পৃথিৱীত ভাল মানুহৰ অভাৱ ঘটা নাই, আৰু সেই কাৰণেই পৃথিৱীখন এতিয়াও বসবাসৰ উপযোগী হৈ আছে। এই কথাকে এবাৰ প্ৰমান কৰিলে পাকিস্তানী বংশৃদ্ভূত এগৰাকী আমেৰিকান চিকিৎসকে।
কেবল কেন্সাৰ ৰোগীৰ প্ৰাণ সঞ্চাৰ কৰাই নহয়, ২০০জন ৰোগীৰ প্ৰায় ৫কোটি টকা ৰেহাই কৰি দিলে চিকিৎসকগৰাকীয়ে।
ছচিয়েল মিডিয়াত এই খৱৰ প্ৰকাশ পোৱাৰ পাছতে বিভিন্নজনে চিকিৎসকগৰাকীক প্ৰশংসাৰে উপচাই পেলাইছে।
বাতৰি অনুসৰি, কেন্সাৰ বিশেষজ্ঞ ওমৰ আতিকে দীৰ্ঘদিন ধৰি বহু ৰোগীক তেওঁৰ চিকিৎসাৰে সুস্থ কৰি তুলিছে। কিন্তু বহুতৰে পৰা তেওঁ টকা পাবলগীয়া আছে। ইয়াৰ পাছতে তেওঁ বৰ্তমান নিজৰ ক্লিনিকখন বন্ধ কৰি দিয়াৰ সিদ্ধান্ত লয়।
চিকিৎসকগৰাকীয়ে হিচাপ কৰি চাই দেখে যে ৰোগীসকলৰ পৰা তেওঁ ৪.৭৫কোটি টকা পাবলগীয়া আছে। ৰোগীসকলৰ পৰা টকা আদায় বিচাৰোতে তেওঁ জানিব পাৰে যে বহুতেই তেওঁলোকৰ বিলৰ টকা আদায় দিবলৈ অসমৰ্থ।
ইয়াৰ পাছতে চিকিৎসক আতিকে এক মানৱীয় সিদ্ধান্ত গ্ৰহণ কৰে। তেওঁ প্ৰায় ২০০জন ৰোগীৰ বিল ৰেহাই দিয়াৰ সিদ্ধান্ত লয়।
আনহাতে, ইয়াৰ বিপৰীতে বিল আদায় দিবলগীয়া থকা ৰোগীসকললৈ খ্ৰীষ্টমাছৰ একোখনকৈ শুভেচ্ছা কাৰ্ড প্ৰেৰণ কৰে। চিকিৎসকগৰাকীয়ে লগতে তাত জনাই দিয়ে যে The Arkansas Cancer Clinic খন বন্ধ কৰিবলগীয়া হৈছে। যিসকল ৰোগীয়ে বিলৰ টকা দিবলগীয়া আছে তেওঁলোকে সেয়া আদায় দিব নালাগে।
এনে সিদ্ধান্তৰ ফলত ৰোগীসকলৰ পৰিয়ালত আনন্দ বিৰিঙিছে। ছচিয়েল মিডিয়াত এএই খৱৰ প্ৰকাশ পোৱাৰ পাছত সকলোৱে চিকিৎসকগৰাকীৰ প্ৰশংসা কৰিছে।
চিকিৎসক ওমৰ আতিকে এক সাক্ষাৎকাৰত কয়,’’দৰাচলতে মই জানিব পাৰিছিলো যে এনেকুৱা বহুতেই আছে যি এই বিলৰ টকা আদায় দিব নোৱাৰে। সেয়ে মই আৰু মোৰ পত্নীয়ে আলোচনা কৰি এই বাকী থকা বিলৰ ধন নোলোৱাৰ বিষয়ে সিদ্ধান্ত লওঁ।‘’
