আজি মুছলমান ধৰ্মাৱলম্বী লোকসকলৰ পবিত্ৰ উৎসৱ ঈদ-উজ-জোহা। সমগ্ৰ বিশ্বৰ লগতে অসমতো শনিবাৰে ব্যাপক উৎসাহ উদ্দীপনাৰে ইছলাম ধৰ্মালম্বী ৰাইজে উদযাপন কৰে ঈদ-উজ-জোহা৷পুৱাভাগত ৰাজ্যৰ চুকেকোণে থকা ঈদগ্ৰাহ ময়দানত সমূহীয়া নামাজত অংশ লয় ইছলামধৰ্মী লোক সকলে৷
একেদৰে গুৱাহাটী,শিৱসাগৰ, নলবাৰীটো শনিবাৰে উদযাপন কৰা পৱিত্ৰ ঈদ-উজ-জোহা৷ এই উপলক্ষে পুৱা ভাগত বহু অঞ্চলৰ ঈদগ্ৰাহ ময়দানত অনুষ্ঠিত হোৱা ঈদৰ সমূহীয়া নামাজত অংশ লয় ইছলাম ধৰ্মালম্বী ৰাইজে।
ঈদ-উল-জুহা বা ঈদ-উল আজহা ইছলাম ধৰ্মী লোকসকলৰ সকলোতকৈ ডাঙৰ আৰু গুৰুত্বপূৰ্ণ ধৰ্মীয় উৎসৱ দুটাৰ ভিতৰত অন্যতম। এই উৎসৱৰ আন দুটা নাম হ’ল- বকৰ-ঈদ আৰু কোৰবাণী ঈদ।
ঈদ-উল-জোহা মূলত আৰৱী বাক্যাংশ। ইয়াৰ অৰ্থ হ’ল ত্যাগৰ উৎসৱ। এই উৎসৱৰ মূল প্ৰতিপাদ্য বিষয় হৈছে ত্যাগ কৰা।
বকৰী ঈদ কেৱল ধৰ্মীয় উৎসৱ নহয়; ই মানৱতা, ভাতৃত্ববোধ আৰু ঈশ্বৰৰ প্ৰতি অটল বিশ্বাসৰ প্ৰতীক।
এই উৎসৱত কুৰবানীৰ প্ৰকৃত অৰ্থ কাৰো ক্ষতি কৰা নহয়। বৰঞ্চ নিজৰ স্বাৰ্থ ত্যাগ কৰি ভাল গুণ গ্ৰহণ কৰা।
এই দিনটোত মুছলমান লোকসকলে তেওঁলোকৰ সাধ্য মতে ধৰ্মীয় নিয়মানুযায়ী উট,গৰু, দুম্বা বা ছাগলী কোৰবাণী দিয়ে। এই কোৰবাণীৰ ইতিহাস বহু প্ৰাচীন।
কিন্তু এই কোৰবাণী কিয় দিয়া হয় জানেনে? জানো আহক এই উৎসৱত কুৰবানীৰ তাৎপৰ্যৰ বিষয়ে। বকৰী ঈদৰ দিনা কুৰবানীৰ পৰম্পৰা হজৰত ইব্ৰাহিম আলাইহিছলামৰ লগত জড়িত। ইছলাম ধৰ্মীয় বিশ্বাস অনুসৰি হজৰত ইব্ৰাহিমৰ ঈমান পৰীক্ষা কৰিবলৈ আল্লাহে তেওঁক অতি মৰমৰ পুত্ৰক বলি দিবলৈ কৈছিল। আল্লাহৰ নামত ইব্ৰাহিম আলাইহিছলামে এই আদেশ সম্পূৰ্ণ ভক্তি আৰু নিষ্ঠাৰে গ্ৰহণ কৰিছিল। তেওঁ নিজৰ পুত্ৰক কুৰবানীলৈ সাজু কৰাৰ লগে লগে আল্লাহে তেওঁৰ উদ্দেশ্য দেখি পুত্ৰৰ ঠাইত এটা ভেড়া পোৱালি পঠিয়াই এই কুৰবানী গ্ৰহণ কৰিলে। তেতিয়াৰ পৰাই মুছলমানসকলে এই দিনটোত কোনো এটা জন্তু বলি দিয়ে।ইয়াৰ দ্বাৰা তেওঁলোকে ইব্ৰাহিমৰ আল্লাহৰ প্ৰতি থকা বিশ্বাস আৰু আল্লাহৰ প্ৰতি থকা ভক্তিভাৱৰ স্মৰণ কৰে।ইছলামত কুৰবানীৰ আঁৰৰ উদ্দেশ্য কেৱল এটা জন্তু বলি দিয়াই নহয়, ইয়াত ত্যাগ মনোভাৱ, বিশ্বাস আৰু মানৱতাৰ প্ৰতিফলন ঘটে। কুৰবানীৰ মাংস তিনি ভাগত ভাগ কৰা হয়। এটা অংশ দুখীয়া আৰু আৰ্তজনক, দ্বিতীয়টো আত্মীয়ক আৰু তৃতীয়টো নিজৰ বাবে ৰখা হয়। এই পৰম্পৰাই সমাজত সহযোগিতা, প্ৰেম আৰু সমতাৰ মনোভাৱক শক্তিশালী কৰে।
