যোৱা ৫ বছৰত গুজৰাটৰ একাংশ অচিনাকি ৰাজনৈতিক দলে লাভ কৰিছে ৪০০০ কোটিতকৈও অধিক টকাৰ অনুদান। শেহতীয়াকৈ লোকসভাৰ বিৰোধী দলপতি ৰাহুল গান্ধীয়ে সংবাদ মাধ্যমৰ বাতৰিৰ উদ্ধৃতি দি এই কথা দাবী কৰিছে।
এই সন্দৰ্ভত তেওঁ নিৰ্বাচন আয়োগক লক্ষ্য কৰি কয়, নিৰ্বাচন আয়োগে এই বিষয়টোৰ তদন্ত কৰিব নে তেওঁ বিষয়টোৰ ওপৰত ৰাজহুৱা মন্তব্য দিয়াৰ বাবে তেওঁক শপতনামা বিচাৰিব?
অৱশ্যে ৰাহুল গান্ধীৰ অভিযোগৰ প্ৰতিক্ৰিয়া দিয়া নাই নিৰ্বাচন আয়োগে।
ৰাহুল গান্ধীয়ে নিজৰ এক্স হেণ্ডেলত এটা বাতৰি শ্বেয়াৰ কৰিছে। উক্ত প্ৰতিবেদনত দাবী কৰা হৈছে যে ২০১৯-২০ চনৰ পৰা ২০২৩-২৪ চনলৈকে গুজৰাটৰ ১০টা অচিনাকি দলে ৫ বছৰত ৪৩০০ কোটি টকাৰ অনুদান লাভ কৰিছিল। এই সময়ছোৱাত দুটা লোকসভা নিৰ্বাচন অনুষ্ঠিত হয় – ২০১৯ আৰু ২০২৪ আৰু ২০২২ চনত গুজৰাট বিধানসভাৰ নিৰ্বাচন অনুষ্ঠিত হয়। এই তিনিটা নিৰ্বাচনত এই দলসমূহে মুঠ ৪৩ জন প্ৰাৰ্থী প্ৰক্ষেপ কৰিছিল আৰু তেওঁলোকৰ মুঠ ভোট আছিল ৫৪,০৬৯।
প্ৰতিবেদন অনুসৰি এই দলসমূহে নিৰ্বাচনী ব্যয় হিচাপে মাত্ৰ ৩৯.০২ লাখ টকাহে দেখুৱাইছে। অৱশ্যে অডিট ৰিপৰ্টত ৩৫০০ কোটি টকা ব্যয়ৰ কথা উল্লেখ আছে।
এই প্ৰতিবেদন নিজৰ এক্স হেণ্ডেলত শ্বেয়াৰ কৰি ৰাহুল গান্ধীয়ে হিন্দী ভাষাত লিখিছে, ‘গুজৰাটত কিছুমান বেনামী পঞ্জীয়নভুক্ত ৰাজনৈতিক দল আছে, যাৰ নাম কোনেও শুনা নাই, কিন্তু তেওঁলোকে ৪৩০০ কোটি টকাৰ অনুদান লাভ কৰিছে।নিৰ্বাচন আয়োগক কংগ্ৰেছৰ সাংসদগৰাকীয়ে প্ৰশ্ন কৰে, “ক’ৰ পৰা আহিল এই হাজাৰ কোটি টকা? এই দলবোৰ কোনে চলাই আছে? টকা ক’লৈ গৈ আছে? নিৰ্বাচন আয়োগে এই বিষয়ে তদন্ত কৰিবনে? নে ইয়াতো শপতনামা বিচাৰিব? নে নিজেই আইন সলনি কৰিব যাতে এই তথ্যও লুকুৱাই ৰাখিব পৰা যায়?”
