অনিয়ন্ত্ৰিত জীৱন, অস্বাস্থ্যকৰ খাদ্যাভ্যাস, শৰীৰৰ প্ৰতি অৱহেলা, অত্যধিক মদ্যপান — এইবোৰ যদি আধুনিক জীৱনৰ সংগী হয়, তেন্তে তাৰ ফল নিশ্চয় ফেটি লিভাৰ বা লিভাৰ চিৰ’ছিছৰ দৰে ৰোগ।
বেছিভাগ ক্ষেত্ৰতে কিছুমান বেয়া অভ্যাস আৰু ভুলৰ বাবে যকৃতৰ ৰোগে শৰীৰত থিতাপি লয়। নিয়মিতভাৱে মদ খোৱাসকলৰ ফেটি লিভাৰ হোৱাৰ সম্ভাৱনা বেছি। গতিকে এই ৰোগৰ সৈতে মোকাবিলা কৰিব লাগিব জীৱনশৈলীৰ পৰিবৰ্তনৰ দ্বাৰা।
ফেটি লিভাৰৰ লক্ষণসমূহ জানিব পাৰিলে আগতীয়াকৈ সতৰ্ক হ’ব পাৰি। কি কি লক্ষণে এই ৰোগৰ ইংগিত দিয়ে জানোঁ আহক –
১) শৰীৰত বেয়া কলেষ্টেৰলৰ মাত্ৰা বাঢ়িলে বহু সময়ত ফেটি লিভাৰৰ সমস্যাৰ সৃষ্টি হয়। যদি বেয়া কলেষ্টেৰল বা এল ডি এলৰ মাত্ৰা বৃদ্ধি পাই থাকে তেন্তে লিভাৰৰ পৰীক্ষা কৰাটো জৰুৰী।
২) শালমন বাঢ়িবলৈ আৰম্ভ কৰিলে সচেতন হওক। যিকোনো বয়সতে শালমনৰ প্ৰতি সচেতন হওক। শালমনৰ অন্যতম কাৰণ হ’ল ফেটি লিভাৰ। গতিকে শালমন হ’লে এবাৰ লিভাৰৰ অৱস্থা পৰীক্ষা কৰক।
৩) শৰীৰত চৰ্বি বাঢ়িবলৈ আৰম্ভ কৰিছে নেকি? অলপতে ভাগৰুৱা অনুভৱ কৰে নেকি? এনে হ’লে ই ফেটি লিভাৰৰ লক্ষণ হ‘ব পাৰে।
৪) ফেটি লিভাৰৰ বাবে শৰীৰৰ পৰা প্ৰদূষক পদাৰ্থ ভালদৰে আঁতৰাব নোৱাৰি। গতিকে প্ৰস্ৰাৱৰ ৰং আৰু গোন্ধৰ ওপৰত চকু ৰাখিব। যদিহে আপোনাৰ প্ৰস্ৰাৱৰ ৰং ধাৰাবাহিকভাৱে হালধীয়া হয় আৰু পৰ্যাপ্ত পৰিমাণে পানী খোৱাৰ পিছতো দুৰ্গন্ধযুক্ত হয় তেন্তে ফেটি লিভাৰৰ প্ৰতি সচেতন হওক।
৫) ওজন বৃদ্ধিৰ লগতে বহু লোকৰ ক্ষুধাও বৃদ্ধি পায়। এনে সময়ত মিঠা খাদ্যৰ প্ৰতি আসক্তিৰ ফলত চৰ্বিযুক্ত ফেটি লিভাৰৰ সমস্যা হ’ব পাৰে।
সীমিত পৰিমাণত মদ্যপান কৰক। পাৰিলে মদ্যপান ত্যাগ কৰক। স্বাস্থ্যসন্মত খাদ্য খাওঁক। প্ৰচুৰ পৰিমাণে পানী খাওঁক। শাৰীৰিক পৰিশ্ৰম কৰক আৰু ফেটি লিভাৰৰ পৰা বাচি থাকক। কিবা অসুবিধা বা লক্ষণে দেখা দিলে চিকিৎসকৰ কাষ চাপক।
