ক্ৰমাৎ নাৰীৰ বধ্যভূমিত পৰিণত হৈছে যোগী আদিত্যনাথৰ উত্তৰ প্ৰদেশ। ৰাজ্যখনত ক্ৰমাগতভাৱে মহিলাৰ বিৰুদ্ধে বৃদ্ধি পাই অহা নাৰীজনিত অপৰাধৰ মাজতে পোহৰলৈ অহা আন এক দলবদ্ধ ধৰ্ষণৰ ঘটনাই সংবাদ মাধ্যমৰ শিৰোনাম দখল কৰিছে।
ৰাজ্যখনৰ বস্তি জিলাৰ এগৰাকী শিক্ষয়ত্ৰীয়ে এগৰাকী চিকিৎসকৰ বিৰুদ্ধে উত্থাপন কৰিছে দলবদ্ধ ধৰ্ষণৰ গুৰুতৰ অভিযোগ। স্থানীয় আৰক্ষীৰ ওচৰত শিক্ষয়ত্ৰীগৰাকীয়ে দাখিল কৰা অভিযোগ অনুসৰি বস্তি সদৰ কোতৱালী অঞ্চলৰ এখন চিকিৎসালয়ত নিযুক্ত চিকিৎসকজনে ছ’চিয়েল মিডিয়াত তেওঁৰ সৈতে বন্ধুত্ব স্থাপন কৰিছিল।
এই বন্ধুত্ব সূত্ৰে চিকিৎসকগৰাকীয়ে তেওঁক সাক্ষাৎ কৰিবলৈ অনুৰোধ জনায় আৰু এই অনুৰোধ ৰক্ষা কৰি তেওঁ ১০ আগষ্টত বস্তিলৈ গৈ তেওঁক সাক্ষাৎ কৰিছিল।
তেওঁ লগতে অভিযোগ কৰা অনুসৰি চিকিৎসক গৰাকীয়ে তেওঁক কাইলি চিকিৎসালয়ৰ হোষ্টেলৰ এটা কোঠালৈ লৈ গৈছিল আৰু বলপূৰ্বক যৌন সম্পৰ্ক স্থাপন কৰিছিল।
ইয়াৰ পিছতে অভিযুক্ত চিকিৎসক গৰাকীয়ে আন দুগৰাকী সতীৰ্থক ফোন কৰি কোঠাটোলৈ মাতি আনে আৰু তিনিও চিকিৎসকে তেওঁক দলবদ্ধ ধৰ্ষণ কৰে বুলি শিক্ষয়ত্ৰীগৰাকীয়ে অভিযোগ কৰিছে।
এখন ব্যক্তিগত শিক্ষাপ্ৰতিষ্ঠানৰ শিক্ষয়ত্ৰী হিচাপে কৰ্মৰত মহিলাগৰাকী বস্তিৰ পৰা লক্ষ্ণৌত উপস্থিত হৈ ২৭ ছেপ্টেম্বৰত আৰক্ষীক এই ঘটনাৰ বিষয়ে অৱগত কৰি এক অভিযোগ দাখিল কৰে।
শিক্ষয়ত্ৰী গৰাকীৰ অভিযোগৰ ভিত্তিত বস্তিৰ কাইলি চিকিৎসালয়ত নিয়োজিত মূল অভিযুক্ত চিকিৎসকগৰাকী আৰু তেওঁৰ দুই চিকিৎসক বন্ধুৰ এজাহাৰ পঞ্জীয়ন কৰা হৈছে বুলি স্থানীয় এগৰাকী আৰক্ষী বিষয়াই জানিবলৈ দিয়ে।
আনহাতে সিদ্ধাৰ্থ নামৰ মূল অভিযুক্ত চিকিৎসক গৰাকীক ইতিমধ্যে চিকিৎসালয়ৰ পৰা গ্ৰেপ্তাৰ কৰা হৈছে বুলি বিষয়া গৰাকীয়ে লগতে উল্লেখ কৰে।