মুছেৱালাৰ দৰেই হত্যাৰ ভাবুকি: কি ক’লে ছলমান খানে?
যোৱা মাহত পঞ্জাৱৰ জনপ্ৰিয় গায়ক সিদ্ধু মুছেৱালাৰ হত্যাকাণ্ডই সমগ্ৰ দেশতে চাঞ্চল্যৰ সৃষ্টি কৰাৰ পাছত শেহতীয়াকৈ বলীউডৰ চুপাৰষ্টাৰ ছলমান খানলৈও আহিছিল মৃত্যুৰ ভাবুকি। এখন পত্ৰযোগে ছলমান খানক সিদ্ধু মুছেৱালাৰ দৰেই দশা হ’ব বুলি কোনো অচিনাক্ত দুৰ্বৃত্তই ভাবুকি প্ৰদান কৰিছিল।
মৃত্যুৰ ভাবুকি পোৱাৰ পাছতে অভিনেতা গৰাকীয়ে আৰক্ষীক জানিবলৈ দিয়ে যে তেওঁৰ কোনো ব্যক্তিৰ সৈতে কোনো শত্ৰুতা নাই। সিদ্ধু মুছেৱালাৰ ওপৰত আক্ৰমণৰ দাবী কৰা কানাডাস্থিত গেংষ্টাৰ গোল্ডি ব্ৰাৰক চিনি নাপায় বুলি মন্তব্য কৰে ছলমান খানে।
আৰক্ষীৰ আগত ছলমান খান জানিবলৈ দিয়া মতে তেওঁলৈ ভাবুকি দিয়া এই চিঠিখন দেউতাক চেলিম খানে পুৱা খোজ কাঢ়িবলৈ যোৱাৰ সময়ত পাইছিল। ছলমানে কয়, “মোৰ কাৰো সৈতে শেহতীয়াকৈ কোনো শত্ৰুতা নাই।সেয়ে বিশেষ কোনোবাক সন্দেহ কৰাৰ মোৰ ওচৰত কোনো দৃঢ় কাৰণ নাই।”
শেহতীয়াকৈ কাৰো সৈতে কোনো বিবাদ হোৱা নাই বুলি উল্লেখ কৰি ছলমান খানে লগতে কোনো ভাবুকি কল বা বাৰ্তা লাভ কৰা নাই বুলিও জানিবলৈ দিয়ে।
অৱশ্যে অভিনেতাজনে মুছেৱালাৰ হত্যাৰ দায়িত্ব স্বীকাৰ কৰা গোল্ডী ব্ৰাৰৰ দলটোৰ সৈতে জড়িত লৰেন্স বিষ্ণৈৰ বিষয়ে জানে বুলি উল্লেখ কৰে। ২০১৮ চনত কৃষ্ণসাৰ গোচৰৰ বিচাৰৰ সময়ত বিষ্ণৈৰ পৰা মৃত্যুৰ ভাবুকি লাভ কৰিছিল বুলি জানিবলৈ দিয়ে ছলমানে।
উল্লেখ্য যে বলীউদৰ জনপ্ৰিয় অভিনেতাগৰাকীৰ লগতে তেওঁৰ দেউতাক চেলিম খানক সম্বোধন কৰা পত্ৰখনত “আপোনাৰ দশাও মুছেৱালাৰ বুলি ভাবুকি দিয়া হৈছিল। স্বাক্ষৰবিহীন এই পত্ৰখন দেওবাৰে মুম্বাইৰ বান্দ্ৰা বেণ্ডষ্টেণ্ড প্ৰমেনাডত পোৱা গৈছিল।
ছলমান খানে এই ভাবুকি পত্ৰ লাভ কৰাৰ পিছতে আৰক্ষীয়ে এই বিষয়ত অনুসন্ধানত নামি পৰিছে। অৱশ্যে এই পৰ্যন্ত এই সন্দৰ্ভত কোনো তথ্য লাভ কৰা নাই বুলি জানিব পৰা গৈছে।