চীনৰ ইউনান প্ৰদেশৰ চিকিৎসকে এজন লোকৰ পেটৰ পৰা ১৮০টা লোহাৰ গজালকে ধৰি বিভিন্ন ধাতুৰ বস্তু উলিয়াইছে। এই বস্তুবোৰৰ ভিতৰত আছিল মুদ্ৰা, স্ক্ৰু, নাট, চুম্বক আদি। মুঠতে আঁতৰোৱা ধাতুৰ বস্তুবোৰৰ ওজন এক কিলোগ্ৰামতকৈও অধিক আছিল।
ইউনান ডেইলীত প্ৰকাশিত এক বাতৰি অনুসৰি, লোকজনে বাৰে বাৰে বমি আৰু পেটৰ বিষৰ বাবে ইউনান প্ৰদেশৰ থাৰ্ড পিপলছ হস্পিতালত চিকিৎসাৰ বাবে ভৰ্তি হৈছিল। পৰীক্ষাত তেওঁৰ পেটৰ ভিতৰত এটা বৃহৎ ধাতুৰ বস্তুৰ লাড়ু ধৰা পৰে। বস্তুবোৰ ইটোৱে সিটোৰ লগত লিপিট খাই পৰি পেটটো ফুলি তললৈ নামি গৈছিল।
শুকুৰবাৰে তিনি ঘণ্টীয়া অস্ত্ৰোপচাৰ কৰি ধাতুৰ বস্তুবোৰ আঁতৰাই পেলোৱা হয়। তাৰ ভিতৰত আছিল প্ৰায় ১০ চেণ্টিমিটাৰ দীঘল এটা গজাল।
চিকিৎসালয়খনৰ হেপাটোবিলিয়াৰী আৰু পেনক্ৰিয়াটিক চাৰ্জাৰী বিভাগৰ মুখ্য চিকিৎসক লি ৱেইয়ে জনোৱা মতে, লোকজনৰ পাকস্থলীত আলচাৰ আৰু ঘাঁ সৃষ্টি হৈছে। সৌভাগ্যক্ৰমে গজালবোৰ পাকস্থলীৰ বেৰ ভেদ কৰি অন্ত্ৰত প্ৰৱেশ কৰা নাছিল। চিকিৎসকৰ মতে চুম্বকৰ বাবে গজালবোৰ পৰস্পৰে বান্ধ খাই পৰি এটা ডাঙৰ লাড়ু হৈ পৰে।
অস্ত্ৰোপচাৰৰ পিছত লোকজনৰ শাৰীৰিক অৱস্থা সুস্থিৰ আৰু তেওঁ সুস্থ হৈ উঠিছে।
ইয়াৰ পূৰ্বে চিকিৎসালয়খনৰ চিকিৎসকে গজাল, তাঁৰ আৰু লাইটাৰ গিলি পেলোৱা ৰোগীৰ চিকিৎসা কৰিছিল যদিও এইবাৰ প্ৰথমবাৰৰ বাবে ১৮০টা গজাল একেলগে গিলি পেলোৱা দেখা গৈছে।
ব্যক্তিজনৰ মানসিক ৰোগৰ দীৰ্ঘদিনীয়া ইতিহাস আছে বুলি পৰিয়ালৰ লোকে জানিবলৈ দিয়ে। অৱশ্যে ইমান গজাল কিয় গিলিলে কোনেও নাজানে।
ডাক্তৰ লি ৱেইয়ে সকীয়াই দিছে যে গিলিলে সৰু বস্তু এটাও নিজে নিজে শৰীৰৰ পৰা ওলাই যাব বুলি ধৰি লোৱাটো সঠিক নহয়। বিশেষকৈ ধাতু বা চোকা বস্তু পাচনতন্ত্ৰৰ সংকীৰ্ণ অংশত আবদ্ধ হৈ আঘাত বা ছিদ্ৰৰ সৃষ্টি কৰিব পাৰে। ইয়াৰ ফলত পেৰিট’নাইটিছকে ধৰি মাৰাত্মক জটিলতা আহিব পাৰে।
