অপাৰেচন সেন্দূৰৰ প্ৰতি তীব্ৰ প্ৰতিক্ৰিয়া আমেৰিকাৰ ৰাষ্ট্ৰপতি ড’নাল্ড ট্ৰাম্পৰ। আমেৰিকাৰ ৰাষ্ট্ৰপতি গৰাকীয়ে কয় এই সকলোবোৰ অতি সোনকালে শেষ হওক। জম্মু-কাশ্মীৰৰ পেহেলগামত ২৬ জন লোকৰ মৃত্যুৰ কাৰণ হোৱা সন্ত্ৰাসবাদী আক্ৰমণৰ প্ৰতিশোধ হিচাপে ভাৰতে পাকিস্তান আৰু পাক অধিকৃত কাশ্মীৰত ৯টা সন্ত্ৰাসবাদী ঘাটিত বিমান আক্ৰমণ চলায়। ভাৰতীয় বায়ুসেনাই ৭ মে’, ২০২৫ৰ নিশা প্ৰায় ১:৩০ বজাত এই অভিযান আৰম্ভ কৰে। সংবাদ মাধ্যমৰ সৈতে কথা বাৰ্তাত ট্ৰাম্পে কয়, ভাৰত আৰু পাকিস্তান দুয়োখন শক্তিশালী দেশ। এই দুই পাৰমাণৱিক শক্তিৰ দেশে যুদ্ধৰ দিশে আগবঢ়াটো কোনেও নিবিচাৰে। তেওঁ দুয়োখন দেশক উত্তেজনা হ্ৰাস কৰি শান্তিৰ পথ বিচাৰিবলৈ আহ্বান জনায়।
প্ৰকাশিত তথ্য অনুসৰি, অপাৰেচন সেন্দূৰৰ জৰিয়তে বাহাৱালপুৰ, কোটলি, মুজাফ্ফৰাবাদৰ দৰে অঞ্চলত থকা জইছ-ই-মহম্মদ আৰু লস্কৰ-ই-তৈবাৰ সন্ত্ৰাসবাদী ঘাটিসমূহক লক্ষ্য কৰা হৈছিল। এই সংগঠনসমূহে দীৰ্ঘদিন ধৰি ভাৰতত সন্ত্ৰাসবাদী কাৰ্যকলাপ চলাই আহিছে। ভাৰতে স্পষ্ট কৰিযদিছে যে এই অভিযান সীমিত আৰু নিয়ন্ত্ৰিত আছিল, যাতে কোনো অসামৰিক ক্ষতি নহয়। ইফালে, ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালে আমেৰিকাৰ ৰাষ্ট্ৰীয় নিৰাপত্তা উপদেষ্টা আৰু বিদেশ মন্ত্ৰী মাৰ্কো ৰুবিঅ’ৰ সৈতে হোৱা বাৰ্তালাপত ভাৰতৰ অৱস্থানৰ বিষয়ে অৱগত কৰে। আমেৰিকাৰ বিদেশ মন্ত্ৰণালয়ৰ মুখপাত্ৰই কৈছে যে তেওঁলোকে পৰিস্থিতিৰ ওপৰত দৃষ্টি ৰাখিছে, কিন্তু এতিয়া কোনো মন্তব্য কৰাটো সঠিক নহ’ব।
উল্লেক্য যে ভাৰতৰ এই অভিযানে পাকিস্তানৰ বাবে কূটনৈতিক আৰু কৌশলগতভাৱে ডাঙৰ প্ৰত্যাহ্বানৰ সৃষ্টি কৰিছে। ভাৰতে ঘোষণা কৰিছে যে প্ৰতিটো সন্ত্ৰাসবাদী আক্ৰমণৰ প্ৰত্যুত্তৰ এতিয়া একে ভাষাত দিয়া হ’ব। ট্ৰাম্পৰ শান্তিৰ আহ্বানে এই কথা স্পষ্ট কৰিছে যে ভাৰতৰ পদক্ষেপক আন্তঃৰাষ্ট্ৰীয় পৰ্যায়ত প্ৰভাৱিত কৰিছে। এই অভিযানৰ পিছত ভাৰতৰ দৃঢ় নীতি আৰু আন্তঃৰাষ্ট্ৰীয় সমৰ্থনে পাকিস্তানৰ সন্ত্ৰাসবাদী কাৰ্যকলাপৰ পৃষ্ঠপোষকতাৰ ওপৰত প্ৰশ্ন উত্থাপন কৰিছে।
