পিত্তপাথৰৰ (Gallstones) সমস্যা নতুন নহয়। বহুতৰে এই ৰোগ হয়, আৰু অস্ত্ৰোপচাৰ কৰি পাথৰ আঁতৰাই পেলোৱা হয়। পিত্তৰ পাথৰ অতি সাধাৰণ সমস্যা। কিন্তু গুৰুগ্ৰামত এজন বৃদ্ধৰ লগত যিটো ঘটিছে সেয়া আৰু সাধাৰণ অৱস্থা বুলি ক’ব নোৱাৰি।
চিকিৎসকে কয় যে ই বিৰলতকৈ বিৰল। কিয়ইবা নহ’ব, কোনোবাই কেতিয়াবা শুনিছেনে যে একেলগে পিত্তথলীত আঠ হাজাৰ পাথৰ জমা হৈছে? একেলগে ২০০-৩০০ পাথৰ মানে ই এক বিৰল অৱস্থা। পিত্তথলী ফাটি যোৱা অৱস্থা। তাত এই ৭০ বছৰীয়া ব্যক্তিজনৰ অৱস্থাই সকলো অভিলেখ ভংগ কৰিছে।
গুৰুগ্ৰামৰ বাসিন্দা বৃদ্ধজনক বুকু আৰু পেটৰ বিষত গুৰুগ্ৰামৰ এখন চিকিৎসালয়ত ভৰ্তি কৰোৱা হয়। পিত্তথলীত পাথৰ হ’লে পেটত অস্বাভাৱিক বিষ, বমি ভাব হয়। বৃদ্ধগৰাকীৰ বুকুৰ বিষো হৈছিল, লগতে উশাহ-নিশাহ লোৱাত কষ্ট হৈছিল। চিকিৎসকসকলে ইয়াক হৃদৰোগ বুলি ভাবিছিল।
কিন্তু পিছত আল্ট্ৰাছ’নোগ্ৰাফীত দেখা গ’ল যে পিত্তথলীত হাজাৰ হাজাৰ পাথৰ পাক খাই জমা হৈ আছে। এনে পৰিস্থিতিত চিকিৎসকসকলে কটাছিঙা কৰি অস্ত্ৰোপচাৰ কৰাৰ ৰিস্ক লোৱা নাছিল। বৰঞ্চ তেওঁলোকে ‘ইনভেছিভ লেপাৰ’স্কপিক চাৰ্জাৰি’ কৰে। ইয়াত পিত্তথলীৰ পৰা একেলগে ৮,১২৫ টা পাথৰ উলিয়াই অনা হৈছে।
বৃদ্ধগৰাকীৰ ৬-৭ ঘণ্টাৰ অস্ত্ৰোপচাৰ কৰা হয়। লেপাৰস্কপিত পেট কাটি অস্ত্ৰোপচাৰ কৰা নহয়। বৰঞ্চ সৰু সৰু ফুটাৰে পেটত কেমেৰা আৰু আনুষংগিক সঁজুলি সুমুৱাই অস্ত্ৰোপচাৰ কৰা হয়। অপাৰেচন ৰুমত থকা মনিটৰে বহুগুণ ডাঙৰকৈ অপাৰেচন কৰা অংশটো চাবলৈ সুযোগ দিয়ে। ইয়াৰ দ্বাৰা বহু ভুলৰ পৰা হাত সাৰিব পৰা যায় বুলি চিকিৎসকে দাবী কৰে।
সাধাৰণতে অনিয়মিত খাদ্যাভ্যাস, হৰম’নৰ বিকাৰ, উচ্চ কলেষ্টেৰল আৰু দীৰ্ঘসময় ধৰি খাদ্য গ্ৰহণ নকৰাৰ ফলত পিত্তথলীত পাথৰ সৃষ্টি হ’ব পাৰে। অতিৰিক্ত জাংক ফুড, সুৰা খোৱাৰ প্ৰৱণতাইও পিত্তথলীত পাথৰ সৃষ্টি কৰিব পাৰে। পিত্তথলীৰ পৰা ওলোৱা পিত্তৰ পৰিমাণ বেলেগ বেলেগ হয়। ইয়াৰ লগতে অতিৰিক্ত কলেষ্টেৰল আৰু বিলিৰুবিন জমা হ’লে পিত্ত ঘনীভূত হৈ স্ফটিকৰ দৰে আকৃতি লাভ কৰে।
পিত্তথলীত পাথৰ গঠন হৈছে নে নাই সেয়া কিছুমান লক্ষণৰ দ্বাৰা বুজিব পাৰি। যেনে- পেটৰ ওপৰৰ সোঁফালৰ পৰা বিষ আৰম্ভ হয়। লাহে লাহে ই বিয়পি পৰে। বহুতে পেটৰ বিষৰ লগতে কঁপি কঁপি জ্বৰও অনুভৱ কৰে। ইয়াৰ লগতে সঘনাই বমিও হয়। কেতিয়াবা পিত্তথলীত পাথৰ জমা হ’বলৈ আৰম্ভ কৰিলে হেপাটাইটিছও হয়। গতিকে পেটৰ বিষ আৰু বমি সঘনাই হ’লে চিকিৎসকৰ পৰামৰ্শ ল’ব লাগে।
বৃদ্ধগৰাকীৰ ক্ষেত্ৰত যি হ’ল সেয়া এক বিৰল অৱস্থা। চিকিৎসকে কয় যে বৃদ্ধগৰাকীৰ পিত্তথলীত কেন্সাৰ হোৱাৰ দৰে পৰিস্থিতিৰ সৃষ্টি হৈছিল। সঠিক সময়ত যদি অস্ত্ৰোপচাৰ কৰা নহ’লে ডাঙৰ বিপদ হ’লহেঁতেন।
