শান্তিৰ বাবে নোবেল বঁটাৰ যোগ্য বুলি বাৰে বাৰে দাবী কৰি অহা আমেৰিকাৰ ৰাষ্ট্ৰপতি ড‘নাল্ড ট্ৰাম্পৰ অৱশেষত শান্তি বঁটা লাভৰ সপোন বাস্তৱত পৰিণত হ‘ল। ২০২৬ চনৰ ফিফা বিশ্বকাপৰ ড্ৰ‘ অনুষ্ঠানৰ সময়ত ড‘নাল্ড ট্ৰাম্পক ‘ফিফা শান্তি বঁটা‘ প্ৰদান কৰা হয়।
শুকুৰবাৰে ৱাশ্বিংটন ডি চিৰ কেনেডি চেণ্টাৰত অনুষ্ঠিত এক আড়ম্বৰপূৰ্ণ অনুষ্ঠানত ট্ৰাম্পক এই সন্মান জনোৱা হয়। ফিফাই চলিত বৰ্ষতে বিশ্ব শান্তি আৰু ঐক্যৰ ক্ষেত্ৰত উল্লেখযোগ্য অৱদান আগবঢ়োৱাসকলক স্বীকৃতি দিবলৈ এই বঁটাটো প্ৰৱৰ্তন কৰিছিল; ট্ৰাম্পেই হৈছে এই বঁটা লাভ কৰা প্ৰথমজন ব্যক্তি।
উল্লেখ্য যে ফিফাই নতুন শান্তি বঁটা ঘোষণা কৰাৰ পিছৰে পৰা আমেৰিকাৰ ৰাষ্ট্ৰপতি ড‘নাল্ড ট্ৰাম্পক এই বঁটা প্ৰদান কৰা হ‘ব বুলি জল্পনা-কল্পনা চলিছিল, আৰু সেয়াই সত্য প্ৰমাণিত হ‘ল। বঁটা লাভ কৰি ট্ৰাম্পে কয় যে, “এয়া সঁচাকৈয়ে মোৰ জীৱনৰ আটাইতকৈ ডাঙৰ সন্মান।” তেওঁ লগতে কয়, “বঁটাতকৈও গুৰুত্বপূৰ্ণ কথাটো হ‘ল আমি লাখ লাখ লোকৰ জীৱন ৰক্ষা কৰিলোঁ।” উল্লেখ্য যে, ২০২৬ চনৰ ফিফা বিশ্বকাপ আমেৰিকা, কানাডা আৰু মেক্সিকোৰ যৌথ উদ্যোগত অনুষ্ঠিত হ‘ব।
ড‘নাল্ড ট্ৰাম্পক শান্তি বঁটা প্ৰদানৰ সিদ্ধান্তক লৈ তীব্ৰ সমালোচনা কৰা পৰিলক্ষিত হৈছে। সমালোচকসকলে আঙুলিয়াই দিছে যে ফিফাৰ অধ্যক্ষ জিয়ানি ইনফান্টিনো আৰু ট্ৰাম্প ঘনিষ্ঠ মিত্ৰ। ইনফান্টিনোৱে পূৰ্বে গাজাত যুদ্ধবিৰতিৰ মধ্যস্থতা কৰাৰ বাবে ট্ৰাম্পে নোবেল বঁটা লাভ কৰা উচিত আছিল বুলি মন্তব্য কৰিছিল।
বিশ্ব ফুটবলৰ এক অনুষ্ঠানত ৰাজনৈতিক বাৰ্তা যোগ কৰাটো উচিত নে অনুচিত, সেই বিষয়েও সমালোচকসকলে প্ৰশ্ন উত্থাপন কৰিছে।
