, পানীপুৰী বিক্ৰেতা হিচাপে কাম কৰিবলৈ আহিছে কাৰণ তেওঁলোকে কেৱল হিন্দী শিকিছে।’ ইংৰাজী শিকাৰ বাবেই তামিলনাডুৰ ছাত্র-ছাত্রীসকলে আন্তর্জাতিক ক্ষেত্রত চাকৰিৰ সুযোগ পাইছে বিদেশত অধিক দৰমহা পোৱা কাম কৰি আছে বুলিও তেওঁ কয়৷
তামিলনাডুৰ মন্ত্ৰীগৰাকীৰ এই মন্তব্যক লৈ যেতিয়া বিতৰ্কৰ সৃষ্টি হয়, তেতিয়া শাসকীয় ডি এম কে-ই শীঘ্ৰে পৰিস্থিতি চম্ভালিবলৈ চেষ্টা কৰে। দলৰ মুখপাত্ৰ ডাঃ চৈয়দ হাফিজুল্লাই কয় যে সকলো বৈধ চাকৰিতে সন্মান আছে আৰু তামিলনাডুৰ জনসাধাৰণৰ হিন্দীভাষীসকলৰ প্ৰতি কোনো বিৰোধিতা নাই।
তেওঁৰ ভাষাত, “প্ৰতিটো বৈধ কামতে সন্মান থাকে… আমি ইয়াৰ বিৰোধী নহয়।” তেওঁ জোৰ দি কয় যে তামিলনাডুৰ “হিন্দী ভাষী বা তেওঁলোকৰ কামৰ প্ৰতি কোনো আপত্তি নাই।” তেওঁ লগতে কেন্দ্ৰৰ তিনিভাষাৰ নীতিক সমালোচনা কৰি তেওঁ কয় যে ইংৰাজী শিক্ষাই ৰাজ্যখনৰ উন্নয়ন আৰু বিশ্বমানৰ সুযোগ সৃষ্টিৰ ক্ষেত্ৰত উল্লেখযোগ্য ভূমিকা গ্ৰহণ কৰিছে।
তামিলনাডুত ভাষা সদায় আৱেগৰ বিষয় হৈ আহিছে। কেন্দ্ৰৰ তিনিভাষিক নীতি আৰু ৰাষ্ট্ৰীয় শিক্ষা নীতিৰ বিৰুদ্ধে ৰাজ্য চৰকাৰে দীৰ্ঘদিন ধৰি আপত্তি কৰি আহিছে। ৰাজ্যৰ মতে এই নীতি হিন্দী জাপি দিয়াৰ প্ৰয়াস। ঐতিহাসিকভাৱে দক্ষিণ ভাৰতৰ ৰাজ্যসমূহে কেন্দ্ৰৰ ভাষা নীতিৰ প্ৰতি সতৰ্কতা অৱলম্বন কৰি আহিছে আৰু বিগত সময়ত এই বিষয়ত বৃহৎ আন্দোলন চলি আহিছে।
ইপিনে, কেন্দ্রই কয় যে কোনো ভাষা জাপি দিয়াৰ প্রশ্ন নাই আৰু নতুন শিক্ষা নীতি কেৱল ভাষিক ভাৰসাম্য গঢ়ি তোলাৰ লক্ষ্যৰে অনা হৈছে৷
