নিট পৰীক্ষাৰ প্ৰশ্নকাকত ফাদিল হোৱা ঘটনাৰ তদন্তত নিতৌ ন ন তথ্য পোহৰলৈ আহিছে। ৰাজস্থানৰ জামৱা ৰামগড়ৰ দুজন ভাতৃ মাংগিলাল আৰু দীনেশ বিৱালক আৰক্ষীয়ে গ্ৰেপ্তাৰ কৰিছে। জানিব পৰা মতে, পৰীক্ষাৰ এসপ্তাহ পূৰ্বে অৰ্থাৎ ২৬ এপ্ৰিলত তেওঁলোকে গুৰুগ্ৰামৰ এজন চিকিৎসকৰ পৰা ৩০ লাখ টকাৰ বিনিময়ত এইবাৰৰ নিট পৰীক্ষাৰ প্ৰশ্নকাকতখন ক্ৰয় কৰিছিল।
ভাতৃদ্বয়ৰ এজনে ছিকাৰত চিকিৎসা বিজ্ঞানৰ প্ৰৱেশ পৰীক্ষাৰ বাবে প্ৰস্তুতি চলাই থকা তেওঁৰ পুত্ৰলৈ প্ৰশ্নকাকতখন প্ৰেৰণ কৰাৰ পাছত ২৯ এপ্ৰিলত তেওঁলোকে আন কেইবাজনো লোকক এই কাকতখন বিক্ৰী কৰে। জয়পুৰৰ জামৱা ৰামগড়ৰ পৰা প্ৰায় আঢ়ৈ ঘণ্টাৰ দূৰত্বত থকা ছিকাৰ চহৰ এতিয়া এই প্ৰশ্নকাকত ফাদিল চক্ৰৰ মূল কেন্দ্ৰবিন্দু হৈ পৰিছে।
আৰক্ষীৰ মতে, জামৱা ৰামগড়ৰ পৰা ছিকাৰৰ ৰাকেশ কুমাৰ মন্দাৱৰিয়া নামৰ এজন এম বি বি এছ কাউঞ্চেলিং এজেণ্টক প্ৰশ্নকাকতখন বিক্ৰী কৰা হৈছিল। তাৰ পিছত ৰাকেশে এই কাকতখন ৩০ হাজাৰ টকাত কেৰালাত এম বি বি এছ পঢ়ি থকা ছিকাৰৰ এজন ছাত্ৰক বিক্ৰী কৰে। পৰীক্ষাৰ এদিন আগতে সেই ছাত্ৰজনে ছিকাৰত পেয়িং গেষ্ট চলোৱা তেওঁৰ দেউতাকলৈ এখন মেছেজ দি প্ৰশ্নকাকতখন পঠিয়াই দিছিল আৰু দেউতাকে সেয়া হোষ্টেলৰ ছাত্ৰীসকলৰ মাজত বিতৰণ কৰিছিল।
এই সমগ্ৰ ঘটনাত গুৰুগ্ৰামৰ চিকিৎসকজনৰ ভূমিকা অতি গুৰুত্বপূৰ্ণ বুলি বিবেচিত হৈছে। সূত্ৰৰ পৰা জানিব পৰা মতে, নাছিকৰ ছপাশালৰ পৰা প্ৰশ্নকাকত ফাদিল হৈ এক বৃহৎ চক্ৰৰ জৰিয়তে গুৰুগ্ৰামৰ চিকিৎসকজনৰ হাতত পৰিছিল। ইয়াৰ পিছতে ৰাজস্থানৰ ভাতৃদ্বয়ে তেওঁৰ পৰাই কাকতখন কিনি নিজৰ পৰিয়াল আৰু আন পৰীক্ষাৰ্থীক বিক্ৰী কৰিছিল। অৱশ্যে ইণ্ডিয়ান মেডিকেল এছোচিয়েচনৰ গুৰুগ্ৰামৰ সভাপতিয়ে জনোৱা মতে, তদন্তকাৰী সংস্থাই এতিয়ালৈকে কোনো চিকিৎসকৰ বিষয়ে তেওঁলোকৰ লগত যোগাযোগ কৰা নাই।
আটাইতকৈ আচৰিত কথাটো হ’ল যে গ্ৰেপ্তাৰ হোৱা লোককেইজনে প্ৰায় এমাহ আগতেই জানিছিল যে এইবাৰৰ প্ৰশ্নকাকত ফাদিল হ’ব। আনকি গ্ৰেপ্তাৰ হোৱা দীনেশ নামৰ লোকজনৰ কোনো ৰাজনৈতিক দলৰ সৈতেও সম্পৰ্ক থকা বুলি সন্দেহ কৰা হৈছে। সূত্ৰই প্ৰকাশ কৰা মতে যোৱা বছৰো তেওঁলোকৰ পৰিয়ালৰ চাৰিজন ল’ৰা-ছোৱালীয়ে নিট পৰীক্ষাত উত্তীৰ্ণ হৈছিল।
ছিকাৰত ছাত্ৰ-ছাত্ৰী আৰু কোচিং চলোৱা লোকসকলে হোৱাটছএপ আৰু টেলিগ্ৰাম গ্ৰুপৰ জৰিয়তে এই প্ৰশ্নকাকতখন বিয়পাই দিছিল। নাছিকৰ পৰা হাৰিয়ানা আৰু ৰাজস্থান হৈ এই কাকত জম্মু-কাশ্মীৰ, বিহাৰ, কেৰালা আৰু উত্তৰাখণ্ড আদি ৰাজ্যলৈকো বিয়পি পৰে। ডেৰাডুনৰ পৰা গ্ৰেপ্তাৰ হোৱা ৰাকেশ কুমাৰ মন্দাৱৰিয়াই প্ৰায় ৭০০ জন ছাত্ৰ-ছাত্ৰীক এই প্ৰশ্নকাকত দিয়া বুলি অভিযোগ উঠিছে। হাৰিয়ানাত প্ৰশ্নকাকত বিক্ৰী কৰা য়শ যাদৱ নামৰ আন এজন লোককো গ্ৰেপ্তাৰ কৰা হৈছে।
৩ মে’ত অনুষ্ঠিত হোৱা এই নিট পৰীক্ষা প্ৰশ্নকাকত ফাদিলৰ অভিযোগত বাতিল কৰা হৈছে আৰু চৰকাৰৰ নিৰ্দেশত চি বি আয়ে এই সমগ্ৰ ঘটনাৰ তদন্ত আৰম্ভ কৰিছে। নেশ্যনেল টেষ্টিং এজেন্সিয়ে অহা ৭ ৰ পৰা ১০ দিনৰ ভিতৰত পৰীক্ষাৰ নতুন তাৰিখ ঘোষণা কৰিব। পৰীক্ষা বাতিল হোৱাৰ ফলত সমগ্ৰ দেশৰ ছাত্ৰ-ছাত্ৰীসকলৰ মাজত তীব্ৰ ক্ষোভৰ সৃষ্টি হৈছে আৰু তেওঁলোকে এই পৰীক্ষা অনুষ্ঠিত কৰাৰ দায়িত্ব দিল্লীৰ এইমছক দিবলৈ দাবী জনাইছে।
চি বি আয়ে ইতিমধ্যে অপৰাধমূলক ষড়যন্ত্ৰ, প্ৰতাৰণা, চুৰি আৰু প্ৰমাণ নষ্ট কৰাকে ধৰি দুৰ্নীতি নিবাৰণ আইনৰ অধীনত গোচৰ ৰুজু কৰিছে। আনহাতে ৰাজস্থান আৰক্ষীয়ে প্ৰকাশ কৰা মতে, পৰীক্ষাৰ আগতে ছাত্ৰ-ছাত্ৰীৰ মাজত বিয়পি পৰা ৰসায়ন বিজ্ঞানৰ এখন আৰ্হি কাকতৰ ৪১০ টা প্ৰশ্নৰ ভিতৰত প্ৰায় ১২০ টা প্ৰশ্ন মূল পৰীক্ষাৰ কাকতৰ সৈতে মিলি গৈছিল। মহাৰাষ্ট্ৰৰ নাছিকতো এই ঘটনাৰ লগত জড়িত এজন লোকক আটক কৰা হৈছে আৰু বৰ্তমান চি বি আইৰ তদন্ত তীব্ৰ গতিত চলি আছে।
