আপোনালোকৰ মতে মহিলাই এল পি জি চিলিণ্ডাৰ দাঙিব নোৱাৰে নেকি? লিংগ বৈষম্যৰ অভিযোগত এইদৰেই কঠোৰ ভাষাৰে ৰাষ্ট্ৰীয় ইন্ধন প্ৰতিষ্ঠান ইণ্ডিয়ান অইল কৰ্পৰেচনক সকীয়াই দিলে উচ্চতম ন্যায়ালয়ে। কেৱল মহিলা হোৱাৰ বাবেই যোগ্যতা থকাৰ পিছতো এগৰাকী প্ৰাৰ্থীক চাকৰিৰ পৰা বঞ্চিত কৰাৰ অভিযোগ উত্থাপন হৈছিল আই অ’ চি এলৰ বিৰুদ্ধে। আদালতৰ মজিয়াত ভৰ্ৎসনা কৰাৰ লগতে আই অ’ চি এলক ১২ লাখ টকা ক্ষতিপূৰণ দিবলৈ নিৰ্দেশ দিছে সৰ্বোচ্চ ন্যায়ালয়ে।
ন্যায়াধীশ অৰবিন্দ কুমাৰ আৰু ন্যায়াধীশ বিপুল এম পাঞ্চোলীৰ বিচাৰপীঠে এই ৰায়দান কৰিছে। তেওঁলোকে জনায় যে দেশৰ আগশাৰীৰ ৰাষ্ট্ৰীয় তেল প্ৰতিষ্ঠানটোৰ এই পদক্ষেপ এগৰাকী মহিলাৰ মৰ্যাদা হানি কৰাৰ সমাৰ্থক। অৱশ্যে গোচৰীয়া সুমিত্ৰা বৰ্তমান অৱসৰ গ্ৰহণৰ বয়সত উপনীত হৈছে। সেয়েহে তেওঁক চাকৰিত পুনৰ সংস্থাপন কৰাৰ পৰিৱৰ্তে ক্ষতিপূৰণ দিয়াৰ নিৰ্দেশ দিছে ন্যায়ালয়ে।
গোচৰৰ শুনানিৰ সময়ত আই অ’ চি এলৰ অধিবক্তাই দাবী কৰিছিল যে চাহৰ দোকান বা ফিলিং প্লেণ্টত গধুৰ চিলিণ্ডাৰ দাঙিবলৈ কঠোৰ শাৰীৰিক শ্ৰমৰ প্ৰয়োজন হয়। বহু সময়ত নিশাৰ ভাগতো ডিউটি কৰিবলগীয়া হয়। সেয়েহে কৰ্তৃপক্ষই মহিলাগৰাকীক এই পদৰ বাবে অনুপযুক্ত বুলি বিবেচনা কৰিছিল। কিন্তু এই যুক্তিৰ তীব্ৰ বিৰোধিতা কৰে ন্যায়াধীশ কুমাৰে।
ন্যায়াধীশ গৰাকীয়ে কয়, কেৱল মহিলা হোৱাৰ বাবেই আপোনালোকে তেওঁক চাকৰি নিদিলে? ই সমগ্ৰ নাৰীজাতিক চৰম অপমান কৰিছে। আমি ভাৰতীয়ই প্ৰতিদিনে নাৰীক শ্ৰদ্ধা কৰাৰ কথা কওঁ, অথচ এটা চৰকাৰী প্ৰতিষ্ঠান হৈ আপোনালোকে এনে কাম কৰিছে! প্ৰতিদিনে ঘৰত পুৰুষ নাথাকিলে মহিলাসকলেই দেখোন গেছৰ চিলিণ্ডাৰ দাঙি সলনি কৰে।
উল্লেখযোগ্য যে শেহতীয়াকৈ ইণ্ডিয়ান অইলৰ এটা প্লেণ্টত কেজুৱেল খালাচী বা ৰিফিলিং হেল্পাৰ পদৰ বাবে ৪৯ জনীয়া এখন তালিকা প্ৰস্তুত কৰা হৈছিল। তাৰ ভিতৰত সুমিত্ৰাও নিৰ্বাচিত হৈছিল। কিন্তু সাক্ষাৎকাৰৰ পিছত তেওঁক আৰু নিযুক্তি দিয়া নহ’ল। আনহাতে তালিকাত থকা ৪৩ জন পুৰুষে নিযুক্তি পত্ৰ লাভ কৰিলে। দীৰ্ঘদিনীয়া আইনী যুঁজৰ অন্তত অৱশেষত সৰ্বোচ্চ ন্যায়ালয়ে এই ৰায়দান কৰিলে। এই ৰায়ৰ জৰিয়তে লিংগ বৈষম্যৰ বিৰুদ্ধে নিজৰ কঠোৰ স্থিতি স্পষ্ট কৰি দিলে উচ্চতম ন্যায়ালয়ে।
