ডিব্ৰুগড় প্ৰেছ ক্লাবে আজি বৃহত্তৰ ডিব্ৰুগড় প্ৰেছ ক্লাব চৌহদত আয়োজন কৰা এখন জৰুৰীকালীন সভা আহ্বান কৰে। এই সভাত ডিব্ৰুগড় প্ৰেছ ক্লাবৰ সভাপতি প্ৰবীৰ চক্ৰবৰ্তী আৰু বৃহত্তৰ ডিব্ৰুগড় প্ৰেছ ক্লাবৰ সভাপতি মনজিৎ বৰাই যুটীয়াভাৱে সভাপতিত্ব কৰে।
উক্ত সভাত শেহতীয়াভাৱে চাৰ্টাৰ্ড একাউণ্টেণ্ট সঞ্জয় জৈনে ডিব্ৰুগড়ৰ ছপা আৰু বৈদ্যুতিন মাধ্যমৰ সাংবাদিকসকলৰ বিৰুদ্ধে বিভিন্ন সময়ত ৰুজু কৰা গোচৰসমূহৰ সন্দৰ্ভত আলোচনা কৰা হয়।
সভাখনত বহু কেইটা প্ৰস্তাৱ গ্ৰহণ কৰা হয়। গ্ৰহণ কৰা প্ৰস্তাৱসমূহ অনুসৰি
প্ৰেছ ক্লাবে সঞ্জয় জৈনৰ ভুমিকাক গৰিহণা দিয়ে আৰু তেওঁৰ কোনো ভাবুকিৰ ওচৰত নতি স্বীকাৰ নকৰাৰ সিদ্ধান্ত গ্ৰহণ কৰে।
চাৰ্টাৰ্ড একাউণ্টেণ্ট সঞ্জয় জৈনে ভৱিষ্যতে আহ্বান কৰা সকলো সংবাদমেল বৰ্জনৰ সিদ্ধান্ত গ্ৰহণ কৰা হয়।
সঞ্জয় জৈন যুক্ত থকা সকলো সংস্থা আৰু অনুষ্ঠানৰ সকলো সংবাদমেল আৰু অন্যন্য কাৰ্যসূচী গ্ৰহণ কৰাৰো প্ৰস্তাৱ প্ৰেছ ক্লাবে গ্ৰহণ কৰে।
উল্লেখ্য যে জিলা প্ৰশাসনে কৰা এটা অনুসন্ধানত তেওঁৰ বিষয়ে সাক্ষ্য দিয়াসকলক মাৰণাস্ত্ৰ দেখুৱাই ভাবুকি দিয়াৰ অভিযোগত ২০১৭ চনত ডিব্ৰুগড় আৰক্ষীয়ে চাৰ্টাৰ্ড একাউণ্টেণ্ট সঞ্জয় জৈনক গ্ৰেপ্তাৰ কৰিছিল।
সূত্ৰৰ পৰা জানিব পৰা গৈছে যে উক্ত গোচৰটো ডিব্ৰুগড়ৰ দিগম্বৰ জৈন সমাজ, গ্ৰাহম বজাৰ আৰু দিগম্বৰ জৈন সমাজ নয়া বজাৰ শাখাৰ মাজৰ বিবাদৰ সৈতে জড়িত আছিল।
ডিব্ৰুগড়ৰ শৈলেশ জৈনৰ অভিযোগৰ ভিত্তিত ভাৰতীয় দণ্ডবিধিৰ ৩৮৪/৫০৬ ধাৰাত ডিব্ৰুগড় আৰক্ষী থানাত ৪৯৩/২০১৭ নম্বৰত এটা গোচৰ পঞ্জীয়ন কৰা হৈছিল।