“চিকিৎসকে সৰ্বোত্তমখিনি কৰিছে”, ক’ভিড-১৯ ৰোগীৰ অভিযোগক লৈ স্বাস্থ্য মন্ত্ৰী হিমন্ত বিশ্ব শৰ্মা
অসমৰ স্বাস্থ্য মন্ত্ৰী হিমন্ত বিশ্ব শৰ্মাই গুৱাহাটী চিকিৎসা মহাবিদ্যালয় আৰু হস্পিটেলত এগৰাকী ক’ভিড-১৯ ৰোগীৰ শুশ্ৰূষাত অৱহেলাক লৈ উঠা গুৰুতৰ অভিযোগ সন্দৰ্ভত মুখ খুলিছে।
ইতিমধ্যে বাতৰি প্ৰকাশিত হৈছে যে জি এম চি এইচত চিকিৎসাধীন অমৰ ডেকা নামৰ ক’ভিড-১৯ ৰোগীগৰাকীয়ে উপযুক্ত শুশ্ৰূষা নোপোৱাৰ অভিযোগ উত্থাপিত হৈছে।
স্বাস্থ্য মন্ত্ৰী শৰ্মাই শনিবাৰে কয় যে উক্ত ৰোগীজনক সহায় কৰাৰ বাবে চিকিৎসকসকলে তেওঁলোকৰ সৰ্বোত্তমখিনি কৰিছে।
তেওঁ জি এম চি এইচৰ বিষয়টোক দুৰ্ভাগ্যজনক আখ্যা দি কয় যে চিকিৎসকসকলৰ হাৰ্কিউলিয়ান প্ৰচেষ্টাক তাৎপৰ্য্যহীন কৰি তোলা হৈছে।
“কৰ্তব্যত জীৱন লগোৱা আমাৰ চিকিৎসকসকলক সন্মান জনাবলৈ প্ৰত্যেকলৈকে অনুৰোধ। আহক সন্মান আৰু সহযোগ কৰো, তৰ্কাতৰ্কি নহয়!” মন্ত্ৰী শৰ্মাৰ টুইট।
Unfortunate that a medical issue at #GMCH, and Herculean efforts of doctors are being trivialized. Doctors have done their best to help the said patient. Request everyone to respect our doctors who’re putting their lives in line of duty. Let’s respect & cooperate, not bicker!
— Himanta Biswa Sarma (@himantabiswa) May 16, 2020
জাগীৰোডৰ অমৰ ডেকা নামৰ যুৱকজনৰ মাক আৰু পত্নীৰ সৈতে হোৱা এটা টেলিফোনিক বাৰ্তালাপ সংবাদমাধ্যমত প্ৰচাৰিত হৈছিল।
ৰোগীগৰাকীয়ে মাক আৰু পত্নীৰ আগত চিকিৎসালয়খনত চিকিৎসা আৰু শুশ্ৰূষাত অৱহেলাৰ সন্মুখীন হোৱাৰ গুৰুতৰ অভিযোগ তুলিছিল।
বিপৰীতে চিকিৎসকে যুৱকজনক আগ্ৰাসী মনোভাৱৰ আৰু তেওঁ চিকিৎসা আগবঢ়োৱাত চিকিৎসকক কোনোধৰণৰ সহযোগিতা আগনবঢ়োৱা বুলি অভিযোগ কৰিছিল।
ৰোগীগৰাকীয়ে নিজকে ক’ভিড-১৯ আক্ৰান্ত নহয় বুলি দাবী কৰা আৰু চিকিৎসালয়ত অশালীন আচৰণ কৰা বুলিও চিকিৎসকে অভিযোগ কৰিছিল।
যুৱকজনৰ মাতৃ আৰু পত্নী বৰ্তমান গুৱাহাটীৰ মহেন্দ্ৰ মোহন চৌধুৰী হস্পিটেলত কুৱাৰেণ্টিন হৈ আছে।